ცხინვალში კიდევ ერთი გახმაურებულ საქმეში ბრალდებული უკრაინაში საბრძოლველად წავა
სამხრეთ ოსეთის თავდაცვის ყოფილი მინისტრი
ე.წ. სამხრეთ ოსეთის ტელეგრამის არხმა Historypoliticus-მა გაავრცელა ინფორმაცია იმის შესახებ, რომ სამხრეთ ოსეთის თავდაცვის ყოფილი მინისტრი მარატ პავლოვი გაასამართლეს ვლადიკავკაზში (ჩრდილოეთი ოსეთი, რუსეთის ფედერაცია). არხის ავტორები არ აკონკრეტებენ, რა მუხლით იქნა გასამართლებული ის და რატომ მოხდა ეს მაინცდამაინც რუსეთში, მაგრამ ისინი აცხადებენ, რომ ციხის ნაცვლად, პავლოვი საბრძოლველად უკრაინაში წავა, რომელმაც შესაბამისი კონტრაქტი უკვე გააფორმა რუსეთის თავდაცვის სამინისტროსთან. ბოლო ერთი თვის განმავლობაში ეს უკვე მეორე მსგავსი შემთხვევაა.
JAMnews-მა ამ ინფორმაციის ოფიციალური დადასტურება ან უარყოფა ვერ შეძლო. გენერალი 2024 წლის აპრილში მოულოდნელი გადადგომის შემდეგ, საჯარო სივრციდან გაუჩინარდა.
პავლოვი თანამდებობიდან გადააყენა სამხრეთ ოსეთის ე.წ. პრეზიდენტმა ალან გაგლოევმა. ოფიციალური ვერსიით, ეს იყო მისი მოადგილის ვეფხვია თანდელოვის დაკავების შედეგი, რომელიც ეჭვმიტანილია სიგარეტის კონტრაბანდაში.
თანდელოვი რუსმა მესაზღვრეებმა 2024 წლის 18 აპრილს დააკავეს. მათივე ინფორმაციით, სამხრეთ ოსეთის თავდაცვის სამინისტროს კუთვნილი მანქანის საბარგულში რამდენიმე ათასი კოლოფი უაქციზო სიგარეტი აღმოაჩინეს. თანდელოვს, რომელიც ავტომობილს მართავდა, შინაპატიმრობა შეეფარდა.
იმავე დღეს გაგლოევმა ხელი მოაწერა განკარგულებას მინისტრის, მარატ პავლოვის გადადგომის შესახებ.
ოპოზიციურმა Telegram-ის არხებმა მაშინვე განაცხადეს, რომ რუსეთში უაქციზო სიგარეტის კონტრაბანდს კონტროლს ახორციელებს თავად პრეზიდენტი გაგლოევი, მისი ძმა ალიკი და მათთან დაახლოებული ჩინოვნიკები, რომელთა დაჯგუფებაში შედის დაკავებული ვეფხია თანდელოვიც, პავლოვმა კი მას უბრალოდ სამინისტროს მანქანა ათხოვა. უფრო მეტიც, სწორედ გაგლოევმა მოითხოვა მისგან ეს:
“ინსაიდერები ამბობენ, რომ თავდაცვის მინისტრს მარატ პავლოვს სამხრეთ ოსეთის ხელისუფლებამ სთხოვა სიგარეტის გადატანა სამსახურებრივი მანქანით, რადგან მანქანა საზღვარზე შემოწმებას არ ექვემდებარება. მინისტრის დიპლომატიური სანომრე ნიშნით ავტომობილი საზღვარს ისე ხშირად კვეთდა, რომ ეჭვსაც კი აღძრავდა, მაგრამ ამის მიუხედავად, კარგა ხანს თავდაცვის სამინისტროს კუთვნილი მანქანა არ შეუმოწმებიათ“.
როდესაც მესაზღვრეებმა მანქანა დაათვალიერეს და კონტრაბანდა აღმოაჩინეს, ალან გაგლოევმა მოითხოვა, რომ მას ყველაფერი თავის თავზე აეღო, მაგრამ უარი მიიღო და დაუმორჩილებელი მინისტრი გადააყენა. ზუსტად ასე განვითარდა, არხის ცნობით, მოვლენები.
ამ ვერსიას ვერც ვადასტურებთ და ვერც უარვყოფთ, მაგრამ ფაქტია, რომ კონტრაბანდასთან დაკავშირებით ჩინოვნიკების სკანდალები სამხრეთ ოსეთისთვის ახალი არ არის. მაგალითად, 2023 წლის აგვისტოში რუსმა მესაზღვრეებმა დააკავეს პარლამენტის მაშინდელი სპიკერი ალან ალბოროვი, ალან გაგლოევის კოლეგა ნიხასის პარტიაში, რომელმაც ასევე გამოიყენა თავისი სამსახურებრივი მანქანა რუსეთში კონტრაბანდული სიგარეტების გადასატანად. ამჟამად ალბაროვი მუშაობს სამხრეთ ოსეთის პრეზიდენტის ადმინისტრაციის ხელმძღვანელად.
რაც შეეხება მარატ პავლოვს, 2022 წელს, ხელისუფლებაში მოსვლიდან მალევე, თავად ალან გაგლოევმა ის მინისტრად დანიშნა. სამხრეთ ოსეთის თავდაცვის სამინისტრომ ეს დიდი ენთუზიაზმით არ მიიღო – არსაიდან მოსულმა “პარკეტის“ ოფიცერმა სამხედროებს ნდობა ვერ მოიპოვა. მათი თქმით, ახალი მინისტრი “ერთმანეთისგან ვერ არჩევს 7,62 კალიბრის ცეცხლსასროლ იარაღს 5,45 კალიბრისგან“. თუმცა, მოგვიანებით პავლოვმა მაინც მოახერხა ხელქვეითთა შორის ავტორიტეტის მოპოვება და გენერლის წოდება მიიღო.
შეგახსენებთ, რომ ოქტომბრის დასაწყისში მკვლელობაში ბრალდებული ყოფილი კრიმინალური პოლიციის თანამშრომელი აცამაზ ნანიევი სასამართლო პროცესს გაექცა და რუსეთის თავდაცვის სამინისტროსთან კონტრაქტიც გააფორმა, ის საბრძოლველად უკრაინაში წავიდა.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
