პოლიციამ ძალის გამოყენებით დაშალა თბილისის ცენტრში მიმდინარე აქცია. დააკავეს 16 ადამიანი
აქციის დაშლა ჭავჭავაძის გამზირზე
19 ნოემბერს, გამთენიას, პოლიციამ და სპეცრაზმმა ძალის გამოყენებით დაშალა თბილისში, ჭავჭავაძის გამზირზე მიმდინარე მშვიდობიანი აქცია. მცდელობას, აქციის მონაწილეები სხვა ტერიტორიაზე გადაეყვანათ, დაპირისპირება მოჰყვა.
შეხლა-შემოხლისას პოლიციამ 16 ადამიანი დააკავა, მათ შორის, ქალებიც. ვიდეოკადრებში ჩანს, რომ პოლიციელები მომიტინგეებს სასტიკად უსწორდებიან. მუშობაში ხელი შეუშალეს არაერთ ჟურნალისტს. მათ შორის, ერთ-ერთი – “მთავარი არხის” ოპერატორი, ცემეს და დააკავეს კიდეც.
ათასობით პოლიციელი და სპეციალური საპოლიციო ძალების წარმომადგენელი ჭავჭავაძის გამზირზე, რომელიც 17 ნოემბრიდან იყო გადაკეტილი, გამთენიას გამოჩნდა. აქციის მონაწილეებს, რომლებიც საპარლამენტო არჩევნებს გაყალბებულად მიიჩნევენ და ხელახალ არჩევნებს მოითხოვენ, ამ ტერიტორიაზე კარვები ჰქონდათ გაშლილი.
სამართალდამცველებმა აქციის მონაწილეებს რამდენიმე მხრიდან შეუტიეს. მათ შორის, სახელმწიფო უნივერსიტეტის შენობის ეზოდან. პოლიციამ კარვები აიღო და აქციის მონაწილეები იძულებით გაიყვანა მელიქიშვილის გამზირზე.
მცდელობას, აქციის მონაწილეებს ქუჩის სხვა ნაწილში გადაენაცვლებინათ, დაპირისპირება მოჰყვა. პოლიციამ მათი ძალადობრივი დაკავება დაიწყო.
კადრებში, რომლებსაც ჟურნალისტები და აქციის მონაწილეები ავრცელებდნენ, ჩანს, რომ აკავებდნენ ერთ-ერთ არასრულწლოვანსაც. ის სავარაუდოდ დედამ გამოგლიჯა პოლიციას.
მელიქიშვილის გამზირზე მიმდინარე საპროტესტო აქციისას დააკავეს „მთავარი არხის“ ოპერატორი სერგი ბარამიძეც. იგი საპროტესტო აქციას აშუქებდა. ოპერატორის დაკავების კადრები ტელეკომპანია “მთავარმა” გაავრცელა. არხი წერს, რომ სამართალდამცავებმა ოპერატორზე იძალადეს, დაამტვრიეს მისი კამერა. დაკავებიდან ორ საათში ოპერატორი ხელწერილის საფუძველზე გაათავისუფლეს.
“ვიღებდით დაკავების კადრებს და ამ დროს მოხდა რაღაც შეხლა-შემოხლა პოლიციასთან… თქვენ არღვევდითო წესს, ხელს გვიშლიდითო, [გზის] სავალ ნაწილზე იყავითო გადმოსული… აქტივისტი ხომ არ ვარ, მე ვარ ოპერატორი. ჩვეულებრივად ვიღებდი ამბებს, რატომ ადაწყვიტეს ჩემი დაკავება წარმოუდგენელია, არ ვიცი“, – ამბობს ოპერატორი.
ოპერატორს თვალი აქვს ჩალურჯებული. იგი ამბობს, რომ დაკავებისას მას ურტყეს:
“ტანზე სულ გახდილი ვიყავი, კურტკაც გამხადეს რომ მაკავებდნენ. ისე მოხდა, რომ კამერა აღარ აღმოჩნდა ჩემთან ერთად. პოლიციის განყოფილებაში გადაყვანის შემდეგ [ძალადობა არ ყოფილა], უბრალოდ ხელწერილი დამაწერინეს, რომ უნდა გამოცხადდე როცა დაგიბარებთ და მეტი არაფერი“.
ორგანიზაცია “მედიის, ინფორმაციისა და სოციალური კვლევის ცენტრის” ალერთის მიხედვით, აქციის დაშლისას მუშაობაში ხელი შეუშალეს აგრეთვე OC Mediaს ჟურნალისტს მარიამ ნიკურაძეს. მას წაართვეს მობილური ტელეფონი, რომლითაც ადამიანების დაკავების კადრებს იღებდა. ასევე, გადაღების საშუალება არ მისცეს “ნეტგაზეთის” კორესპონდენტს გივი ავალიანს. “პუბლიკის“ ჟურნალისტს მინდია გაბაძეს კი ფიზიკური შეურაცხყოფა მიაყენეს.
“ერთიანობა ნაციონალური მოძრაობის” ერთ-ერთმა ლიდერმა გიორგი ვაშაძემ განაცხადა, რომ პოლიციის მაღალჩინოსნებმა მისი და ნიკა მელიას დაკავებაც სცადეს.
ამ დროისთვის ცნობილია, რომ დაკავებულებს შორის არიან ოპოზიციური კოალიციის “ცვლილებები საქართველოსთვის” წევრები. ერთ-ერთ მათგანს, ნიკა კვიტატიანს, საავადმყოფოში გადაყვანა დასჭირდა.
ასევე, უკვე ცნობილია, რომ “მთავარი არხის” ოპერატორთან ერტად გაათავისუფლეს კიდევ ორი დაკავებული, ორი ქალი. მათ შორის, ერთ-ერთი მაია გოგიძე, საქართველოს პარლამენტის „ლელოს“ პოლიტიკური ჯგუფის აპარატის თანამშრომელი
ახალგაზრდა იურისტთა ასოციაციის თავმჯდომარის, ნონა ქურდოვანიძის ინფორმაციით, ამ დროისთვის არასამთავრობო ორგანიზაციების ერთიან ცხელ ხაზზე 12 დაკავებულის შესახებ შევიდა ინფორმაცია.
„ადვოკატები მათი ადგილსამყოფლის დადგენას ცდილობენ, არავის დავტოვებთ ადვოკატის დახმარების გარეშე“, – წერს ქურდოვანიძე.
არასამთავრობო ორგანიზაციების ცხელი ხაზის ნომერია: 577070563.
შინაგან საქმეთა სამინისტრომ ონლაინგამოცემა “პუბლიკას” 16 ადამიანის დაკავება დაუდასტურა, მათგან 3 ხელწერილით უკვე გათავისუფლებულია.
როგორც ოპოზიციის ლიდერები აღნიშნავენ, პროტესტი არ ჩერდება და ამ ეტაპზე ის გადაიზრდება „მობილურ პროტესტში”. ამ ეტაპზე პროტესტი გრძელდება მელიქიშვილის გამზირზე.
“გავიმეორებ წესებს, წესი ნომერი ერთი: არ ვაძლევთ დაჭერის შესაძლებლობას, ვხედავთ როგორ თავხედურად კანონგარეშე იქცევიან; მეორე, ვიჭერთ დისტანციას პოლიციასთან, თუ მოიწევენ ჩვენკენ ჩვენც გადავადგილდებით, ჩერდებიან ჩვენც ვჩერდებით. მელიქიშვილი არის დაკეტილი ფაქტობრივად, ჩვენი მიზანი ისევ მიღწეულია პოლიციის ხელით, ანუ თვითონ პოლიცია იძულებულია იდგეს აქ, გამოიფიტოს, დაიღალოს“, – ამბობს კოალიციის “ერთიანობა – ნაციონალური მოძრაობის” ერთ-ერთი ლიდერი, გიორგი ვაშაძე.
აქციის დაშლა ჭავჭავაძის გამზირზე
