სომხეთის არჩევნებში რუსეთის ФСБ-ს შესაძლო ჩარევის შესახებ ახალი ცნობები გამოქვეყნდა
რუსეთის FSB-ის ჩარევა სომხეთის არჩევნებში
სომხეთში 7 ივნისის საპარლამენტო არჩევნების წინ რუსეთის შესაძლო ჩარევის შესახებ ახალი დეტალები გახდა ცნობილი. ფაქტების გადამოწმების პლატფორმა FIP.am ირწმუნება, რომ რუსეთში მოქმედი სომხური დიასპორის წარმომადგენლები აქტიურად არიან ჩართულნი საარჩევნო პროცესებზე გავლენის მოხდენის მცდელობებში, ხოლო ამ საქმიანობის კოორდინაციაში, მათი ინფორმაციით, რუსეთის ფედერალური უსაფრთხოების სამსახურის (ФСБ) წარმომადგენლებიც ფიგურირებენ.
გამოძიების ფარგლებში FIP.am-ის ჟურნალისტმა თავი ФСБ-ის ოფიცრად გაასაღა და რუსეთის სომეხთა კავშირის რამდენიმე რეგიონულ ხელმძღვანელს დაუკავშირდა. პლატფორმის ცნობით, რესპონდენტებმა, რომლებსაც ეგონათ, რომ უსაფრთხოების სამსახურის წარმომადგენელს ესაუბრებოდნენ, სომხეთის არჩევნებთან დაკავშირებული საქმიანობის შესახებ დეტალები თავად გაამხილეს.
დიასპორის ორგანიზაცია და “რუსული გუნდი“
რუსეთის სომეხთა კავშირი ერთ-ერთი უმსხვილესი საზოგადოებრივი ორგანიზაციაა, რომელიც რუსეთის ფედერაციაში მცხოვრებ სომხებს აერთიანებს. ორგანიზაცია 2000 წელს შეიქმნა და მისი დეკლარირებული მიზანი სომხური დიასპორის კონსოლიდაცია, ეროვნული იდენტობის შენარჩუნება და სომხეთსა და რუსეთს შორის ურთიერთობების გაღრმავებაა.
FIP.am-ის ცნობით, ულიანოვსკის სომხური თემის ხელმძღვანელმა არსენ აბრაჰამიანმა სატელეფონო საუბარში განაცხადა, რომ თემის წევრებს მკაფიო რეკომენდაციები ჰქონდათ მიღებული, მხარი დაეჭირათ ე.წ. “რუსული გუნდისთვის“.
მისი თქმით, ამ ბლოკში შედიან სომხეთის ყოფილი პრეზიდენტის, რობერტ ქოჩარიანის ბლოკი “სომხეთი“, ბიზნესმენ სამველ კარაპეტიანთან დაკავშირებული პარტია “ძლიერი სომხეთი“, გაგიკ ცარუკიანის “აყვავებული სომხეთი“ და ყოფილი ომბუდსმენის, არმან ტატოიანის, პოლიტიკური ძალა “ერთიანობის ფრთები“.
აბრაჰამიანის განცხადებით, “ერთიანობის ფრთების“ მიმართ მხარდაჭერა საჯაროდ არ ფიქსირდება, რადგან პარტია საზოგადოებაში პროევროპული ძალის იმიჯით პოზიციონირებს და, მისი თქმით, ამ აღქმის შენარჩუნება მიზანმიმართულად ხდება.
ამომრჩევლების სომხეთში გადაყვანის ორგანიზება
საუბრისას აბრაჰამიანმა დეტალურად ისაუბრა რუსეთიდან სომხეთში ამომრჩევლების ტრანსპორტირების საკითხზეც. მისი თქმით, ნაწილი მგზავრობის ხარჯებს თავად ფარავს, თუმცა არსებობენ ადამიანები, რომლებსაც ფინანსური დახმარება სჭირდებათ.
მისი განმარტებით, ასეთ შემთხვევებში თემის წარმომადგენლები ან მხარდამჭერები მათთვის საჭირო თანხების მოძიებაში ეხმარებიან. აბრაჰამიანმა ასევე აღნიშნა, რომ ამჟამად მოსკოვში იმყოფება და პროცესს დისტანციურად, ტელეფონის მეშვეობით კურირებს.
ამავე დროს, მან განაცხადა, რომ თავად არჩევნებში მონაწილეობას ვერ მიიღებს, რადგან სომხეთის მოქალაქე არ არის. თუმცა FIP.am მიუთითებს, რომ ადრე გავრცელებულ მიმართვებში იგი პირადად არჩევნებში მონაწილეობის განზრახვაზეც საუბრობდა.
ღია წყაროების მიხედვით, 60 წლის აბრაჰამიანი წლების განმავლობაში ხელმძღვანელობდა ულიანოვსკის სომხურ საზოგადოებრივ ორგანიზაციებს და 2007 წლიდან რუსეთის სომეხთა კავშირის რეგიონულ ფილიალს უდგას სათავეში.
“სრული ურთიერთგაგება“ უსაფრთხოების სამსახურებთან
გამოძიების ერთ-ერთ ყველაზე მნიშვნელოვან ეპიზოდად პლატფორმა მიიჩნევს იმ მონაკვეთს, სადაც ჟურნალისტმა, რომელიც თავს ФСБ-ის თანამშრომლად ასაღებდა, აბრაჰამიანს უთხრა, რომ საჭიროების შემთხვევაში რუსულ სპეცსამსახურებს შეეძლოთ ფინანსურად დაეფინანსებინათ სომხეთში გასამგზავრებელი პირები.
საპასუხოდ, აბრაჰამიანმა განაცხადა, რომ დამატებით 10-15 ადამიანის გაგზავნა სასურველი იქნებოდა და დააზუსტა, რომ საუბარი სომხური პასპორტების მქონე პირებზე იყო.
როდესაც საუბარი უსაფრთხოების სამსახურებთან თანამშრომლობას შეეხო, მან აღნიშნა, რომ ორგანიზაციას “სრული ურთიერთგაგება“ აქვს შესაბამის სტრუქტურებთან და მსგავსი თანამშრომლობა მრავალი წელია გრძელდება.
ამავე საუბარში აბრაჰამიანმა უკმაყოფილება გამოთქვა სომხეთის ამჟამინდელი ხელისუფლების მიმართაც. მისი თქმით, ერევანი არ ინარჩუნებს საკმარისად მჭიდრო ურთიერთობებს რუსეთთან და არ თანამშრომლობს დიასპორულ ორგანიზაციებთან ისე, როგორც წარსულში.
კავშირები რუსეთის რეგიონებში
FIP.am-ის ინფორმაციით, ჟურნალისტები დაუკავშირდნენ რუსეთის სხვა რეგიონებში მოქმედი სომხური თემების ხელმძღვანელებსაც, მათ შორის ტულისა და ვორონეჟის წარმომადგენლებს, რაფიკ პაპიანსა და არმენ ეღიაზარიანს.
პლატფორმის ცნობით, ორივემ დაადასტურა, რომ უსაფრთხოების სტრუქტურებთან გარკვეული ფორმის კავშირი არსებობს. ერთ-ერთმა რესპონდენტმა საუბრის ბოლოს ჟურნალისტს ისიც კი შეახსენა, რომ “რუსი დაზვერვის თანამშრომლები მსგავს საკითხებზე ღიად არ საუბრობენ“.
გამოძიების ავტორები ასევე აღნიშნავენ, რომ რუსეთის მიერ ანექსირებულ ყირიმში მოქმედი სომხური თემის ხელმძღვანელმა, გეორგი ჰაკობიანმა, დაადასტურა სომხეთში ამომრჩევლების გაგზავნის ფაქტი, თუმცა დამატებითი დეტალების გამხელისგან თავი შეიკავა.
FIP.am-ის მიერ გამოქვეყნებული მასალა სომხეთში არჩევნების წინ რუსეთის შესაძლო გავლენების შესახებ უკვე ფართო განხილვის საგანი გახდა. ბრალდებებზე ოფიციალური კომენტარები გამოძიებაში მოხსენიებული ორგანიზაციების ან რუსეთის სახელმწიფო უწყებების მხრიდან ამ დრომდე არ გავრცელებულა.
