აფხაზეთში სოფლის მეურნეობისთვის გაცემული გრანტების ეფექტიანობას შეამოწმებენ
სოფლის მეურნეობა აფხაზეთში
აფხაზეთის ხელისუფლება სოფლის მეურნეობისთვის გაცემული გრანტების ხარჯვის ეფექტიანობის შემოწმებას გეგმავს. ე.წ. პრეზიდენტმა ბადრა გუნბამ შესაბამის ორგანოებს დაავალა, ბიუჯეტში დაბრუნდეს ის თანხები, რომლებიც არაეფექტიან პროექტებზე დაიხარჯა.
საუბარია გრანტებზე, რომლებიც სოფლის მეურნეობის სამინისტროს პროგრამის, „სოფლის მეურნეობის განვითარება 2025 წლისთვის“ ფარგლებში გაიცა, ასევე ეკონომიკის სამინისტროს უწყებრივი პროგრამით, რომელიც მცირე და საშუალო მეწარმეობის მხარდაჭერას ითვალისწინებს.
გრანტების გამოყენების შემოწმების გადაწყვეტილება ე.წ. პრეზიდენტს, სავარაუდოდ, ფერმერების არაერთმა საჩივარმა უბიძგა. ისინი სოციალურ ქსელებში წერენ, რომ ხელისუფლება რეალურ მწარმოებლებს სათანადო დახმარებას არ უწევს.
ბადრა გუნბა არ გამორიცხავს, რომ დაფინანსების დიდი მოცულობის პირობებში გარკვეულ დარღვევებს ჰქონოდა ადგილი.
„თუ დარღვევები გამოვლინდება და დაფინანსების ასეთი დიდი მოცულობის პირობებში ისინი, სავარაუდოდ, აუცილებლად იქნება, მათზე რეაგირება აუცილებელია. მაგრამ მთავარი მხოლოდ დასჯა კი არ არის, არამედ ის, რომ დამნაშავეებმა სახელმწიფოსთვის მიყენებული ყველა ხარჯი აანაზღაურონ და თანხა ბიუჯეტში დააბრუნონ“, — განაცხადა პრეზიდენტმა.
ოპოზიციური მედიის, „რესპუბლიკის“, შეფასებით, თუ ე.წ. პრეზიდენტი სამართალდამცავ ორგანოებს ავალებს, მცირე და საშუალო მეწარმეობის სახელმწიფო მხარდაჭერის პროგრამების განხორციელებაზე კონტროლის მიზნით უწყებათაშორისი ჯგუფი შექმნან, ეს მხოლოდ ერთ რამეზე მიუთითებს: ამ პროგრამებთან დაკავშირებით ყველაფერი წესრიგში აშკარად არ არის.
„როგორც ჩანს, ვიღაცამ უკვე გადაწყვიტა, მეწარმეების სახელმწიფო მხარდაჭერის ხარჯზე არცთუ ცუდად იხეიროს. ახლა სამართალდამცავ ორგანოებს რამდენიმე ვარიანტი აქვთ:“
- უბრალოდ შეაშინონ, რათა მომავალში აღარ მოიპარონ;
- გამოიძიონ ის, რისი მოპარვაც უკვე მოასწრეს;
- ან თავადაც ჩაერთონ და წილი მიიღონ.
„როგორ ფიქრობთ, რომელ ვარიანტს აირჩევენ?“ — კითხულობს „რესპუბლიკა“ და გამჭვირვალედ მიანიშნებს, რომ პასუხი ისედაც ნათელია.
პუბლიკაციებში გამოყენებული ტოპონიმები და ტერმინოლოგია, აგრეთვე მათში გამოთქმული მოსაზრებები და შეხედულებები, ყოველთვის არ ასახავს გამომცემლის შეხედულებებსა და პოზიციას
