ანდრეი პიონტკოვსკი: როცა უკრაინა გაიმარჯვებს, საქართველოს მიწების დეოკუპაცია უფრო სწრაფად ჩაივლის

ანდრეი პიონტკოვსკი დეოკუპაციაზე

რუსი მეცნიერი და პოლიტოლოგი ანდრეი პიონტკოვსკი ამბობს, რომ როცა უკრაინა გაიმარჯვებს, საქართველოს მიწების დეოკუპაცია უფრო სწრაფად ჩაივლის. ამის შესახებ მან  ირაკლი ტაბლიაშვილის გადაცემაში “კონტექსტში” ისაუბრა. მისივე თქმით, უკრაინა დაეხმარება “მოძმე საქართველოს” მოიპოვოს საპატიო ადგილი NATO-ში.

პიონტკოვსკის განმარტებით, ყოველი მსოფლიო ომის შემდეგ უსაფრთხოების ახალ სისტემას გამარჯვებული ქვეყანა განსაზღვრავს, ამ ომში კი ძირითადი გამარჯვებული ქვეყნები იქნებიან ამერიკის შეერთებული შტატები, უკრაინა და დიდი ბრიტანეთი. ანალიტიკოსი ხაზს უსვამს, რომ უკრაინა არ იქნება მთხოვნელი NATO-ში მიღების, რადგან “ყველას კარგად ესმის”, რომ უკრაინის წევრობა NATO-ში არ არის მხოლოდ უკრაინის უსაფრთხოების ამოცანა, არამედ ეს მთლიანად NATO-ს უსაფრთხოების ამოცანაა:

“რადგან ერთადერთი ევროპული ჯარი, რომელიც არსებობს და რომელმაც დაამარცხა მსოფლიოს მეორე არმია, ეს გახლავთ უკრაინის ჯარი. უკრაინა იქნება NATO-ს წამყვანი წევრი. ის იქნება თქვენი მეგობარი, თქვენი ძმა და თქვენ არ დაგჭირდებათ დალოდება დასავლეთის, რომელიც ხელს ჩაგკიდებთ და NATO-ში მიგიყვანთ ან არ მიგიყვანთ.

პუტინის ხელისუფლება ინგრევა პოსტსაბჭოთა თითქმის მთელ სივრცეში. რაც შეეხება თქვენი ხელისუფლების პოლიტიკას, მე ვიცი მათი პოპულარული პოზიცია: “რა, მეორე მარიუპოლი გსურთ?” ასე აშინებდნენ საქართველოს მოსახლეობას. ახლა როცა მარიუპოლიდან და უკრაინიდან რუსული არმია გაიქცევა, ეს მომენტი აღარ იმუშავებს და თქვენი ოკუპირებული მიწების დეოკუპაცია უფრო ნაკლებად მტკივნეულად ჩაივლის.“

● ადამ ჰოლოვეი: „ქართული ოცნება“ პროპუტინისტური და პრორუსული ჯგუფია, რომელიც საქართველოს რისკის ქვეშ აყენებს
● მოსაზრება: სტოლტენბერგის განცხადებაში პირდაპირ იყო ნათქვამი, რომ დემოკრატიაში გვაქვს ჩამორჩენა
● კვლევა: საქართველოს მოსახლეობას ყველაზე მეტად სიღარიბის და რუსეთის ეშინია

როგორც რუსი პოლიტოლოგი აღნიშნავს, პუტინის მიერ ჩაფიქრებული იყო აბსოლუტურად სხვა ომი – ომი არა უკრაინასთან, არამედ “მთელ დასავლეთთან”, რადგან მას სურდა რევანშის აღება, როცა საბჭოთა კავშირი დამარცხდა ცივ ომში.

“ეს ომი მან წააგო დასავლეთთან. მოსკოვში პუტინი სხვა ომს აწარმოებს. პირველი ომი მან წააგო და დამარცხებას ამ ომში იგი არასდროს აღიარებს… ეს იქნება ყირიმის ხიდის დანგრევა უკრაინელი სამხედროების მიერ. ამას ექნება სამხედრო მნიშვნელობა და რუსეთის დაჯგუფებას მოუწევს ყირიმიდან წასვლა, რადგან ალყაში იქნება. ეს იქნება უზარმაზარი პოლიტიკური და ფსიქოლოგიური დამარცხება პუტინის. მას ჩამოაცილებენ ხელისუფლებას, თუმცა როგორ მოხდება ეს, ამას წინასწარ ვერ გეტყვით. როცა აფეთქდება ყირიმის ხიდი და როცა მეორე ომიც იქნება განწირული, იგი პოლიტიკურად მკვდარი იქნება.” – აღნიშნა პიონტკოვსკიმ.