უწყვეტი პროტესტის 661-ე დღე, "შაბათის მარშის" ვიდეო ბლოგების სერიიდან "პროტესტი საქართველოში"
შაბათის მარში
“შაბათის მარშის” მონაწილეებმა პროტესტის 661-ე დღეს ტრადიციული მსვლელობა კვლავ ავლაბრის მეტროდან პარლამენტის შენობის მიმართულებით მოაწყვეს.
დღევანდელი მარშის მთავარი გზავნილი იყო “საქართველო ივანიშვილის წინააღმდეგ”. „საკუთარი ერის მტერი, არ დარჩება დაუსჯელი“- სკანდირებდნენ მსვლელობის მონაწილეები.
პროტესტი საქართველოში. ყველა ვიდეო ყოველკვირეული „შაბათის მარში“საქართველოში უკვე მე-40 შაბათია იმართება. ძირითადი მოთხოვნები უცვლელია: პროევროპული აქციების დროს დაკავებულების გათავისუფლება და ახალი საპარალამენტო არჩევნების დანიშვნა.
თითქმის ორი წელია საქართველოში უწყვეტი საპროტესტო აქციები მიმდინარეობს. აქციის მონაწილეები ყოველ საღამოს იკრიბებიან ქვეყნის დედაქალაქში, თბილისსა და საქართველოს რამდენიმე პატარა ქალაქში.
აქციების მიმდინარეობისას ათობით ადამიანი დააკავეს. ბევრ მათგანს სისხლის სამართლის ბრალდება წაუყენეს და პატიმრობა მიუსაჯეს. პირველად, დამოუკიდებელი საქართველოს ისტორიაში, გვყავს 150-მდე სინდისის პატიმარი, მათ შორის ქალები. დაპატიმრებულია გამოცემების “ბათუმელებისა” და “ნეტგაზეთის” დამფუძნებელი, მზია ამაღლობელი. მას ორწლიანი პატიმრობა აქვს მისჯილი პოლიციელისთვის სილის გაწვნის ფაქტზე.
აქციის მონაწილეები ითხოვენ გათავისუფლდეს ყველა პოლიტიკური პატიმარი, დაინიშნოს ახალი საპარლამენტო არჩევნები და გაუქმდეს ყველა ის ანტიდემოკრატიული კანონი, რაც ბოლო ორ წელიწადში მიიღო “ქართულმა ოცნებამ”.
პროტესტის ჩასახშობად, “ქართული ოცნება” სულ უფრო ამკაცრებს რეპრესიებს სამოქალაქო საზოგადოებისა და მედიის წინააღმდეგ. თუმცა, უწყვეტი პროტესტი, სხვადასხვა ფორმით, დღემდე გრძელდება.
