აზერბაიჯანში Abzas Media-ს საქმეზე მეექვსე ჟურნალისტი დააკავეს
Abzas Media-ის საქმე
Abzas Media-ს საქმესთან დაკავშირებით აზერბაიჯანში კიდევ ერთი ჟურნალისტი დააკავეს. ამ ბრალდებით ეს უკვე მეექვსე დაკავებაა. ონლაინ გამოცემის ყველა დაკავებულ თანამშრომელს ბრალად ედება ადამიანთა ჯგუფთან ერთად წინასწარი შეთქმულების გზით კონტრაბანდაში მონაწილეობა.
ჟურნალისტები ბრალდებას არ ეთანხმებიან და მიაჩნიათ, რომ მათი დაკავება უკავშირდება მათ პროფესიულ საქმიანობას და Abzas Media-ში გამოქვეყნებულ მაღალჩინოსანთა კორუფციული ფაქტების მხილებას.
- აზერბაიჯანის სასამართლომ Abzas Media-ს ჟურნალისტები პატიმრობაში დატოვა
- “მნიშვნელოვანია ჩინეთთან პოლიტიკური ასპექტის გაღრმავება” – მმართველი პარტიის დელეგაცია ჩინეთში იმყოფება
- “სომხეთი რუსეთს ემიჯნება“ – მოსაზრება ეროვნული უსაფრთხოების სამსახურში რეფორმების შესახებ
15 იანვარს, ბაქოს ხატაის სასამართლოს გადაწყვეტილებით, Abzas Media-ს რეპორტიორი ელნარა გასიმოვა დააკავეს და წინასწარი პატიმრობა შეუფარდეს, ისევე, როგორც ამ საქმეზე დაკავებულ სხვა თანამშრომლებს, მასაც ბრალი ედება აზერბაიჯანის სისხლის სამართლის კოდექსის 206.3.2 მუხლით (კონტრაბანდა, წინასწარი შეთქმულებით პირთა ჯგუფთან ერთად).
ჟურნალისტი სასამართლო პროცესზე ხელბორკილებით მიიყვანეს.
„ეს არის უდანაშაულობის პრეზუმფციის დარღვევა. რა თქმა უნდა, ეს იმისთვის გაკეთდა, რომ სასამართლოს წინ შეკრებილი კოლეგებისთვის ელნარას ხელი არ დაექნია… ტერორისტი არ არის, ელნარა ჟურნალისტია!“ – წერს ჟურნალისტი შემშად აღა სოციალურ ქსელში.
შაბათს, 13 იანვარს, საღამოს, ჟურნალისტი მეორედ დაიბარეს ბაქოს პოლიციის მთავარ სამმართველოში Abzas Media-ს საქმეზე ჩვენების მისაცემად. იმავე დღეს გამოცხადდა ელნარა გასიმოვას დაკავების შესახებ.
პოლიციის განყოფილებაში მისვლამდე მან ინტერვიუ მისცა ტელეკომპანია Meydan TV-ს და თქვა, რომ ელოდა დაკავებას, რადგან პრეცედენტი უკვე იყო – ნარგიზ აბსალამოვაც დააკავეს, რომელიც ასევე მეორედ იყო დაბარებული ჩვენების მისაცემად. მან წინასწარი დაკავების იზოლატორისთვის შეაგროვა ყველაფერი, რაც შეიძლება დასჭირდეს, რათა დაკავების შემდეგ ქმარს არ მოუწიოს ჩამოსვლა.
“ფაქტობრივად, სხვა გზა არ მაქვს. არასდროს მიფიქრია რაიმე ალტერნატივაზე, მაგალითად: იქნებ აღარ გავაგრძელო წერა, გავჩერდე ან წავიდე. ასეთ ფიქრებს არ ვუშვებ.
ვფიქრობ, ჩვენ მაინც უნდა გავაგრძელოთ ეს საქმე. ვინც დღეს ხელისუფლებაშია, უნდა დაინახონ, რომ რაც არ უნდა გააკეთონ, არიან ისეთებიც, რომლებიც ციხეში ხვდებიან ნარგიზივით გაღიმებულები, ვინც ბრუნდება ქვეყანაში, რადგან იცის, რომ სევინივით დააპატიმრებენ.
ვერავინ იტყვის, რომ არ ეშინია. ზოგიერთს შეიძლება ჰქონდეს მეტ-ნაკლები შიში. თუმცა, მიუხედავად ამ შიშისა, ის უნდა დაიძლიოს. ჩემი კოლეგების დაპატიმრებით გამოწვეული სიბრაზის გრძნობა დამეხმარა შიშის ჩახშობაში“, – თქვა მან.
ჟურნალისტის ადვოკატმა განაცხადა, რომ ელნარა გასიმოვა თავს დამნაშავედ არ თვლის.
დაპატიმრებები Abzas Media-ს საქმეზე, რომელიც ცნობილია ხელისუფლებაში კორუფციული სექმების გამოძიებით, გასული წლის 20 ნოემბერს დაიწყო.
თავდაპირველად დააკავეს საიტის დირექტორი, ულვი ჰასანლი, დირექტორის მოადგილე მუჰამედ კეკალოვი და მთავარი რედაქტორი სევინჯ ვაგიფკიზი. მოგვიანებით, დაკავებები გაგრძელდა გამომძიებელი ჟურნალისტების – ჰაფიზ ბაბალასა და ნარგიზ აბსალამოვას მიმართ. ყველას ბრალი წაუყენეს აზერბაიჯანის სისხლის სამართლის კოდექსის 206.3.2 მუხლით.
ამ მუხლის სანქცია ითვალისწინებს თავისუფლების აღკვეთას ხუთიდან რვა წლამდე ვადით.
დასახელებული ჟურნალისტებიდან არც ერთი ბრალს არ აღიარებს. ისინი აცხადებენ, რომ ისჯებიან Abzas Media-ში გამოქვეყნებული გამოძიებებისთვის, რომლებიც დაკავშირებულია რამდენიმე მაღალჩინოსნის ბიზნესთან და კორუფციასთან.
