"საქართველოში დემოკრატიის უკუსვლა შემაშფოთებელია" - აშშ-ს სენატის საგარეო კომიტეტის სხდომა

აშშ-ს სენატის საგარეო კომიტეტის სხდომა

აშშ-ს სენატის საგარეო საქმეთა კომიტეტის სხდომაზე, ევროპულ და ევრაზიულ საკითხებში სახელმწიფო მდივნის თანაშემწემ, კარენ დონფრიდმა განაცხადა, რომ “ის, რასაც ბოლო პერიოდში ვხედავთ, ჩვენთვის ძალზე შემაშფოთებელია, რადგან ვნახეთ დემოკრატიის უკუსვლა საქართველოში”. დონფრიდმა ასევე ისაუბრა საქართველოში დემოკრატიული პროგრესის ნაკლებობაზე და შეეხო საქართველოში აშშ-ს ელჩ კელი დეგნანზე თავდასხმებს.

მისივე თქმით, აშშ მზად არის ევროკავშირთან ერთად დაეხმაროს საქართველოს, გაატაროს კანდიდატის სტატუტის მისაღებად საჭირო რეფორმები და იმედს გამოთქვამს, რომ ამ მიმართულებით საქართველოში პროგრესი იქნება.

ევროპულ და ევრაზიულ საკითხებში სახელმწიფო მდივნის თანაშემწე შეეხო “ქართული ოცნებიდან” გამიჯნულ დეპუტატებსაც, რომლებმაც მოძრაობა “ხალხის ძალა” დააფუძნეს და რომლებიც პერმანენტულად აკრიტიკებენ ამერიკის შეერთებული შტატების ელჩს საქართველოში კელი დეგნანს. დონფრიდის თქმით, კელი დეგნანი არის საქართველოში აშშ-ს დაუჯერებლად კარგი წარმომადგენელი და მას ნებისმიერ დროს აშშ მხარს დაუჭერს:

“ამის შესახებ საქართველოს მთავრობასა და პრემიერმინისტრს ვესაუბრეთ. მიუხედავად იმისა, რომ ეს ჯგუფები არ არიან მთავრობის ნაწილი, ზოგიერთ მათგანს, რომელიც უსამართლოდ აკრიტიკებს ელჩს, აქვს მჭიდრო კავშირი ხელისუფლებასთან და ჩვენ ხაზი გავუსვით, რომ ეს კრიტიკა ძირს უთხრის ჩვენს პარტნიორობას.”

კარენ დონფრიდის თქმით, აშშ მოუწოდებს საქართველოს, გაატაროს ევროკავშირის წევრობის კანდიდატის სტატუსის მისაღებად საჭირო რეფორმები. ამერიკელი მაღალჩინოსანი ხაზს უსვამს, რომ ამერიკელი ხალხი დიდი ხანია სოლიდარობას გამოხატავს ქართველების სურვილის მიმართ, იყვნენ “თავისუფალი, დემოკრატიული და სუვერენული ქვეყანა მის საერთაშორისოდ აღიარებულ საზღვრებში.” მისი განმარტებით, ბოლო 30 წლის განმავლობაში საქართველო და აშშ გახდნენ სტრატეგიული პარტნიორები და მუშაობენ ევროატლანტიკური ქვეყნების ოჯახში საქართველოს სრულად ინტეგრირებისთვის.

“შეერთებულმა შტატებმა 6 მილიარდ დოლარზე მეტი გამოყო საქართველოსთვის დახმარების სახით, ათასობით ქართველი გაგზავნა შეერთებულ შტატებში კულტურული და საგანმანათლებლო გაცვლით პროგრამებში მონაწილეობისთვის და ათიათასობით ქართველი ჯარისკაცი გაწვრთნა საქართველოს ტერიტორიის დასაცავად და მის საზღვრებს გარეთ მშვიდობისა და სტაბილურობის ხელშეწყობისთვის. აშშ-ის დახმარება ხელს უწყობს დემოკრატიულ მმართველობას, კანონის უზენაესობას, ენერგიულ სამოქალაქო საზოგადოებას და ეკონომიკურ ზრდას და ჩვენ კვლავ მოვუწოდებთ საქართველოს მთავრობას, გაატაროს აუცილებელი რეფორმები ევროკავშირის კანდიდატის სტატუსის მოსაპოვებლად.” – აღნიშნა კარენ დონფრიდმა.

● კელი დეგნანი: დამაბნეველია მთავრობის დამოკიდებულება მათ მიმართ, ვინც პარტნიორობას ძირს უთხრის
●ადამ კიზინგერი: რუსული პროპაგანდაა, როცა მესმის, რომ აშშ საქართველოს ომში ჩათრევას ცდილობს
● გადაწყვეტილება მიღებულია: უკრაინას და მოლდოვას კანდიდატის სტატუსი მისცეს. საქართველოს – მხოლოდ პერსპექტივა

13 ივლისს ცნობილი გახდა, რომ ევროკომისია საქართველოსთვის ევროკავშირის მიერ გაწერილი 12 პუნქტის შესრულების შესახებ შეფასებას 2022 წლის ნაცვლად, 2023 წლისთვის მოამზადებს. ამის შესახებ ევროპარლამენტში გამოსვლისას ევროკომისიის წარმომადგენელმა, მაიკლ რუპმა ისაუბრა.

ევროკომისიამ საქართველოს, უკრაინისა და მოლდოვის ევროკავშირის წევრობის კანდიდატის სტატუსის მინიჭების საკითხზე 17 ივნისს დასკვნა მოამზადა. შედეგად, უკრაინა და მოლდოვა მიიღებენ ევროკავშირის კანდიდატობის სტატუსს და დაეკისრებათ გარკვეული ვალდებულებების შესრულება, ხოლო საქართველოს ჯერ 12 პუნქტიანი გეგმის და პირობების შესრულება დაევალება, შემდეგ კი კანდიდატობის სტატუსის მიღების შანსი ექნება.

რაც შეეხება ამერიკის ელჩ კელი დეგნანს, მასზე თავდასხმები მას შემდეგ გააქტიურდა, რაც მმართველი პარტია სამმა დეპუტატმა დატოვა და მოგვიანებით მოძრაობა “ხალხის ძალა” დააფუძნა. დეპუტატებს მიაჩნიათ, რომ ე.წ. კულისებიდან პოლიტიკური ფაქტებისა და მოვლენების შესახებ მეტი ინფორმაცია უნდა ვრცელდებოდეს და ამის “გახმოვანებისთვის მათ თავისუფალი საპარლამენტო მანდატი სჭირდებათ”, რადგან გუნდის შიგნით შესაძლოა, უხერხულობები შეექმნათ.

გამიჯნულმა დეპუტატმა მიხეილ ყაველაშვილმა გამოაქვეყნა ღია წერილი ამერიკის ელჩის მიმართ, რომელშიც დეპუტატი კელი დეგნანს მოუწოდებს, ამერიკის იმიჯის დასაცავად “ნაციონალური მოძრაობის” პროვოკაციებსა და ტექნიკური მთავრობის მოთხოვნებს საჯაროდ გაემიჯნოს. წერილის გამოქვეყნების შემდეგ, კელი დეგნანმა მმართველ პარტიას ჰკითხა: რა მოტივი გაქვთ?

22 ივლისს კი დეპუტატებმა აშშ-ს სახელმწიფო დეპარტამენტის სპიკერს, ნედ პრაისს მიმართა. მათი თქმით, მათ არ უნდათ რომ “ქვეყნები” უხეშად ერეოდნენ “შიდა საქმეებში.” დეპუტატების ეს განცხადება მოჰყვა აშშ-ის სახელმწიფო დეპარტამენტის სპიკერის, ნედ პრაისის მიერ გამოხატულ მხარდაჭერას საქართველოში აშშ-ის ელჩის, კელი დეგნანის მიმართ.  

საქმე იქამდე მივიდა, რომ ამერიკის ელჩზე მოსამართლეებმაც გაილაშქრეს. ნიკა გვარამიას საქმის მოსამართლის, ლაშა ჩხიკვაძის მტკიცებით, აშშ-ს საელჩოს თანამშრომელმა კევინ ბურკმა მას უთხრა, რომ კელი დეგნანს აინტერესებდა, რატომ მიიღო გამამტყუნებელი განაჩენი გვარამიას საქმეზე და განსაკუთრებით, რატომ გამოიყენა სასჯელად თავისუფლების აღკვეთა.

ჩხიკვაძის განცხადებას მალევე შეუერთდნენ იუსტიციის უმაღლესი საბჭოს ყოფილი წევრებიც. სამი მოსამართლე – ზაზა ხარებავა, შოთა ქადაგიძე და ლევან გზირიშვილი სოლიდარობას უცხადებენ მოსამართლე ლაშა ჩხიკვაძეს და ამბობენ, რომ აშშ-ს საელჩო კონკრეტული მოსამართლის დამოუკიდებლობაში ერევა, რაც სხვა მოსამართლეებზე “ირიბი” ზეწოლის მაგალითია.

აღსანიშნავია ისიც, რომ “ქართული ოცნება” და თანამდებობა ერთმანეთის მიყოლებით რამდენიმე რეგიონულმა ჩინოვნიკმაც დატოვა და დიმიტრი ხუნდაძეს, მიხეილ ყაველაშვილს და სოზარ სუბარს შეუერთდა. პარტიიდან გასული დეპუტატები, ისევე როგორც საქართველოს პარლამენტის წევრი მიხეილ ყაველაშვილი, ამერიკის ელჩს, კელი დეგნანს უპირისპირდებიან.