საია: აქციებზე ქიმიური საშუალებების გამოყენება უკანონო და საფრთხისშემცველი იყო
აქციებზე ქიმიური საშუალებების გამოყენება
“ახალგაზრდა იურისტთა ასოციაციის” თავმჯდომარის, ნონა ქურდოვანიძის თქმით, 2024 წლის ნოემბერ-დეკემბერში, მშვიდობიანი დემონსტრანტების წინააღმდეგ, “ქართული ოცნების” მიერ ქიმიური საშუალებების გამოყენება უკანონო და ჯანმრთელობისთვის საფრთხის შემცველი იყო.
რას ამბობს ნონა ქურდოვანიძე
“მათ შორის ერთ-ერთი, რომელზეც დღეს გვინდა ვისაუბროთ, იყო ქიმიური საშუალება, რომელიც ცალკეულ შემთხვევებში შერეული იყო ცრემლსადენ გაზსა და წყლის ჭავლში და ეს მის ეფექტს კიდევ უფრო მძაფრს ხდიდა. ჩვენ შევეცადეთ, ამასთან დაკავშირებით დამატებითი ინფორმაცია გაგვერკვია.
პირველივე დღეებიდან, როდესაც ეს გამოიყენებოდა, საზოგადოებას ჰქონდა ინფორმაცია თვითონ დაზარალებულების მხრიდან იმ ეფექტის შესახებ, რომელსაც განიცდიდნენ ამ ნივთიერებების ზემოქმედების შედეგად. ისინი საუბრობდნენ, განსაკუთრებით იმაზე, რომ ჯანმრთელობის დაზიანება მოჰყვა შედეგად სწორედ ამ ნივთიერების შესუნთქვას, ან მის კვალს. აქედან გამომდინარე, ჩვენ დავინტერესდით, კონკრეტულად რა საშუალების გამოყენება ხდებოდა და შსს ვალდებული იყო, რომ ეს თავადაც გაესაჯაროებინა, თუმცა ეს არ გააკეთა და ჩვენ დამატებით მივმართეთ მათ.
ეს ინფორმაცია, სამწუხაროდ, შსს-მ კიდევ არ გაასაჯაროვა, ამ დროისთვისაც უცნობია ის საშუალებები, რომლებიც ქიმიური მახასიათებლებით გამოირჩეოდა და გამოიყენებოდა აქციის მონაწილეების წინააღმდეგ.
დავინტერესდით ჯანდაცვის სამინისტროსგანაც გაგვეგო ინფორმაცია, ჰქონდათ თუ არა მათ ინფორმაცია კონკრეტული საშუალებების შესახებ, ასევე, მიმართეს თუ არა თვითონ შსს-ს იმისთვის, რომ ეს ინფორმაცია მიეღოთ და შემდგომ მკურნალობა ამაზე დაყრდნობით განეხორციელებინათ.
სამწუხაროდ, ჯანდაცვის სამინისტრომ გვიპასუხა, რომ მათ ეს ინფორმაცია არ აქვთ და არც ჩათვალეს საჭიროდ, რომ გამოეთხოვათ, რადგან ასე შეაფასეს, რომ ამის საჭიროება არ იყო, რაც ბუნდოვანია, იქიდან გამომდინარე, რომ ჯანდაცვის სფეროს წარმომადგენლები აქციების დარბევის პერიოდში თავადვე საუბრობდნენ იმაზე, რომ ეს ინფორმაცია განსაკუთრებით მნიშვნელოვანი იყო იმისთვის, რომ სწორად დაგეგმილიყო შემდგომი მკურნალობა.” – თქვა ნონა ქურდოვანიძემ.
