დანგრეული უკრაინა VS აყვავებული საქართველო - "ქართული ოცნების" ბანერები, რომელსაც საყოველთაო აღშფოთება მოჰყვა

ქართული ოცნების ბანერები

დღეს თბილისის ქუჩებში გამოჩნდა ბანერები, სადაც ერთ მხარეს ომისგან დანგრეული, გაპარტახებული უკრაინის ქალაქების შავ-თეთრი ფოტოებია, მეორე მხარეს კი “მშვიდობიანი და ლამაზი” საქართველო..

ეს მმართველი პარტიის წინასაარჩევნო ნოუჰაუა – ამ ფორმით “ქართული ოცნება” ცდილობს ამომრჩევლებს თავისი მთავარი ნარატივი კიდევ ერთხელ მიაწოდოს – “ქართული ოცნების” ხელიისუფლება იმდენად ბრძენი და წინდახედულია, რომ საქართველოში მშვიდობაა აი უკრაინელებმა კი, იგივე გამჭრიახობა ვერ გამოიჩინეს, ამიტომ, იქ ომი და ნგრევაა. 

მაგალითად, ერთ-ერთ ფოტოზე დონეცკის ოლქის სოფელ ბოგოროდიჩნეში დაბომბვის შედეგად განადგურებული ტაძარი ჩანს, მარჯვნივ კი თბილისის სამების ტაძარის ფერადი ფოტოა. (საინტერესოა, რომ ამ პლაკატისთვის რომელიმე ძველი ქართული ისტორული ტაძრის ფოტო კი არ აარჩიეს, არამედ რამდენიმე წლის წინ ბიძინა ივანიშვილი მიერ აშენებული ტაძრის)

ან კიდევ, მარცხნივ შავ-თეთრი ფოტოა განადგურებული მარიუპოლის თეატრის და მარჯვნივ – ფერადად, სენაკის თეატრი. (სხვათაშორის, ეს თეატრიც ბიძინა ივანიშვილის ფონდ “ქართუს” დახმარებით გარემონდა. ტ/კ “იმედი” წერს, რომ ეს 10 მლნ დაჯდა).

ბანერებზე, მარცხნივ, იქ სადაც ომით განადგურებული უკრაინიდანაა ფოტოები, მაღლა, კუთხეში გადახაზულია ნომრები: 4, 5, 9 და 25. ეს ოპოზიციური გაერთიანებების საარჩევნო ნომრებია. (4 – „კოალიცია ცვლილებისთვის” , 5 – „ერთიანობა-ნაციონალური მოძრაობა“, 9 – კოალიცია “ძლიერი საქართველო” და 25 – პარტია “გახარია საქართველოსთვის”).

დღესვე “ქართულმა ოცნებამ” საარჩევნო ვიდეოც გაავრცელა, რომელსაც იგივე შინაარსი აქვს. კადრში მოჩანს განადგურებული უკრაინა და “ფერადი, ლამაზი საქართველო”.

ეკრანის მარცხენა ნახევარზე, შავ-თეთრად, დანგრეული სკოლები უკრაინაში, წარწერით “არა ომს”, მარჯვნივ ფერადი და ახალი რომელიმე სკოლა საქართველოში, წარწერით “აირჩიე მშვიდობა”. ან, მარცხნივ შავ-თეთრი, დანგრეული ესტაკადები უკრაინაში და მარჯვნივ რიკოთის ახალი მაგისტრალი საქართველოში, დანგრეული ეკლესია უკრაინაში, ამაყად წამომდგარი სამება საქართველოში და ა.შ.

რა რეაქცია მოჰყვა ამ ბანერებს

ამ ბანერებსა და ვიდეოს სოციალურ ქსელში მოჰყვა დიდი აღშფოთება. ადამიანები წერენ, რომ “ამაზე უფრო მეტი ფსკერი აღარ არსებობს”, რომ ეს არის სირცხვილი.

ერთ-ერთი პირველი, ვისი კომენტარიც გავრცელდა ამ ბანერებზე, საქართველოს პრეზიდენტი სალომე ზურაბიშვილი იყო.

„ასეთი სამარცხვინო, ასეთი ჩვენი კულტურის, ტრადიციების, ისტორიისა და რწმენის შეურაცხმყოფელი არაფერი მინახავს. რა დღეში უნდა იყოთ, რა საცოდავები, რომ კგბ-ს სამჭედლოში დამზადებული პლაკატი თქვენს ხალხს უტიფრად და უნამუსოდ შესთავაზოთ! … “ღირსებით” ჯოჯოხეთისკენ !” – წერს პრეზიდენტი.

“რა შეიძლება იყოს იმაზე ამორალური და გულისამრევი, ვიდრე ომში მყოფ ქვეყანას ნიშნს რომ უგებ – შენი ეკლესიები დანგრეულია, ჩემი კიდევ – არა, შენი ქალაქები განადგურებულია, ჩემი კიდევ – გაბრდღვიალებული. ამით ომში მყოფ ქვეყანას, რომელსაც აგრესიული მეზობელი თავს დაესხა, ეუბნები, რომ ყველაფერი მისი ბრალია რაც თავს დაატყდა და ამაზე საარჩევნოდ ქულების დაწერას ცდილობ. ვიღაცები ფიქრობენ, რომ პროპაგანდისტულად სწორი გაათვლაა. ეს ბანერები პროპაგანდისტულადაც და მარკეტინგულადაც არის სრული კრახი. გამორიცხულია ამორალურობამ ვინმეს დადებითი შედეგი მოუტანოს“, – წერს ჟურნალისტი მერაბ მეტრეველი.

“ჰიპოთეტურად წარმოვიდგინოთ რომ 2009 ან 2010 წელია, უკრაინაში (ან ნებისმიერ სხვა ქვეყანაში) არჩევნებისთვის ემზადებიან და მმართველმა პარტიამ დაბეჭდა ბანერები:

• გორში ძმა რომ მკვდარ ძმას დასტირის ეგ კადრი;
• სისხლიანი ქალი რომ დანგრეული სახლის წინ ადგია ეგ კადრი;
• გიორგი ანწუხელიძის კადრი;
• დამწვარი სოფლების და სახლების კადრი;
• კიდევ უმარავი სხვა კადრი ჩვენი 2008 წლის ზაფხულიდან.

ამას გვერდით მიუყენა ჯანმრთელი და ბედნიერი ადამიანები, მშვენიერი შენობები და თავის მოსახლეობას უთხრა, ძვირფასებო, ნახეთ მე რა კარგი ვარ, ამიტომ უთუოდ მე უნდა ამირჩიოთო. რა დიდებული წინასაარჩენო კამპანია იქნებოდა სახელწოდებით, როგორც იმ ძველ ანეკდოტშია, ,,სამაგიეროდ მე კიბო არ მაქვს”. არ ვიცი სხვისი ქმედებების გამო რატომ უნდა მრცხვენოდეს, მაგრამ მრცხვენია“, – წერს სოციალურ ქსელში ერთ-ერთი მომხმარებელი.

“მე მგონია რომ დიდი ბანერები უნდა დავბეჭდოთ და ამ ბანერების გვერდით დავკიდოთ ბოდიში! ბოდიში უკრაინელებს, რომ ასეთი გამყიდველი, ლაჩარი, ნაძირალა ხელისუფლება გვყავს!! ეს სირცხვილი რამენაირად უნდა ჩამოვირეცხოთ!”, – წერს ჟურნალისტი ნინია კაკაბაძე.

“არ მყოფნის სიტყვები “ქართული ოცნების” პოსტერებზე. როგორ შეიძლება იმპერიის მიერ დანგრეული ქვეყნის და დახოცილი ადამიანების სიცოცხლე, ღირსება და მომავალი გამოიყენო პოლიტიკურად და ასე იაფფასიანად. როგორ შეიძლება ვიღებდეთ, რომ საქართველოს ხელისუფლება იმეორებს რუსული ნეოიმპერიული პოლიტიკის მთავარ მანტრას, რომ უკრაინელების ბრალია ომი და მათ არჩევანი ჰქონდათ და ესე იგი ღირსებიც არიან, რაც მათ მიწაზე ხდება.

როგორ შეიძლება გლოვაში და გაჭირვებაში მყოფ ერს გაუბედო ასეთი შეურაცხყოფა და ეს გააკეთო მცირე თანაგრძნობის გარეშე?! ჩვენი კულტურა მტრის დედის გლოვის თანაზიარების კულტურაა, არა თუ ძმის და დის გლოვის. “ქართული ოცნების” მხარდაჭერა აღარ არის გეოპოლიტიკური, პოლიტიკური, იდეოლოგიური საკითხი. ეს არის ადამიანობის საკითხი“, – წერს თამთა მიქელაძე, ორგანზიაცია “სოციალური სამართლიანობის ცენტრის დირექტორი”.

“მართლა იგივე იქნებოდა, სხვისი დახოცილი ბავშვების გვერდით თავისი ცოცხალი ბავშვების ფოტოები რომ დაედოთ, ავადმყოფი მანიაკები არიან და ქოცებთან ლაპარაკს აზრი აღარ აქვს, 26 ოქტომბერს გაეცემათ პასუხი...სასწრაფოდ უნდა ჩამოხსნან ეს ბილბორდები“, – წერს აქტივისტი გიორგი კიკონიშვილი.

ამ ბანერებმა ბევრ ადამიანს გაახსენა საბჭოთა პროპაგანდა.

“ახალგაზრდა კომკავშირელების საზაფხულო ბანაკიდან” – წერს ეკონომისტი გიორგი გოგუაძე და აქვეყნებს საბჭოთა პოსტერს, რომელზეც წერია: “Мы курсом мыра держим путь! Они хотят войну раздуть…”

ბევრი წერს, რომ ეს ბანერები სოციალურ ქსელში არ უნდა გავაზიროთ, რადგან ამით “ქართული ოცნების” პროპაგანდას ვეხმარებით.

რა ვიცით ამ ბანერებზე

პარტია “ქართულ ოცნებაში” რადიო “თავისუფლებას” დაუდასტურეს, რომ ეს მათი საარჩევნო ბანერებია. ასევე, დასძინეს, რომ ეს ბანერები დამზადდა მმართველი პარტიის შეკვეთით. მათივე განმარტებით, ის ემსახურება საზოგადოებისთვის იმის შეხსენებას “საით მიაქანებს ოპოზიცია ქვეყანას”.

გამოცემა ეცადა გაერკვია, რა დაჯდა ეს კამპანია, მაგრამ, პარტიაში ამის შესახებ ინფორმაციის წერილობით გამოთხოვა მოსთხოვეს. (აქვე, აღნიშნული ინფორმაცია უკვე გამოითხოვა JAMnews-მაც და თუ მას ოდესმე მოგვაწვდიან, სტატია განახლდება).

26 სექტემბერის 18:00 საათის შემდეგ, როგორც კი სამუშო საათები დასრულდა, ამ ბანერებისა და ვიდეოს გაზიარება დაიწყეს საბიუჯეტო სამსახურებში დასაქმებულმა ხალხმა, მაგალითად, რეგიონებში, მერიებისა და საკრებულოების თანამშრომლებმა.

“მართლა რა კარგი რეკლამა გამოსულა. მე აქაური სულელების რეაქციებით ვზომავ ხშირად, რა ვარგა და რა არ ვარგა. ძალიან კარგი რეკლამაა მართლაც. დიახ! საქართველოში ომი არ იქნება და ამას დავიცავთ ყველაფრის ფასად”, – წერს საქართველოს რკინიგზის“ მგზავრთა გადაყვანის სამსახურის უფროსი დაჩი ცაგურია.

კითხვაზე, რა თანხა გადაიხადა პარტიამ ბანერების დამზადებაში, “ქართულ ოცნებაში” “რადიო თავისუფლებას” მოსთხოვეს, რომ ინფორმაცია წერილობით გამოითხოვონ. მათ არ უპასუხეს შეკითხვას, მსგავსი ბანერები მხოლოდ თბილისში იქნება გამოკრული თუ რეგიონებშიც.

“ყველა მორალური, ზნეობრივი, წითელი ხაზი გადაკვეთილია”

პოლიტოლოგ გია ხუხაშვილს, რომელიც ძალიან კარგად, შიგნიდან იცნობს “ქართულ ოცნებას”, ვკითხეთ, რას შეიძლება ნიშნავდეს ასეთი უკიდურესი ნაბიჯი “ქართული ოცნებისგან”.

“ყველა მორალური, ზნეობრივი, წითელი ხაზი გადაკვეთილია. შეურაცხყოფაა მიყენებული უკრაინელი ხალხისთვის“, – ამბობს იგი.

ხუხაშვილის აზრით, “ქართული ოცნების” პოლიტიკური გათვლა გასაგებია – ამით ის ამბობს, რომ ყველაფერზეა წამსვლელი:

“ნერგავს საზოგადოებაში შიშებს, შფოთვებს და ცდილობს მოახდნოს პოზიციონირება, როგორც მშვიდობის ერთადერთი გარანტი. ცდილობს შექმნას განწყობა, რომ თუ ხელისუფლება შეიცვვალა, მეორე დღესვე ოპოზიცია ომს გახსნის“.

ვკითხვაზე – ვის შეიძლებოდა უკავშირდებოდეს ასეთი კამპანიის მოფიქრება, მას ახსენდება წინა არჩევნები, როდესაც ასევე სისხლიანი ბანერები გამოფინეს ქუჩაში.

“ასეთი აგრესიული სტილი მოშემ კლუგჰატს ჰქონდა წინა არჩევნებზე. ეს სტილი მისი მოგონილია, მისი შემოთავაზებულია. ამ კონკრეტულ შემთხვევაში, ვინ არის იდეის ავტორი და მათი პიარტექნოლოგი არ ვიცი, მაგრამ, ეს კამპანია იგივე ტალღაზეა, იგივე აქცენტებია, იგივე სიძულვილის მოწოდებით არის გაჟღენთილი. ცივილიზებულ სამყაროში ასეთ პიარტექნოლოგიებს არ იყენებენ, ამას იყენებენ ტოტალურ სამყაროში“, – ამბობს ხუხაშვილი.

რა ვიცით მმართველი პარტიის სტრატეგიულ მრჩევლებზე

2023 წლის დეკემბერში მმართველმა პარტიამ განაცხადა, რომ საარჩევნო პერიოდისთვის სტრატეგიულ მრჩევლებად დაიქირავა მოშე კლუგჰაფტი და მირი მიქაელი, კომპანია ACT NEWS-ის დამფუძნებლები.

მაშინ “ქართულმა ოცნებამ” განაცხადა, რომ კლუგჰაფტი „არის საერთაშორისო სტრატეგიული მრჩეველი და კამპანიის მენეჯერი პოლიტიკური ლიდერებისა და პოლიტიკური პარტიებისთვის მთელს მსოფლიოში“.

მათივე განცხადეიბით, კლუგჰაფტი მართავდა სალომე ზურაბიშვილის მეორე ტურის წინასაარჩევნო კამპანიას 2018 წელს, რომელშიც სალომე ზურაბიშვილმა მოიგო საპრეზიდენტო არჩევნები.

“მოშე კლუგჰაფტი არის საერთაშორისო სტრატეგიული მრჩეველი და კამპანიის მენეჯერი პოლიტიკური ლიდერებისა და პოლიტიკური პარტიებისთვის მთელს მსოფლიოში, რომელიც არჩეულია Forbes-ის მიერ ისრაელის ერთ-ერთ ყველაზე გავლენიან ადამიანად 40 წლამდე და არჩეულია Jerusalem Post-ის მიერ 50 ყველაზე გავლენიან ებრაელს შორის“, – წერია პერსონალურ საიტზე კლუგჰაფტის შესახებ.

აქედანვე ვიგებთ, რომ მან გადამწყვეტი როლი ითამაშა 2016 წლის საყოველთაო არჩევნებში რუმინელი სოციალ-დემოკრატების გამარჯვების უზრუნველყოფაში. ასევე, ჩართული ისრაელში, ავსტრიაში, გერმანიაში, იტალიასა და კოსოვოში ჩატარებულ არჩევნებში. კლუგჰაფტი მუშაობდა ისრაელის პრემიერ-მინისტრ ნეთანიაჰუსთან და პრემიერ-მინისტრ ბენეტთან, ასევე თავდაცვის, განათლების, შინაგან საქმეთა, ეკონომიკისა და იუსტიციის მინისტრებთან.

„მოხარული ვარ, რომ დავბრუნდი საქართველოში და ვხედავ მის მნიშვნელოვან განვითარებას როგორც ეკონომიკაში, ასევე ევროკავშირისადმი მიდგომაში და განსაკუთრებით მის უნარში, შეინარჩუნოს მშვიდობა იმ დღეებში, როდესაც მსოფლიო ომის პირობებშია. მაგრამ საკმარისი არ არის, რომ უბრალოდ ბევრი აკეთო – ასევე აუცილებელია იმის უზრუნველყოფა, რომ საზოგადოებამ იცოდეს ამის შესახებ და ჩვენ ამაში დავეხმარებით მომავალ წელს“, – თქვა კლუგჰაფტმა 2023 წლის დეკემბერში.

გამოცემა Civil.ge-ს ინფორმაციით, მირი მიქაელი ისრაელელი საგამოძიებო ჟურნალისტია ტელევიზიაში მუშაობის 17-წლიანი გამოცდილებით. მისი ვებგვერდის თანახმად, მიქაელის გამოცდილება მოიცავს ლექციების წაკითხვას კომუნიკაციების თემებზე, კონფერენციების, ღონისძიებებისა და საზეიმო საღამოების გამართვას ებრაულ და ინგლისურ ენებზე ორგანიზაციებისა და კომპანიებისთვის მსოფლიოს მასშტაბით.  

JAMnews-ი ეცადა გადაემოწმებინა ინფორმაცია, კვლავ ამ მრჩევლებთან მუშაობს თუ არა “ქართული ოცნება”, თუმცა, პარტიის პრესსამსახურში ჩვენს ზარებსა და შეტყობინებებს არ უპასუხეს.

უკრაინის საგარეო საქმეთა სამინისტროს გამოხმაურება

დღის ბოლოს ბანერებს გამოეხმაურა უკრაინის საგარეო საქმეთა სამინისტრო.

ოფიციალურ განცხადებაში წერია, რომ სამინისტრო გმობს და დაუშვებლად მიიჩნევს რუსეთის მიერ უკრაინის წინააღმდეგ დაუნდობელი ომის საშინელი შედეგების, ათასობით უდანაშაულო ადამიანის ტანჯვისა და სისხლის, საეკლესიო სიწმინდეებისა და კაცობრიობის კულტურული აქტივების განადგურების სურათების პოლიტიკურ რეკლამაში გამოყენებას.

“ქართველ ხალხს შეიძლება არ ეშინოდეს ახალი ომის, სანამ უკრაინა წინააღმდეგობას უწევს რუსეთის აგრესიას. ამ წინააღმდეგობის საშინელი ფასი საქართველოში მშვიდობის ფასიცაა” – წერია განცხადებაში.

უკრაინის საგრეო საქმეთა სამინისტრო მოუწოდებს საქართველოს მთავრობას, მმართველ პარტია „ქართულ ოცნებას“ და ყველა დაინტერესებულ მხარეს, თავი შეიკავონ უკრაინისა და მისი მოქალაქეების წინააღმდეგ მიმდინარე აგრესიული ომის თემატიკის გამოყენებისგან საქართველოში.

“უკრაინა თანმიმდევრულად, შეუფერხებლად და რეზოლუციურად გააგრძელებს საქართველოს სუვერენიტეტისა და ტერიტორიული მთლიანობის შენარჩუნებას მის საერთაშორისოდ აღიარებულ საზღვრებში. ვიმედოვნებთ, რომ საქართველოში საპარლამენტო არჩევნები მშვიდობიანად და დემოკრატიულად ჩატარდება და ქართველი ხალხი გააგრძელებს ევროკავშირსა და ნატოში გაწევრიანების სტრატეგიულ კურსს“, – ნათქვამია სამინისტროს განცხადებაში.

ქართული ოცნების ბანერები