ახალქალაქში მომხდარ მკვლელობაში ბრალდებული დაკავებულია

ახალქალაქში გუშინ, 8 აგვისტოს მომხდარ მკვლელობაში ბრალდებული 37 წლის მამაკაცი დაკავებულია. სოფელ კულიკამში მცხოვრები 27 წლის მამაკაცის მკვლელობას ახალქალაქში მასობრივი არეულობა მოჰყვა. მოკლულის ახლობლებმა მკვლელობაში სავარაუდო ბრალდებულის და მისი ახლობლების სახლები გადაწვეს.  

ახალქალაქის შესასვლელში ამ დროისთვის სამართალდამცავები არიან მობილიზებული. ქალაქში იმყოფება შს მინისტრის მოადგილე, ვლადიმერ ბორცვაძეც.

მკვლელობაში ბრალდებულს გამოძიება განზრახ მკვლელობას და ცეცხლსასროლი იარაღის მართლსაწინააღმდეგო შეძენა-შენახვა-ტარებას ედავება. დანაშაული 7-დან 15 წლამდე ვადით თავისუფლების აღკვეთას ითვალისწინებს.

შსს-ს ინფორმაციით, ბრალდებულმა სოფელ კულიკამში მცხოვრებ 27 წლის ახალგაზრდას ცეცხლსასროლი იარაღიდან გასროლით სასიკვდილო ჭრილობა მიაყენა. დაჭრილი საავადმყოფოში მიყვანამდე გარდაიცვალა.

8 აგვისტოს საღამოს, მას შემდეგ, რაც მოკლულის ახლობლები და თანასოფლელები ახალქალაქში ჩავიდნენ, სიტუაცია დაიძაბა და ქალაქში მასობრივი არეულობა დაიწყო. 

სამცხე-ჯავახეთის გუბერნატორი, ბესიკ ამირანაშვილი აცხადებს,  რომ გარდაცვლილის სოფლელებმა, რომლებიც რკინის ხელკეტებით იყვნენ შეიარაღებულები,  ახალქალაქში სავარაუდო მკვლელის და მისი ახლობლების სახლები დაარბიეს და  დაწვეს. დამწვარია სასტუმრო “არტსეკი”, 4 საცხოვრებელი სახლი და რამდენიმე მანქანა. 

ამ დროისთვის პოლიცია ვითარებას სრულად აკონტროლებს. 

ამირანაშვილის თქმით, მკვლელობა არც პოლიტიკურ და არც ეთნიკურ ნიადაგზე არ მომხდარა. 

როგორც ადგილობრივები ამბობენ, ახალქალაქში მომხდარ მკვლელობას წინ უძღოდა რამდენიმეწლიანი კონფლიქტი.

ახალქალაქში მომხდარი არეულობის გამო შსს-მ გამოძიება ჯგუფური ძალადობის ფაქტზეც დაიწყო.