აბიტურიენტი, რომელსაც კორონავირუსი დაუდასტურდა, გამოცდას პალატაში აბარებს

აბიტურიენტი ანა ონიანი, რომელსაც covid-19 დაუდგინდა, 2020 წლის ერთიან ეროვნულ გამოცდებს არ გამოეთიშა –  ის დარჩენილ ერთ გამოცდას ინგლისურ ენასა და ლიტერატურაში საავადმყოფოს ბოქსირებულ პალატაში დღეს ჩააბარებს. გამოცდა ექიმებისა და გამოცდების ცენტრის წარმომადგენლების მეთვალყურეობით ჩატარდება.

კორონავირუსით ინფიცირებული აბიტურიენტი კონსერვატორიაში აბარებს. შიდა გამოდების შედეგებით მას უკვე აქვს 100%-იანი დაფინანსება და მხოლოდ 2 გამოცდის ჩაბარება სჭირდებოდა. აქედან ერთი  გამოცდა ქართულ ენასა და ლიტერატურაში უკვე ჩაბარებული აქვს. 

„ჩვენ გავერკვიეთ და ეს არის ერთ-ერთი წარჩინებული მოსწავლე, რომელსაც დარჩა ერთი გამოცდა. საბჭოზე მივიღეთ გადაწყვეტილება, რომ ანა ამ დარჩენილ გამოცდასაც ჩააბარებს, ოღონდ მკურნალობის პირობებში. განათლების სამინისტრო თავისი გამოცდით მივა აბიტურიენტთან, იმისთვის, რომ მან არ დაკარგოს 1 წელი და შეეძლოს სწავლის გაგრძელება,” – აღნიშნა პრემიერ-მინისტრმა გიორგი გახარიამ.

აბიტურიენტს კორონავირუსი ქართული ენისა და ლიტერატურის გამოცდის ჩაბარების შემდეგ დაუდასტურდა. მისი ყველა კონტაქტი იდენტიფიცირებულია. მასთან ერთად საგამოცდო ოთახში მყოფი ცხრავე აბიტურიენტი საკარანტინე სივრცეში გადაიყვანეს. მათ ყოველი გამოცდის წინ  PCR-ტესტი უტარდებათ და გამოცდებს სპეციალურად მათთვის გამოყოფილ საგამოცდო სივრცეში აბარებენ.