ბელარუსში სახელმწიფო არხებს ჟურნალისტები ტოვებენ

ბელარუსში, პროტესტის მეოთხე დღეს, ქუჩაში, ხელკეტების, რეზინის ტყვიებისა და ცრემლსადენი გაზის გამოყენებით ადამიანების დაშლის გარდა, რამდენიმე ახალი მოვლენა მოჰყვა.

მინსკსა და ბელარუსის ბევრ სხვა ქალაქში, ათასობით ადამიანი საპრეზიდენტო არჩევნების შედეგების გაუქმებას მოითხოვს, როგორც ფალსიფიცირებულის და სკანდირებენ – „წადი!“ – ამით ისინი პრეზიდენტის პოსტზე ხელახლა არჩეულ ალექსანდრე ლუკაშენკოს მიმართავენ.

◾ იზრდება ინდუსტრიული საწარმოების რიცხვი, რომლებიც საყოველთაო გაფიცვას უერთდებიან. მათ შორის არის ისეთი მსხვილი ორგანიზაციები, როგორებიცაა მინსკის ტრაქტორების საწარმო და „ბელშინა“.

◾ ბელარუსის სახელმწიფო ტელევიზიიდან ხუთი წამყვანი, საპროტესტო აქციებზე მოქალაქეთა სასტიკი დარბევის გამო, პროტესტის ნიშნად წავიდა.

◾ სპეცრაზმელებმა და შსს-ს თანამშრომლებმა ფლეშმობი მოაწყვეს და საჯაროდ დაიწყეს საკუთარი ფორმების გადაყრა ძალოვანების ქმედებებისადმი უარყოფითი დამოკიდებულების ნიშნად.

◾ ადამიანები ცოცხალ ჯაჭვში დგებიან პროტესტისა და წინა დღეებში დაკავებულებისადმი სოლიდარობის ნიშნად. ბევრ ქალს თეთრები აცვია – ეს არის სვეტლანა ტიხანოვსკაიას კამპანიის ფერი, რომელიც არჩევნებზე, ლუკაშენკოს მთავარი კონკურენტი იყო.

პროტესტის მონაწილეებს ის არჩევნებში გამარჯვებულად მიაჩნიათ. ახლა, ტიხანოვსკაია ლიეტუვაში იმყოფება, რადგან ფიქრობს, რომ საფრთხე ემუქრება.

• „ლიდერი არ არის და ის არც არის საჭირო“ – შეტაკებები ბელარუსში, დღე მესამე

• სპეცრაზმი და გაძევებული ოპოზიციის ლიდერი – პროტესტის მეორე დღე ბელარუსში

• გადამწყვეტი საპრეზიდენტო არჩევნები ბელარუსში

◾ დაკავებულია, დაახლოებით, 5 ათასი ადამიანი. დაჭრილი, რომლებმაც სამედიცინო დაწესებულებებს მიმართეს – დაახლოებით, 500. ორი მოქალაქე დაიღუპა: ერთი რეზინის ტყვიით, მეორე კი დაკავების დროს გახდა შეუძლოდ.

◾ ადამიანები, რომლებსაც ციხეებიდან ათავისუფლებენ, ცემის, წამებისა და დაცინვის მრავალრიცხოვან შემთხვევებზე საუბრობენ. „ევრორადიომ“ დაამონტაჟა ორსაათიანი აუდიოჩანაწერის მოკლე ვერსია, როგორ იქცევა სპეცრაზმი მილიციის ფურგონში, სადაც ათობით დაკავებული შეყარეს.

ერთ-ერთმა მათგანმა ტელეფონის დამალვა მოახერხა და ყველაფერი ჩაიწერა, რაც თავს გადახდა. დამცირება, გინება, დარტყმა და მუქარა – მილიციის თანამშრომლები ძალაუფლებით სარგებლობენ, დაკავებულებს კი ადამიანებად არ მიიჩნევენ.

◾ ევროკავშირის, რამდენიმე ქვეყნის ხელმძღვანელი დაუყოვნებლივ სამიტის გამართვის მოწოდებით გამოვიდა, რათა განიხილონ ლუკაშენკოს რეჟიმის წინააღმდეგ სანქციების დაწესების საკითხი. სანქციების შესაძლო დაწესებისა და ნავთობის მიწოდების შეწყვეტის შესახებ განაცხადა აშშ-ის სახელმწიფო დეპარტამენტმაც.

◾ ლუკაშენკომ ძალოვან მინისტრებთან შეხვედრაზე, პროტესტის მონაწილეებს „კრიმინალური წარსულის მქონე უსაქმურები“ უწოდა.