აზერბაიჯანში ვარჯიშის დროს ბავშვი ცემით მოკლეს. ვინ არის პასუხისმგებელი
მწვრთნელმა 7 წლის ბავშვი მოკლა
პირველ მაისს, საღამოს, აზერბაიჯანის სოციალური ქსელები შეძრა ვიდეომ, რომელშიც მწვრთნელი სამბოს ვარჯიშის დროს, 7 წლის ბიჭს სასიკვდილოდ სცემს. მიუხედავად იმისა, რომ შემთხვევა ერთ-ერთ საჯარო სკოლაში მოხდა, აზერბაიჯანის მეცნიერებისა და განათლების სამინისტრომ პასუხისმგებლობა მხოლოდ მწვრთნელს დააკისრა. ბავშვთა უფლებების დამცველი ორგანიზაციები აცხადებენ, რომ სპორტული დარბაზები, სადაც ბავშვები სპორტით არიან დაკავებული, სახელმწიფოს მხრიდან სრულიად უკონტროლოა და იქ ბავშვთა მიმართ ძალადობა ძალიან ხშირია.
- “მშობლებმა არ იციან როგორ ელაპარაკონ შვილებს”. ანიმაციური გმირები სექსუალური განათლებისთვის
- ბაქოს ბავშვთა სახლის მოსწავლე კრიტიკისთვის ფსიქიატრიულ საავადმყოფოში მოათავსეს
რა მოხდა?
![](https://jam-news.net/app/uploads/2023/05/ferid-bakarov.jpg)
შემთხვევა 29 აპრილს ქალაქ სუმგაითში, მე-19 საშუალო სკოლის სპორტდარბაზში მოხდა.
გავრცელებულ კადრებში ჩანს მწვრთნელის, მეჰმან ხალილოვის აგრესიული ქცევა მცირეწლოვანი ბავშვების ჯგუფის მიმართ ვარჯიშის დროს. ხალილოვი განსაკუთრებით სასტიკია ერთ-ერთი ბავშვის მიმართ – 7 წლის ფარიდ ბაკაროვის. ის ტატამზე დაცემულ ბავშვს თმით მიათრევს, თავით სწევს, იატაკზე აგდებს და ისევ ხელში იჭერს – როცა ბავშვი ადგომას ვეღარ ახერხებს, წიხლებს ურტყამს.
ამ ყველაფრის შემდეგ, უგონო მდგომარეობაში ბავშვი საავადმყოფოში გადაიყვანეს. მწვრთნელმა ბიჭის მშობლებს დაურეკა და უთხრა, რომ ბავშვი დაეცა და დაშავდა; სიმართლე მხოლოდ სათვალთვალო კადრების გავრცელების შემდეგ გაირკვა.
სამართალდამცავმა ორგანოებმა აღძრეს სისხლის სამართლის საქმე აზერბაიჯანის რესპუბლიკის სისხლის სამართლის კოდექსის 126.3 მუხლით (სხეულის განზრახ მძიმე დაზიანება გაუფრთხილებლობით, რამაც გამოიწვია სიკვდილი). ხალილოვს წინასწარი პატიმრობა შეეფარდა.
ექიმების დასკვნა
სუმგაითის სამედიცინო ცენტრის საზოგადოებასთან ურთიერთობის სამსახურის ინფორმაციით, ბავშვის მდგომარეობა საავადმყოფოში მიყვანის დროს მძიმე იყო.
„პაციენტი გადაუდებელი დახმარების განყოფილების წითელი ზონის გავლით რეანიმაციულ განყოფილებაში გადაიყვანეს. ის უგონო მდგომარეობაში იყო. პაციენტი გასინჯეს მორიგე ქირურგმა და მორიგე ტრავმატოლოგმა. გამოკვლევისას ორივე წინამხრის ზედა 1/3-ზე დიდი სისხლჩაქცევები დაფიქსირდა, ასევე დაფიქსირდა სხვადასხვა ზომის სისხლჩაქცევები ორივე ქვედა კიდურზე, ზურგის არეში.“
საავადმყოფოში განაცხადეს, რომ ექიმების მცდელობის მიუხედავად, ერთი საათის შემდეგ ბავშვი გარდაიცვალა. გაკვეთის შედეგად დადგინდა, რომ გარდაცვალების მიზეზი იყო თავის არეში მიყენებული დაზიანება, სავარაუდოდ კომა და სუნთქვის უკმარისობა.
მეცნიერებისა და განათლების სამინისტროს განცხადება
ტრაგედიის შესახებ მეცნიერებისა და განათლების სამინისტრომ ორი განცხადება გაავრცელა, ორივეში ნათლად ჩანს, რომ ბავშვის გარდაცვალებაზე პასუხისმგებლობას სახელმწიფო არ იღებს.
სამინისტროს ცნობით, საგანმანათლებლო დაწესებულებებში დანერგილია მხარდაჭერის მექანიზმები, რათა დაიცვას ბავშვების ინტერესები. ვინაიდან მეჰმან ხალილოვი ასევე არის არაერთი პრესტიჟული ეროვნული და საერთაშორისო სპორტული ტურნირის გამარჯვებული, მას შეექმნა შესაძლებლობა ემუშავა სამბოს მწვრთნელად სკოლაში.
სამბოს ფედერაციის განცხადება
„მეჰმან ხალილოვი არის ევროპის ჩემპიონატის სამგზის გამარჯვებული, ევროპული თამაშების ბრინჯაოს მედალოსანი. მას ყოველთვის ირჩევდნენ გუნდის ლიდერად სანიმუშო ქცევის გამო. ის ყოველთვის პატივს სცემდა სამწვრთნელო შტაბს. მისგან ამას ვერასდროს წარმოვიდგენდით. ვიდეოს ყურების შემდეგ ვერ ვიჯერებდი, რომ ასე არაადამიანურად მოიქცა“, – განაცხადა აზერბაიჯანის სამბოს ფედერაციის პრეზიდენტმა ჯეიჰუნ მამედოვმა.
ფედერაციის ხელმძღვანელობა არ მიიჩნევს მართებულად ფედერაციის სახელის ხსენებას ძალადობის ინციდენტში, რამაც გამოიწვია არასრულწლოვნის სიკვდილი:
„ინციდენტი ეროვნული ნაკრების ვარჯიშის დროს არ მომხდარა. ჩვენ არ ვართ პასუხისმგებელი ჩვენი სპორტსმენების ქმედებებზე ეროვნული ნაკრების გარეთ. ამ შემთხვევაში ეს საკითხი ჩვენ არ გვეხება. რაც შეეხება სამწვრთნელო საქმიანობას, ლიცენზია არ გაგვიცია.“
ჯეიჰუნ მამედოვის განცხადებით, მეჰმან ხალილოვი ნაკრებიდან გარიცხულია.
რას ამბობს ბავშვის ოჯახი?
გარდაცვლილი არასრულწლოვნის მამის, ევაზ ბაკაროვის თქმით, შემთხვევის დროს მისი მეორე ვაჟიც ვარჯიშზე იმყოფებოდა. მეტიც, ამ დროს სკოლის ეზოში იმყოფებოდა ბავშვის დედაც.
„სავარჯიშო ოთახში ხმაური იყო, დედამ გაიგო და ორჯერ შევიდა შიგნით, მაგრამ მწვრთნელმა ლამის დედაც სცემა. მან დაუყვირა: “ნუ ზრდით კაცს ქალივით!”- განუცხადა ჟურნალისტებს ევაზ ბაკაროვმა.
„ბოლომდე ვიბრძოლებთ. ის ციხიდან ვეღარ გამოვა. მინდა, რომ უმკაცრესად დაისაჯოს. ვთხოვ შესაბამის ორგანოებს და სამართალდამცავ ორგანოებს დამეხმარონ.“ – განაცხადა მან.
ექვსი საჩივარი ორ თვეში
კამალია აშუმოვამ, სოციალური ინიციატივების მომავლის საზოგადოებრივი გაერთიანების აღმასრულებელმა დირექტორმა, საინფორმაციო სააგენტო Turan-თან ინტერვიუში განაცხადა, რომ კლუბები და სპორტული დარბაზები, სადაც ბავშვები ვარჯიშობენ, არ არის სახელმწიფო კონტროლის ქვეშ.
„განათლების თუ სპორტის სფეროში, ჩვენ არაერთხელ გვითქვამს ხაზგასმით, რომ ბავშვებთან მომუშავე ადამიანებმა უნდა გაიარონ ტესტი და აიღონ ე.წ. ფსიქო. ფსიქოლოგიური ინტერვიუები არ უნდა შემოიფარგლოს ნახევარსაათიანი საუბრებით – ამ ადამიანების ქცევა დეტალურად უნდა იქნას შესწავლილი. მხოლოდ ამის შემდეგ შეეძლებათ მათ ბავშვებთან კონტაქტის და კომუნიკაციის უფლება.
ახლა ყველას შეუძლია გახსნას კლუბები, სადაც ბავშვებს შეუძლიათ სპორტით დაკავდნენ. რამდენად იციან მათ ბავშვების უფლებების შესახებ, გაივლიან თუ არა ისინი სპეციალურ ტრენინგს? ვერ! ისინი უბრალოდ გადასცემენ სპორტულ უნარებს ბავშვებსა და ახალგაზრდებს, ორიენტირებულნი არიან მხოლოდ ვარჯიშზე. მათზე კონტროლი არ არის. ოფიციალური ლიცენზირება არ არსებობს“.
კამალი აშუმოვას თქმით, ეს შემთხვევა პირველი არ არის. მან აღნიშნა, რომ ბოლო ორი თვის განმავლობაში „ბავშვთა ცხელ ხაზზე“ ექვსი მიმართვა შევიდა.
„ჩვენ საჩივრები გავუგზავნეთ შესაბამის ორგანოებს, მაგრამ არ ვიცით რა შედეგები მოჰყვა – არ გვეუბნებიან. ერთ-ერთი ბოლო შემთხვევა იყო თანატოლის მიერ სპორტდარბაზში 16 წლის ბიჭის დანით დაჭრა.” – განაცხადა მან.