ინალ არძინბა: ჩვენ აშშ-ის პროვოკაციებს ველით
აფხაზეთი შეერთებული შტატების პროვოკაციებს ელოდება
აფხაზეთის ე.წ. საგარეო საქმეთა მინისტრმა ინალ არძინბამ რუსეთის პირველი არხის ეთერში განაცხადა, რომ ის ამერიკის შეერთებული შტატებისგან პროვოკაციებს მოელის, რასაც, მისი თქმით, ადგილობრივი არასამთავრობო ორგანიზაციები უწყობენ ხელს.
მინისტრის სიტყვებმა სოციალურ ქსელში მძაფრი გამოხმაურება გამოიწვია, რის შემდეგაც საგარეო საქმეთა სამინისტროს პრესსპიკერმა განაცხადა, რომ არძინბას არასწორად გაუგეს.
“გინდათ ის მოხდეს, რაც უკრაინაში?”
დასავლეთი დაინტერესებულია რუსეთის ირგვლივ ლოკალური კონფლიქტების ორგანიზებით და ამიტომ, აფხაზეთი ელოდება აშშ-ს პროვოკაციულ ქმედებებს, განაცხადა ინალ არძინბამ.
„ახლა არასამთავრობო ორგანიზაციები ჰუმანიტარული საქმიანობის ეტაპზე არიან, როგორც ეს იყო უკრაინაში, როდესაც პირველ ეტაპზე არასამთავრობო ორგანიზაციებს იყენებენ კარგი იმიჯის შესაქმნელად, კონტაქტების ქსელის გასაფართოებლად, ბლოგერების, ჟურნალისტების, საზოგადო მოღვაწეებისა და პოლიტიკოსების მოსაზიდად. შემდეგ მუშაობა გადადის რადიკალურ ქმედებებზე“, – დასძინა მან.
არძინბას თქმით, აფხაზეთის საგარეო საქმეთა სამინისტრო “ამას ძალიან ყურადღებით ადევნებს თვალს”, რადგან “რისკები არ შეიძლება გახდეს საფრთხე, რამაც შეიძლება ომი გამოიწვიოს”. არძინბა ამ შემთხვევაში ქართულ-აფხაზური კონფლიქტის ესკალაციას გულისხმობს.
- არის თუ არა ქართულ-აფხაზური კონფლიქტის რისკი უკრაინის ომის ფონზე? გამოკითხვა აფხაზეთში
- “ჩვენ არავის ვალი არ გვაქვს” – მოსაზრება აფხაზეთიდან
“დავიღალეთ ომის დაშინებით”
სოციალურ ქსელებში ინალ არძინბას გამოსვლა ძალიან კრიტიკულად შეაფასეს.
ტელეგრამის არხი “D News Abkhazia”:
„შეგახსენებთ, რას ეძახდნენ მათ, ვინც ქვეყნის ფარგლებს გარეთ მოგზაურობდა და საკუთარ მოქალაქეებს აპიარებდა? აღსანიშნავია ისიც, რომ მისი გამოსვლის ფონზე აჩვენეს 30 მაისს სოხუმში გამართული სახალხო მიტინგის და პარალელურად, საქართველოში ანტისამთავრობო დემონსტრაციების კადრები. საინტერესო ანალოგიაა, არა?”
ახალგაზრდული ორგანიზაციის აქტივისტი ალექსანდრა ბარგანჯია:
„რუსეთის ფედერალურ არხებზე მინისტრის ყოველი გამოსვლის შემდეგ ამაზრზენი გემო რჩება. დავიღალეთ ომის მუდმივი შეხსენებით, უცხოური აგენტებით, ყველა მოქალაქის დაშანტაჟებით, ვინც არ ეთანხმება თქვენს პოლიტიკას, რომელიც ჯაშუშებთან გვაიგივებს. გულისამრევია. აფხაზეთში არასამთავრობო ორგანიზაციების თანამშრომლებმა მის სასიკეთოდ უფრო მეტი გააკეთეს და აკეთებენ, ვიდრე რომელიმე სამინისტრო. აფხაზეთი და მისი მოქალაქეები უფრო მეტს იმსახურებენ“.
არასამთავრობო ორგანიზაცია “ჰუმანიტარული პროგრამების ცენტრის” თანადირექტორი, პოლიტოლოგი ლიანა კვარჩელია:
„აფხაზეთის დამოუკიდებლობის შენარჩუნების, მოქალაქეთა უფლებებისა და თავისუფლებების, უმნიშვნელოვანესი სახელმწიფო ქონების შენარჩუნებისთვის დგომა არის „პროდასავლურობა“. სუვერენიტეტის გაზიარების, მოქალაქეთა უფლებებისა და თავისუფლებების შეზღუდვის, აქტივების გაყიდვის სურვილი – ეს არის „პატრიოტიზმი“. სწორად გავიგე, მინისტრო?“
“ეს ის არ არის, რაც შენ გგონია!”
აგორებულმა სკანდალმა აიძულა ინალ არძინბა გამოესწორებინა სიტუაცია. მან ეს გააკეთა საგარეო საქმეთა სამინისტროს პრესმდივნის, მილან ცვიჟბას მეშვეობით:
„მინისტრის გამოსვლაში არც ერთი სიტყვა არ ყოფილა ჩვენი თანამოქალაქეების შესახებ, აფხაზეთში საერთაშორისო არასამთავრობო ორგანიზაციების დესტრუქციული საქმიანობის განხილვის კონტექსტში. საუბარი ეხება უცხო ქვეყნის მოქალაქეებს, რომლებიც თავიანთ საქმიანობას ახორციელებენ აფხაზეთის რესპუბლიკის ტერიტორიაზე, არიან თანამდებობის პირები და წარმოადგენენ საერთაშორისო არასამთავრობო ორგანიზაციების ინტერესებს“.
თუმცა, იმის გათვალისწინებით, რომ ეს არ არის ინალ არძინბას პირველი თავდასხმა ადგილობრივ არასამთავრობო ორგანიზაციებზე, საგარეო საქმეთა სამინისტროს განმარტება არც თუ ისე დამაჯერებელი აღმოჩნდა.
კომენტარი
ტელეკომპანია აბაზას ჟურნალისტი ელეონორა გილოიანი „მეხუთე კოლონის“ ძიების შესახებ:
„ჩემი სამუშაოს დიდი ნაწილი ხალხის მოსმენაა. მიკროფონს ვრთავ, კითხვას ვუსვამ და ვუსმენ. არ ვერევი, არ ვეწინააღმდეგები.
ძალიან ხშირად ვუსმენ და ვფიქრობ: „მითხარი, რატომ გგონია, რომ ჩვენ ამის გვჯერა? რატომ ვართ შენს თვალში ასეთი იდიოტები? მაგრამ ამას, რა თქმა უნდა, ღიად არ ვამბობ.
ახლაც მაგარი სცენა თამაშდება.
— ყველას ვინც ჩვენთან არ არის სათითაოდ ხალხის მტრები ვუწოდოთ?
— შესანიშნავი იდეაა!!!
— ვერავინ გამოიცნობს, რომ მხოლოდ საკუთარი ინიციატივების ლამინირებას ვცდილობთ?
— რაა თქმა უნდა არა!!!
— ვაშა!!!
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
