სოხუმში აფხაზმა პოლიციელმა მემორიალურ სასაფლაოზე მანქანით გაიარა, რისთვისაც მას კამერის წინ ბოდიშის მოხდა მოუწია.
შემთხვევა 14-15 იანვრის ღამეს სოხუმის ცენტრში, დიდების პარკში მოხდა. აფხაზეთის შინაგან საქმეთა სამინისტროს საკუთრების დაცვის დეპარტამენტის თანამშრომელი ნაზარ კარდანოვი თავისი მანქანით, გაურკვეველი მიზეზების გამო, შეიჭრა ძმათა სასაფლაოსთან, შემოუარა მემორიალურ კომპლექსს, რომელზეც აფხაზეთის ომში დაღუპულების სახელებია ამოტვიფრული, კიბეები ჩაირბინა და ადგილი დატოვა.
ვანდალის ვინაობა მეორე დღესვე გაირკვა. მას რამდენიმე ეპიზოდისთვის აიძულეს ბოდიში მოეხადა.
ჯერ ნაზარ კარდანოვი ვეტერანთა ორგანიზაციების წარმომადგენლების წინაშე წარსდგა და მათ ბოდიში მოუხადა.
შემდეგ მან კამერის წინ ბოდიში მოუხადა დიდების პარკში დაკრძალული ჯარისკაცების ახლობლებს და აფხაზეთის ყველა მოქალაქეს.
და ბოლოს, ინტერნეტში გამოჩნდა ფოტო, რომელშიც კარდანოვი მემორიალის წინ დაჩოქილია და პატიებას ითხოვს.
გარდა ამისა, ვანდალი, რა თქმა უნდა, პოლიციამ სამსახურიდანაც გაათავისუფლა.
რუსეთისგან განსხვავებით, სადაც ეს უკვე ნორმად იქცა, აფხაზეთისთვის კამერის წინ საჯაროდ ბოდიშის მოხდა ძალიან იშვიათი მოვლენაა. კარდანოვის ბოდიში მხოლოდ მესამე ასეთი შემთხვევაა.
მსგავსი პრაქტიკა პირველად რამდენიმე წლის წინ გამოიყენეს, როცა სომეხმა მოზარდმა ქალაქ გაგრიდან აფხაზეთის სახელმწიფო დროშას ფეხი დააბიჯა.
მეორე ინციდენტი მოხდა კორონავირუსული პანდემიის დროს: ქალი ჩიოდა, რომ საავადმყოფოში არ იყო საკმარისი რაოდენობის თერმომეტრები, რის შემდეგაც მან ბოდიში მოიხადა.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
