საქართველოს საგარეო უწყება: 3+3 ფორმატის შეხვედრაზე საქართველოს დროშა მიუღებელია

საქართველოს საგარეო საქმეთა სამინისტრო აცხადებს, რომ 3+3 ფორმატში გამართულ შეხვედრაზე საქართველოს დროშის გამოყენება მიუღებელია, რასაც უწყების მტკიცებით, “შესაბამისი რეაგირება” მოჰყვა. 

“ქართულმა მხარემ არაერთხელ დააფიქსირა საკუთარი მკაფიო პოზიცია 3+3 რეგიონალურ ფორმატთან დაკავშირებით, რომ არ განვიხილავთ აღნიშნულ ფორმატში საქართველოს მონაწილეობას. 10 დეკემბერს მოსკოვში გამართულ შეხვედრაზე წარმოდგენილი იყო საქართველოს დროშა, რაც ბუნებრივია მიუღებელია ჩვენთვის და რაზეც გვქონდა შესაბამისი დიპლომატიური არხების მეშვეობით რეაგირება”, – ნათქვამია განცხადებაში.

● გაიმართა აბაშიძე კარასინის ონლაინ შეხვედრა. საქართველო 3+3 ფორმატში მონაწილეობას არ განიხილავს
● ჟენევის მოლაპარაკებები: რუსეთის დელეგაციამ შეხვედრა დატოვა
● საგარეო საქმეთა სამინისტრო: მიუღებელია მოსკოვის განცხადებები საოკუპაციო ხაზის დელიმიტაციაზე

9 დეკემბერს, საქართველოს საგარეო საქმეთა სამინისტრომ განმარტა, რომ 10 დეკემბრის შეხვედრაში, რომელიც მოსკოვში იმართება, საქართველო მონაწილეობას არ მიიღებდა და ქვეყანა არც 3+3 პლატფორმაში ჩართვას განიხილავს.

3+3 ფორმატის იდეა 2020 წლის მთიანი ყარაბაღის კონფლიქტის შემდეგ, თურქეთის პრეზიდენტმა, რეჯეფ თაიფ ერდოღანმა წამოაყენა.

ფორმატი გულისხმობს ექვსი ერის პლატფორმის შექმნას, რომელშიც მონაწილეობა თურქეთის, აზერბაიჯანის, სომხეთის, საქართველოს, რუსეთისა და ირანის ხელისუფლებებმა უნდა მიიღონ, რათა – როგორც ერდოღანი ამბობს – რეგიონში მშვიდობა დამყარდეს.

ქართული მხარე თავიდანვე უარს ამბობდა 6 ერის პლატფორმაში მონაწილეობაზე. თუმცა ერდოღანმა ეს ინიციატივა კიდევ ერთხელ გაიმეორა 2021 წლის ივნისში, აზერბაიჯანში ვიზიტის დროს.

თურქეთის პრეზიდენტმა მაშინ განაცხადა, რომ კავკასიის რეგიონში მშვიდობის დამყარება რეგიონული კოოპერაციითაა შესაძლებელი და ეს მთელი მსოფლიოსთვის სასიკეთო იქნება.

“არა მხოლოდ აზერბაიჯანი, არამედ რეგიონის ყველა ქვეყანა, სომხეთის ჩათვლით, ასევე მთელი მსოფლიო, მოგებული დარჩება კავკასიაში მშვიდობისა და სიწყნარის არსებობით”, – თქვა ერდოღანმა.