საგამოძიებო სამსახური: 3 სავარაუდო ქოლცენტრი გავჩხრიკეთ, საქმე გვაქვს დიდი მასშტაბის ფინანსებთან
ჩხრეკა არჩევნებამდე ორი დღით ადრე
საქართველოს ფინანსთა სამინისტროს საგამოძიებო სამსახურის განცხადებით, წარმოებაში არსებულ სისხლის სამართლის საქმესთან დაკავშირებით მიღებული ოპერატიული ინფორმაციის შესაბამისად, “სამ სავარაუდო ე. წ. ქოლცენტრში ჩატარდა საგამოძიებო მოქმედებები და მოსამართლის განჩინების საფუძველზე გაიჩხრიკა მითითებული ობიექტები”.
“მიღებული ინფორმაციით, ქოლცენტრების საქმიანობა დაკავშირებულია იმავე სახის დანაშაულთან, რა დანაშაულზეც აღნიშნული გამოძიება მიმდინარეობს და საქმე გვაქვს გაცილებით დიდი მასშტაბის ფინანსებთან. ასევე, ობიექტებზე დასაქმებულ პირთა ნაწილი დაკავშირებულია წინა პერიოდებში გამოვლენილ ანალოგიური სახის დანაშაულებრივ ქოლცენტრებთან.
ადგილზე მისულმა საგამოძიებო სამსახურის თანამშრომლებმა აღმოაჩინეს გარკვეული ელექტრონული ინფორმაციის შემცველი სხვადასხვა სახის ტექნიკა, მოწყობილობები და დოკუმენტაცია, რაც ამოღებულ იქნა სათანადო წესით.
საზოგადოების ინტერესის გათვალისწინებით, საგამოძიებო სამსახური პერიოდულად მიაწვდის საზოგადოებას ინფორმაციას გამოძიების მიმდინარეობისა და შედეგების შესახებ” – ნათქვამია განცხადებაში.
არჩევნებამდე ორი დღით ადრე საგამოძიებო სამსახური Concentrix-ის ოფისში და Atlantic Council-ის თანამშრომლების სახლებში, ასევე სთენდაფერ ონისე ცხადაძის და მისი ძმის სახლში შევიდა.
ჩხრეკა Atlantic Council-ის მკვლევრების სახლებში
Atlantic Council-ის თანამშრომლის, სოფო გელავას სახლში ჩხრეკა დასრულდა. ფინანსურმა პოლიციამ წაიღო გელავას პერსონალური კომპიუტერი, პირადი ტელეფონი, მისი მეუღლის, ფედერალისტების ერტერთი ლიდერის, გიორგი ნონიაშვილის ლეპტოპი და მათი არასრულწლოვანი შვილის ლეპტოპი. ჩხრეკა სასამართლოს განჩინებით ჩატარდა.
“ამიხსნეს, რომ ეს არის დაკავშირებული იმ კომპანიასთან, რომელსაც დაკონტრაქტებული ვყავარ, თუმცა, რეალურად მე ვმუშაობ ატლანტიკურ საბჭოში, ეს არის საერთაშორისო ორგანიზაცია, ამერიკაში დაფუძნებული და ჩემი საქმიანობა არის პირდაპირ დაკავშირებული დეზინფორმაციასთან, საინფორმაციო ოპერაციების კვლევასთან, რუსეთის ჩარევასთან. ამიტომ, ჩემთვის, ამ წუთას ძალიან საეჭვოა, რა ხდება და რასთან არის დაკავშირებული ეს ამბავი” – ამბობს გელავა TV პირველთან.
ადვოკატ შოთა თუთბერიძის შეფასებით, ჩხრეკა სავარაუდოდ, წინასაარჩევნო რეპრესიებს უკავშირდება.
კანონით, ჩხრეკის შესახებ განჩინებაში იწერება, რას ეძებს გამოძიება. აქ არ ეწერა და ეს იყო სტანდარტული შაბლონი, რომელიც გამზადებულია ხოლმე იმ შემთხვევისთვის, როცა პოლიცია მზად არის, რომ ადამიანებს რაღაცა ჩაუდოს.
ჩვენს შემთხვევაში, ეს მადლობა ღმერთს და კეთილსინდისიერ სამართალდამცველებს, არ მომხდარა და ეს საფრთხე არც გვიგრძნია ამ ეტაპზე, თუმცა, სასამართლოს გადაწყვეტილება არის აბსურდული, იმიტომ, რომ არც ამ საცხოვრებელ სახლს და არც ამ ადამიანებს, ვისთანაც ჩხრეკა ჩატარდა, არავითარი შემხებლობა არ აქვს საქმესთან.” – შოთა თუთბერიძე.
ცნობილი გახდა, რომ სოფო გელავას გარდა, ფინანსური პოლიცია შევიდა ეთერ ბუზიაშვილი სახლში, რომელიც ასევე Atlantic Council-ის მკვლევარია. მის სახლში ასევე ჩხრეკა მიმდინარეობს.
ჩხრეკა Concentrix-ის ოფისში
თბილისში, ვაკე პლაზაში მდებარე ამერიკულ კომპანია Concentrix Georgia-ში ფინანსთა სამინისტროს საგამოძიებო სამსახურის თანამშრომლები შევიდნენ. ამ წუთებში, 3 სართულზე მიმდინარეობს ჩხრეკა.
Concentrix Georgia-ს თანამშრომლებს უთხრეს, რომ დღეს სამუშაო პროცესი არ იქნება, კომპანიაში მხოლოდ ოფიციალური ხელმძღვანელი პირები იმყოფებიან.
შენობაში ცოტა ხნის წინ შევიდა კომპანიის იურისტი.
Concentrix Georgia ამერიკული კომპანიაა, რომელიც მსხვილ ბიზნესკომპანიებს საზღვარგარეთ კონსულტაციებს უწევს.
ჩხრეკა სთენდაფერის სახლში
სთენდაფერი ონისე ცხადაძისა და მისი ძმის სახლში ფინანსური პოლიციის საგამოძიებო დეპარტამენტი შევიდა და ჩხრეკას ატარებს. ამის შესახებ ცხადაძე ფეისბუქზე წერს და აღნიშნავს, რომ პოლიციამ სახლიდან კომპიუტერული ტექნიკა წაიღო.
“ფინანსური პოლიცია შემოვიდა დღეს ჩემთან და ჩემს ძმასთან. გარაჟის დაშენებაში გვაქვს ნაქირავები, მე ყველა ანგარიში დაყადაღებული მაქვს, ჩემს ძმას ბანკის ვალები და ჩვენთან მოვიდა ფინანსთა სამინისტროს საგამოძიებო სამსახური.
ჩაატარეს ჩხრეკა, ამოიღეს ყველანაირი ტექნიკა (ერთი წლის გაფუჭებული ლეპტოპიც) ჩემი ტელეფონის გარდა. ოქმი იყო ძალიან სასაცილო. ყველაფერზე ეწერა ამოღებულია ლეპტოპი ყავისფერი ჩანთიდან რომელიც იდო იატაკზე, ამოღებულია ტელეფონი რომელიც იდო იატაკზე… ყველაფერი იატაკზე იდო. მაგიდა და კარადა არ გვაქვს სახლში და ფინანსური პოლიცია დაგვადგა, თან ისეთ ადგილას ვცხოვრობთ ჩვენ თვითონ ძლივს ვაგნებთ და ამათმა საიდან გაიგეს სად ვცხოვრობთ არ ვიცი. თანდათან გავიხსენებ კიდე”- წერს ცხადაძე.
