ჩეჩენ სამხედროებს სირიაში ოპერაციისთვის ამზადებენ

ჩეჩნეთის შინაგან საქმეთა სამინისტროს ნაციონალური გვარდიის სამხედროებს სირიაში სახმელეთო ოპერაციისთვის ამზადებენ. ამის შესახებ რუსული “ნოვაია გაზეტა” წერს.

გამოცემა მტკიცებულებებს – ორი სარეკლამო ბროშუირის ფოტოებს, აქვეყნებს.

ისინი ბატალიონ “სევერის” მოსამსახურეთა შორის ვრცელდება, რომელიც რუსეთის ნაციონალური გვარდიის სტრუქტურაში შედის.

პირველ ბროშურას “ვიზუალური თარჯიმანი (სირიის არაბული რესპუბლიკა)” ეწოდება. მის გარეკანზე რუსეთის თავდაცვის სამინისტროს ემბლემა – წითელ-თეთრ-ლურჯი ვარსკვლავია გამოსახული.

ინფორმაცია ბროშურაში წარმოდგენილია თემატურად სტრუქტურირებული სურათების სახით: ახლო აღმოსავლეთის რუკა, სირიის რუკა, იმ რიცხვებისა და ფრაზების არაბულად თარგმნა (ტრანსკრიფცია რუსულად), რაც ადგილობრივ მოსახლეობასთან საურთიერთოდ და მათგან მოწინააღმდეგის ადგილმდებარეობის, შეიარაღებისა და ქმედებების შესახებ ინფორმაციის მისაღებად არის საჭირო.

მეორე გამოცემა  ათფურცლიან  ბროშურას წარმოადგენს და პრაქტიკულად არ შეიცავს ილუსტრაციებს. მისი სახელწოდება ასე ჟღერს: “რეკომენდაციები სამხედრო მოსამსახურეებისთვის სირიის არაბთა რესპუბლიკაში დავალებების შესრულებისას”.

ბროშურა რამდენიმე თავისგან შედგება, რომლებშიც მოცემულია მოკლე ინფორმაცია იმ ქვეყნის შესახებ, სადაც საბრძოლო მოქმედებები მიმდინარეობს: გეოგრაფიული ცნობები, ენა, დღესასწაულები, ვალუტა, წეს-ჩვეულებები.

“ნოვაია გაზეტა” წერს, რომ სამხედრო სპეციალისტების აზრით, ეს ბროშურები ძალიან ჰგავს იმას, საბჭოთა მეომრებს ავღანეთის ომის დროს რომ ურიგებდნენ.