ახალი ამბები, რეპორტაჟი: 11 ოქტომბერს, ყარაბაღში მიმდინარე საბრძოლო მოქმედებები

უკვე რამდენიმე დღეა, აქტიურად განიხილება საკითხი, თუ ვინ აკონტროლებს ჰადრუთს. სომხეთის თავდაცვის სამინისტრომ გადაცემა „შეიარაღებული ძალებისთვის“ ამ ქალაქში რეპორტაჟი გადაიღო. ეს ვიდეო უკვე გამოაქვეყნა Facebook-ის საკუთარ გვერდზე თავდაცვის სამინისტროს პრესმდივანმა, შუშან სტეფანიანმა.

რეპორტაჟში არის კადრები, როდესაც ავტომობილი გადის ქალაქის ცნობად სიმბოლოებთან. ასევე, გადამღები ჯგუფი გაესაუბრა ჰადრუთის რაიონის ადმინისტრაციის ხელმძღვანელს, კამო პეტროსიანს, რომელმაც განაცხადა, რომ ქალაქში, სხვადასხვა კალიბრის იარაღიდან ისროდნენ

„ქალაქში დივერსიული ჯგუფი შემოიჭრა, ჩვენ ისე ვიდექით, როგორც ერთი ადამიანი, მსხვერპლი და დაჭრილები ორივე მხარესაა“, – ამბობს ის რეპორტაჟში.

სომხეთისა და აზერბაიჯანის საგარეო საქმეთა მინისტრების მიერ ხელმოწერილი შეთანხმების თანახმად, აზერბაიჯანმა და სომხეთმა აიღეს ვალდებულება, შეწყვიტონ ცეცხლი სამხედრო ტყვეებისა და დაღუპულთა ცხედრების გაცვლისათვის, რომელიც წითელი ჯვრის საერთაშორისო კომიტეტის შუამავლობით უნდა განხორციელდეს.

თუმცა, წითელი ჯვრის საერთაშორისო კომიტეტის საკომუნიკაციო პროგრამის სომხეთის ოფისის ხელმძღვანელმა განაცხადა, რომ ორგანიზაცია იღებს ინფორმაციას იმის შესახებ, რომ კონტაქტის ხაზზე, ორივე მხრიდან გრძელდება სროლები. და წითელი ჯვრის საერთაშორისო კომიტეტი არ დაიწყებს თავის ჰუმანიტარულ საქმიანობას, სანამ კონფლიქტის ყველა მხარე არ შეასრულებს ზავის შესახებ შეთანხმებას:

„რაც შეეხება თვითონ პროცესსა და თარიღებს, როდის იქნება მისი დაწყება შესაძლებელი, ეს მხარეების ხელშია. ჩვენ იმედს გამოვთქვამთ, რომ გაჩნდება ამ ოპერაციის ჩატარების შესაძლებლობა, რადგან, მიგვაჩნია, რომ ეს აუცილებელია ჰუმანიტარული თვალსაზრისით და საერთაშორისო ჰუმანიტარული სამართლის ფარგლებში, მხარეთა მიერ აღებული ვალდებულებების შესაბამისად“.

აზერბაიჯანის შეიარაღებული ძალები სამხრეთ მიმართულებას უტევენ და ამისთვის ჯავშან-ტექნიკასა და სარაკეტო-საარტილერიო დანადგარებს იყენებენ. სომხური მხარე მოწინააღმდეგის შეტევებს იგერიებს, იტყობინბა სომხეთის თავდაცვის სამინისტროს პრესმდივანი, შუშან სტრფანიანი.

რომის პაპმა ფრანცისკე I-მა მოუწოდა კავკასიაში ერთმანეთთან დაპირისპირებულ სომხეთისა და აზერბაიჯანის ხალხებს, „ჩაიდინონ კეთილი ნების კონკრეტული ქმედებები“ კონფლიქტის მშვიდობიანი დარეგულირებისთვის, იტყობინება Vatican news.

მან მოუწოდა ლიდერებს, იპოვონ გამოსავალი „არა ძალისა და იარაღის გამოყენების, არამედ დიალოგისა და მოლაპარაკებების გზით“ და მიმართა ყველა ქრისტიანს, მასთან ერთად ილოცონ რეგიონში მშვიდობისათვის.

პრეზიდენტი აზერბაიჯანის პრეზიდენტმა ილჰამ ალიევმა ტვიტერის საკუთარ გვერდზე, განჯაზე მომხდარი სარაკეტო თავდასხმის შეასახებ დაწერა.

«ეს სარაკეტო შეტევა სომხეთიდან, ვარდენისის რაიონიდან განხორციელდა. სულ, აზერბაიჯანში, 41 მშვიდობიანი მოსახლე დაიღუპა და 200-ზე მეტი დაიჭრა. სომხური მხარის მიზანი, ჩვენ მიერ გათავისუფლებული ტერიტორიის ხელახლა ოკუპაციაა», — განაცხადა მან.

არაიკ არუთუნიანმა საბრძოლო მოქმედებების დაწყების შემდეგ, პირველი დიდი პრესკონფერენცია გამართა.

მისი თქმით, ამ დროისთვის, ზავის რეჟიმი საერთო ჯამში დაცულია, მაგრამ უცნობია, რამდენ ხანს შენარჩუნდება ეს სიტუაცია. მისი გამოსვლის ძირითადი თეზისები:

• ყარაბაღი თავდაცვის უფლებას იყენებს და არასოდეს იქნება აზერბაიჯანის ნაწილი.

• გენოციდზე, რომელიც ახლა ყარაბაღელი ხალხის წინააღმდეგ ხორციელდება, პასუხისმგებლობა ეკისრება არა მხოლოდ აზერბაიჯანსა და თურქეთს, არამედ ისრაელსაც, რომელიც მათ იარაღით ამარაგებს.

• ყარაბაღი ცივილიზებული მსოფლიოსგან არსებით მხარდაჭერას ელოდება – არა მხოლოდ მოწოდებებსა და განცხადებებს.

• აზერბაიჯანი ყარაბაღის მშვიდობიანი მოსახლეობის წინააღმდეგ იყენებს Смерч“-ისა და „Полонез“-ის სარაკეტო სისტემებს, მოიერიშე უპილოტო თვითმფრინავებსა და კასეტური ბომბებს.

• დაღუპულთა ცხედრების გაცვლის პროცედურა არ დაწყებულა.

„2020 წლის 11 ოქტომბერს, ღამის 2 საათზე, სომხეთის შეიარაღებული ძალების მიერ ფრონტიდან მოშორებით მდებარე, აზერბაიჯანის სიდიდით მეორე ქალაქ განჯაში, მრავალბინიან საცხოვრებელ სახლებზე განხორციელებული სარაკეტო თავდასხმის შედეგად, დაიღუპა 9 ადამიანი, მათ შორის, 4 ქალი, დაიჭრა 34 ადამიანი, მათ შორის 16 ქალი და 6 არასრულწლოვანი. შეტევის შედეგად, დაზიანდა 10 მრავალბინიანი სახლი და 100-ზე მეტი სხვა ობიექტი“, – ნათქვამია აზერბაიჯანის გენერალური პროკურატურის პრესსამსახურის განცხადებაში.

10-დან 11 ოქტომბრის ღამეს, მთიანი ყარაბაღის თავდაცვის არმიამ განცხადება გამოაქვეყნა:

„მიუხედავად იმისა, რომ თავდაცვის არმია ასრულებს მოსკოვში ხელმოწერილი ჰუმანიტარული ზავის შეთანხმებას და არ აწარმოებს ცეცხლს, აზერბაიჯანული მხარე აგრძელებს სტეპანაკერტისთვის, გადრუთისთვის, მარტუნისა და არცახის რესპუბლიკის სხვა დასახლებული პუნქტებისთვის სარაკეტო დარტყმების მიყენებას“.

სტეპანაკერტში უარყოფენ ინფორმაციას იმის შესახებ, რომ სომხური მხარე ქალაქ განჯას ბომბავს.

„სომხეთის შეიარაღებული ძალების ქვედანაყოფებმა, რომლებიც ჰუმანიტარული ზავის პირობებს არ იცავენ, საკუთარი ძალებისა და სამხედრო ტექნიკის კონცენტრირების შემდეგ, კვლავ სცადეს მცირე ჯგუფებით ჰადრუთისა და ჯებრაილის მიმართულებით შეტევა, რათა დაიბრუნონ დაკარგული პოზიციები. ღამით, მოწინააღმდეგის შეტევის ყველა მცდელობა, ცეცხლით აღვკვეთეთ“, – ნათქვამია აზერბაიჯანის თავდაცვის სამინისტროს პრესსამსახურის განცხადებაში.

ყარაბაღში ბრძოლების დაწყებიდან მე-15 დღე

• გუშინ, შუადღის 12 საათზე გამოცხადებული ზავის მიუხედავად, ორივე მხარე იტყობინება ყარაბაღსა და აზერბაიჯანის რაიონებში, დასახლებული პუნქტების დაბომბვის გაგრძელების შესახებ.

• ყარაბაღის ომბუდსმენმა მეორე ანგარიში მოამზადა აზერბაიჯანის შეიარაღებული ძლების ყარაბაღში მოქმედებების შესახებ, რომელიც 27 სექტემბრიდან 9 ოქტომბრამდე პერიოდს მოიცავს. საერთო ჯამში, დაიღუპა 20 მშვიდობიანი მოქალაქე, 101 – დაიჭრა.

• აზერბაიჯანის თავდაცვის სამინისტროს ცნობით, სომეხმა სამხედროებმა აზერბაიჯანში ქალაქი განჯა დაბომბეს, დაიღუპა 8 ადამიანი, 33 დაიჭრა.

• ერევანმა განაცხადა, რომ აზერბაიჯანელმა სამხედროებმა სარაკეტო დარტყმა მიაყენეს სომხეთში, სიუნიქის პროვინციაში ქალაქ კაპანს, არიან დაღუპულები და დაჭრილები. ბაქოში ეს ინფორმაცია კატეგორიულად უარყვეს.

• მოვლენების ეპიცენტრში ყარაბაღში მდებარე ქალაქი ჰადრუთი იყო. ბაქოს ინფორმაციით, აზერბაიჯანელმა სამხედროებმა მასზე კონტროლი დაამყარეს. სომხური მხარე ამას უარყოფს.

• ყარაბაღის ომბუდსმენის ცნობით, „აზერბაიჯანულმა დივერსიულმა ჯგუფმა ქალაქ ჰადრუთში, ქალი და მისი ინვალიდი შვილი მოკლა“. აზერბაიჯანში ეს ინფორმაცია უარყვეს.

• ყარაბაღის პრეზიდენტმა მოსახლეობას მიმართა და განაცხადა, რომ „არცახი არასოდეს არ იქნება აზერბაიჯანის ნაწილი“.

• ყარაბაღის საგარეო საქმეთა სამინისტრომ კიდევ ერთხელ მოუწოდა საერთაშორისო თანამეგობრობას ყარაბაღის დამოუკიდებლობის საერთაშორისო აღიარებისკენ და განაცხადა, რომ „მხოლოდ ასე არის შესაძლებელი აზერბაიჯანის, თურქეთისა და საერთაშორისო ტერორისტების სამმხრივი კავშირის შეჩერება“.

• აზერბაიჯანის პრეზიდენტმა განაცხადა, რომ „უკვე ხვალ“ მზად არის ეუთოს მინსკის ჯგუფის შუამავლობით, მოლაპარაკებების მაგიდასთან დასაჯდომად. მოლაპარაკებების შედეგებს ის ასე ხედავს: „სომხეთი უნდა შეეგუოს იმას, რომ ეს ტერიტორიები აზერბაიჯანს ეკუთვნის და აღარასოდეს აღარ ცდის მისი სამხედრო გზით წართმევას“.

• სომხეთის თავდაცვის მინისტრმა და სომხეთში წითელი ჯვრის საერთაშორისო კომიტეტის ხელმძღვანელმა სამხედრო ტყვეებისა და დაღუპულთა ცხედრების გაცვლის მექანიზმები განიხილეს, რომელიც კონფლიქტის მხარეებს შორის, წითელი ჯვრის საერთაშორისო კომიტეტის შუამავლობით უნდა განხორციელდეს.

• 10 ოქტომბრის ღამეს, მხარეებმა ზავის დადების გადაწყვეტილება მიიღეს. მოსკოვში, 2020 წლის 9-10 ოქტომბერს, აზერბაიჯანის, სომხეთისა და რუსეთის საგარეო საქმეთა მინისტრების სამმხრივ შეხვედრაზე, მთიან ყარაბაღში, საომარი მოქმედებების ზონაში, ცეცხლის შეწყვეტასა და სამშვიდობო მოლაპარაკებების ძველ ფორმატში გაგრძელებაზე შეთანხმდნენ.

• ახალი ამბები, ფოტო/ვიდეო ყარაბაღში მიმდინარე საბრძოლო მოქმედებებთან დაკავშირებით – 10 ოქტომბერი, 2020