გერმანიის ელჩი: ყულევის პორტის დასანქცირება EU-ს მე-20 პაკეტში იყო, თუმცა უნგრეთმა და სლოვაკეთმა ვეტო დაადეს
ყულევის პორტის დასანქცირება
გერმანიის ელჩმა საქართველოში პიტერ ფიშერმა განაცხადა, რომ ევროკავშირის სანქციების მე-20 პაკეტში ყულევის პორტის დასანქცირებაზე ოფიციალური საკანონმდებლო წინადადება იყო შეტანილი, თუმცა იგი უნგრეთისა და სლოვაკეთის ვეტოს გამო ჩავარდა.
უკრაინაში რუსეთის სრულმასშტაბიანი შეჭრის მეოთხე წლისთავისადმი მიძღვნილ ღონისძიებაზე გამოსვლისას ფიშერმა თქვა, რომ სანქციების პაკეტი “საკმაოდ ვრცელი“ იყო და მოიცავდა როგორც რუსული ნავთობის წინააღმდეგ ახალ ზომებს, ისე იმ პორტების დასანქცირებას, რომლებიც რუსულ ნავთობს ან “ჩრდილოვანი ფლოტის“ ტანკერებს იღებენ.
ელჩის თქმით, ყულევის პორტის საკითხი ბრიუსელში ფორმალური პროცედურით განიხილებოდა და მას თან ერთვოდა მტკიცებულებების პაკეტი.
“ჩვენ უბრალოდ არ ვამბობთ, ‘შესაძლოა რაღაც ხდება’ და მოდი, დავასანქციროთ. წარმოდგენილი იყო როგორც საკანონმდებლო წინადადება, ისე შესაბამისი მტკიცებულებები,“ – აღნიშნა ელჩმა.
ფიშერმა გამოსვლისას პოლიტიკური აქცენტიც გააკეთა და აღნიშნა, რომ უნგრეთი საქართველოს ხელისუფლების მიერ ევროკავშირში “საუკეთესო მეგობრად“ აღიქმება. თუმცა, მისი თქმით, ასეთი მოკავშირეობა საქართველოს ევროკავშირში გაწევრიანებას ვერ უზრუნველყოფს.
“კიდევ ერთხელ დაფიქრდით – ეს ასე არ მოხდება.” – თქვა ელჩმა.
ევროკავშირის მიერ მომზადებული სანქციების მე-20 პაკეტი, რომელიც ჯერ საბოლოოდ მიღებული არ არის, მოიცავს რამდენიმე მნიშვნელოვან მიმართულებას:
- რუსეთის „ჩრდილოვანი ფლოტის“ დამატებით 43 გემის სანქცირებას;
- რუსული თხევადი ბუნებრივი გაზით დატვირთული ტანკერებისთვის ტექნიკური მომსახურების აკრძალვას;
- ოთხ კონკრეტულ პორტულ ტერმინალთან ტრანზაქციების შეზღუდვას მესამე ქვეყნებში.
ამ უკანასკნელ სიაში მოხვდა ყულევის პორტიც, რომელიც დოკუმენტში აღწერილია როგორც ინფრასტრუქტურა, სადაც ხდება რუსული ნავთობის ან ნავთობპროდუქტების გადაზიდვა მაღალი რისკის მქონე სქემებით.
დოკუმენტის თანახმად, მსგავსი პრაქტიკა საფრთხეს უქმნის სანქციების ეფექტიანობას და შეიძლება გამოიყენებოდეს დასავლური შეზღუდვების გვერდის ავლისთვის.
