აშშ-ის საელჩო: პომპეო ყურადღებას გაამახვილებს სამართლიანი არჩევნების მნიშვნელობაზე
ამერიკის შეერთებული შტატების საელჩო საქართველოში მაიკ პომპეოს ვიზიტის დაწყებას სოციალურ ქსელში ეხმაურება და აღნიშნავს, რომ სახელმწიფო მდივანი კიდევ ერთხელ გამოხატავს მხარდაჭერას საქართველოს ტერიტორიული მთლიანობის მიმართ და ყურადღებას გაამახვილებს სამართლიანი, თავისუფალი არჩევნების მნიშვნელობაზე.
● საქართველოში აშშ-ის ჯარის განთავსების თხოვნით პომპეოს თავდაცვის ყოფილი მინისტრები და ექსპერტები მიმართავენ
საელჩოს განცხადებაში ნათქვამია, რომ პომპეო განიხილავს საქართველოს დემოკრატიული ინსტიტუტების გაძლიერებისთვის ძალისხმევას. ამასთანავე, ” სახელმწიფო მდივანი ყურადღებას გაამახვილებს თავისუფალი და სამართლიანი არჩევნების მნიშვნელობაზე”
განცხადებაში ასევე ვკითხულობთ: “სახელმწიფო მდივანი აქ იმყოფება იმისთვის, რომ კიდევ ერთხელ გაუსვას ხაზი შეერთებული შტატების მტკიცე მხარდაჭერას საქართველოს სუვერენიტეტისა და ტერიტორიული მთლიანობის მიმართ, ასევე, ჩვენი საერთო ღირებულებების, თავისუფლებისა და დემოკრატიისადმი ერთგულებას.”
მაიკ პომპეო საქართველოს დღეს, 17 ნოემბერს ეწვია. ვიზიტი სახელმწიფო მდივნის ტურნეს ფარგლებში გაიმართა. საქართველომდე პომპეო ვიზიტით იმყოფებოდა საფრანგეთში და თურქეთში.
მის ჩამოსვლას საქართველოში ოპოზიციის აქცია მოჰყვება. აქცია ოპერის შენობიდან მელიქიშვილის გამზირის მიმართულებით, 18 ნოემბერს, 2 – მეტრიანი დისტანციის დაცვით, მდუმარედ გაიმართება და ყოველ ადამიანს, ვინც მივა, მდუმარე პროტესტისთვის სტიკერი მიეცემა, რომელსაც ეწერება: “გაყალბებულია”. სტიკერს დააფენს, დადგება, დაიჭერს შესაბამის პლაკატს, ასევე იქნება საქართველოს და ამერიკის დროშები.
● აშშ-ის სახელმწიფო მდივანი მაიკ პომპეო საქართველოშია
● ამერიკის ყოფილი ელჩი იან კელი: პომპეო მხოლოდ მთავრობას ხვდება, ეს შეცდომაა
