სანქცირებულ "იმედთან“ რეკლამის გამო P&G-მ მაუწყებელთან კავშირი გაწყვიტა, Nestlé-მ შიდა მოკვლევა დაიწყო
რეკლამა სანქცირებულ იმედზე
ბრიტანეთის მიერ სანქცირებულ ტელეკომპანია “იმედთან“ თანამშრომლობის გამო ორმა უმსხვილესმა საერთაშორისო კომპანიამ, Procter & Gamble-მა და Nestlé-მ შიდა მოკვლევა დაიწყო, ხოლო პირველმა უკვე შეაჩერა რეკლამის განთავსება.
გამოცემა City AM-ის ინფორმაციით, ამერიკულმა სამომხმარებლო საქონლის გიგანტმა Procter & Gamble-მა, რომელიც ისეთ ბრენდებს ფლობს, როგორებიცაა Gillette და Pampers, ტელეკომპანია “იმედზე“ რეკლამის განთავსება ორშაბათს შეაჩერა. გამოცემის ცნობით, გადაწყვეტილება კომპანიის შიდა მოკვლევის შემდეგ მიიღეს, რომელსაც Procter & Gamble-ის ევროპული ეთიკისა და შესაბამისობის ოფისის ხელმძღვანელი ჯონ ბრენდონი უძღვებოდა.
კომპანიის წარმომადგენლის განცხადებით, Procter & Gamble ყველა ქვეყანაში მოქმედ კანონმდებლობასა და სანქციების რეჟიმს იცავს.
“ჩვენ არ დაგვირღვევია გაერთიანებული სამეფოს სანქციების რეჟიმი. თუმცა, ნებაყოფლობით გადავხედეთ ჩვენს მიდგომას და საქართველოში “იმედზე“ რეკლამის განთავსება შევაჩერეთ“, – განაცხადა კომპანიის სპიკერმა.
ამავე დროს, City AM წერს, რომ Nestlé-მაც შიდა გამოძიება დაიწყო მას შემდეგ, რაც მისი პროდუქციის რეკლამა “იმედზე“ განთავსდა. გამოცემის თანახმად, საკვებისა და სასმელების მსოფლიოში უმსხვილესმა მწარმოებელმა კომერციული ურთიერთობა არხთან მას შემდეგაც შეინარჩუნა, რაც დიდი ბრიტანეთის მთავრობამ “იმედს“ თებერვალში სანქციები დაუწესა და კრემლის მიკერძოებულ რუპორად მოიხსენია.
Nestlé-ში დაწყებულ მოკვლევას, City AM-ის ცნობით, კომპანიის გლობალური იურიდიული დეპარტამენტის ხელმძღვანელი ლიან გეილი ხელმძღვანელობს, ხოლო პროცესში ლონდონის იურიდიული გუნდის წარმომადგენელი მარკ მორის-ჯონსიც მონაწილეობს.
კომპანიის წარმომადგენლებმა განაცხადეს, რომ Nestlé იცავს ყველა მოქმედ კანონსა და საერთაშორისო სანქციებს, მათ შორის საქართველოში საქმიანობისასაც.
ბრიტანეთის მთავრობამ ტელეკომპანია “იმედს“ და „პოსტივის“ ფინანსური სანქციები 24 თებერვალს, უკრაინაში რუსეთის სრულმასშტაბიანი შეჭრის მეოთხე წლისთავზე დაუწესა. ლონდონის განმარტებით, ორივე არხი უკრაინასთან დაკავშირებით დეზინფორმაციას ავრცელებს.
ბრიტანეთის საგარეო უწყების შეფასებით, “იმედი“ ავრცელებს რუსეთის მიერ უკრაინაში სრულმასშტაბიანი შეჭრის შესახებ განზრახ შეცდომაში შემყვან ინფორმაციას, რაც მხარს უჭერს ან ხელს უწყობს ისეთ პოლიტიკასა და ქმედებებს, რომლებიც უკრაინის სტაბილურობას, ტერიტორიულ მთლიანობას, სუვერენიტეტსა და დამოუკიდებლობას აზიანებს.
City AM-ის თანახმად, “იმედთან“ კავშირი უკვე რამდენიმე საერთაშორისო კომპანიამ გაწყვიტა. მათ შორის იყო BBC-ის კომერციული განყოფილება, რომელმაც არხს სატელევიზიო შოუ “ცეკვავენ ვარსკვლავების“ ლიცენზია მისცა, თუმცა შეთანხმება მომდევნო დღეს გააუქმა.
