აქტიური დასვენების ხუთი ხერხი „საირმისგან“

აქტიური დასვენება საირმეში

შვებულების თუ შაბათ-კვირის საინტერესოდ გასატარებლად ბევრი სხვადასხვა გზა არსებობს. ზოგს აუზთან გარუჯვა ურჩევნია, ზოგს ძველი ქალაქების ქუჩებში ხეტიალი, სხვები კი ხურჯინაკიდებულები მთებს ლაშქრავენ. რა ტიპის დასვენებაც არ უნდა აირჩიოთ, მთავარია, ის იყოს თქვენზე მორგებული და გსიამოვნებდეთ.

თუმცა, თუ მიზანი ძალების მაქსიმალურად სწრაფად აღდგენაა, მაშინ აქტიური დასვენებაა ის, რაც აუცილებლად გჭირდებათ. აქტიური დასვენების დროს სხეული მუდმივად  ტონუსშია, შედეგად ორგანიზმი გამოყოფს სეროტონინს – ბედნიერების ჰორმონს, რომელსაც გაუცნობიერებელი სიხარულის განცდა მოაქვს.

დღეს დასვენება სხვადასხვა აქტივობების გარეშე უკვე წარმოუდგენელია. ტურისტული ობიექტები სულ უფრო მეტ რესურსს დებენ აქტიური და ექსტრემალური დასვენების განვითარებაში. საქართველოს ამ თვალსაზრისით დიდი პოტენციალი აქვს – შეუზღუდავი ბუნებრივი მახასიათებლების წყალობით, ქვეყანაში აქტიური ტურიზმის ყველა სახეობა ვითარდება – მთამსვლელობა, კლდეზე ცოცვა, ლაშქრობები ფეხით თუ ველოსიპედით, ზიპლაინი, ჯომარდობა და ა.შ.

ქვეყნის ერთ-ერთი ლიდერი კურორტი – „საირმე“, რომელიც პირველ რიგში სამკურნალო და თერმული წყლებითაა განთქმული, ერთ-ერთ მთავარ პრიორიტეტად სწორედ აქტიური დასვენების სახეობების განვითარებას მიიჩნევს.   

აქ მოგიყვებით, კონკრეტულად რას სთავაზობს „საირმე“ აქტიური დასვენების მოყვარულებს:

ზიპლაინი

საირმეში 800 მეტრიანი ზიპლაინია, რომელიც 120 მეტრ სიმაღლეზე გადმოჰყურებს მთელ კურორტს. აქედან დაშვება დიდი თავგადასავალია – გზად დაუვიწყარ პეიზაჟებს გაივლით. ზიპლაინი კარგი საშუალებაა დაუმტკიცოთ საკუთარ თავს, რომ შიშების და ფობიების გადალახვა შეგიძლიათ.

სასროლეთი

ასე ჰქვია „საირმეში“ ერთ-ერთ ყველაზე პოპულარულ ადგილს. ბერეტას ტიპის ბრიტანული სანადირო თოფიდან თეფშების მიმართულებით სროლა იმდენად აზარტული საქმიანობაა, რომ იქ ზოგი სწორედ ამისთვის ჩადის. სროლა ხუთი სხვადასხვა პოზიციიდან შეიძლება.

თოკების ქალაქი

საირმის თოკების ქალაქი ორსართულიანი კონსტრუქციაა. ხშირად აქ შეჯიბრებები იმართება სხვადასხვა ჯგუფებს შორის. აქაურობა განსაკუთრებით მათ მოეწონებათ, ვინც დასასველებლად ბევრ მეგობართან, დიდ ოჯახთან ან ჯგუფთანაა ჩამოსული. იდეალურია კორპორაციული შეჯიბრებებისთვის.

სასეირნო ადგილები – ფეხით,  ველოსიპედით ან საერთოდაც – ცხენით

თანამედროვე ინფრასტრუქტურასთან ერთად, საირმე არის კურორტი, რომელიც მრავალ ჰექტარზე გადაჭიმული შერეული ტყითაა გარშემორტყმული _ ნაძვი, ურთხელი, წიფელი, ცაცხვი, წაბლი, თელა. ასწლოვანი ხეების სიმაღლე აქ 50 მეტრს აჭარბებს. საირმეში ბევრი უცნობი, მიუვალი დამისტიკური ადგილია აღმოსაჩენი. აქაურობა იდეალურია ბუნებასთან დასაახლოებლად.  ველოსიპედი ამ სკუტერი შეგიძლიათ სასტუმროშივე იქირაოთ.

თუ უფრო რომანტიკულ ხასიათზე ხართ, ცხენით შეგიძლიათ გაისეირნოთ. საამისოდ საირმეში ორი ჯიშიანი ულაყი ჰყავთ.

ოფ როუდ ტური

ეს ახალი აქტივობაა, რომელიც საირმეს ახლახანს დაემატა. ოფ როუდ ტურში მონაწილეები ბაგებით (კვადროციკლის ტიპის მანქანები) ორ მარშრუტზე იმოძრავებენ: პირველი მარშრუტი ერთ საათიანია, სხვადასხვა დაბრკოლებებით დატვირთული; მეორე გზა კი – ორსაათიანი ტურია ალპურ ზონაში.

აქტიური დასვენება საირმეში