რუსეთის სასამართლომ აფხაზეთის ე.წ. პარლამენტის წევრს დაუსწრებლად 10,5 წლით თავისუფლების აღკვეთა მიუსაჯა
კან კვარჩიას საქმე
რუსეთის სასამართლომ აფხაზეთის ე.წ. პარლამენტის წევრსა და ოპოზიციონერ პოლიტიკოს კან კვარჩიას დაუსწრებლად 10,5 წლით თავისუფლების აღკვეთა მიუსაჯა. განაჩენი 4 ივნისს სოჭის საქალაქო სასამართლომ გამოიტანა და ის შეიარაღებული ძარცვის საქმეს უკავშირდება.
აფხაზეთის ოპოზიციურმა ძალებმა გადაწყვეტილება პოლიტიკურად მოტივირებულად შეაფასეს და განაცხადეს, რომ საქმე ადგილობრივ პოლიტიკურ პროცესებთან არის დაკავშირებული.
საქმის საფუძველი 2025 წლის 5 ნოემბრის მოვლენებია, როდესაც აფხაზეთში მუნიციპალური არჩევნების წინა დღეს ოპოზიციონერი აქტივისტების ჯგუფმა, კან კვარჩიას ხელმძღვანელობით, სამი რუსი პოლიტიკური სტრატეგის საქმიანობა შეაჩერა. ოპოზიციის წარმომადგენლები აცხადებდნენ, რომ ისინი პროსამთავრობო კანდიდატებისთვის უკანონოდ მუშაობდნენ.
აქტივისტები იმ ოფისში მივიდნენ, სადაც პოლიტიკური კონსულტანტები მუშაობდნენ, რის შემდეგაც ისინი აფხაზეთის სახელმწიფო უსაფრთხოების სამსახურს გადასცეს შემდგომი გამოძიებისთვის.
მოგვიანებით პოლიტიკური სტრატეგები რუსეთში დაბრუნდნენ. გამოძიება არ ჩატარებულა, თუმცა მათ რუსეთის საგამოძიებო კომიტეტს მიმართეს და განაცხადეს, რომ ოპოზიციის აქტივისტები მათ თავს დაესხნენ და სიცოცხლის მოსპობით დაემუქრნენ.
ამის შემდეგ რუსეთის საგამოძიებო კომიტეტმა კან კვარჩიასა და კიდევ შვიდი აქტივისტის წინააღმდეგ სისხლის სამართლის საქმე აღძრა. გარკვეული დროის შემდეგ ანალოგიური საქმე აღძრა აფხაზეთის გენერალურმა პროკურატურამაც.
ადგილობრივმა სასამართლომ საქმის სხვა ფიგურანტებს გამოძიების დასრულებამდე შინაპატიმრობა შეუფარდა. კვარჩიას მიმართ მსგავსი ზომა არ გატარებულა, რადგან ის პარლამენტის წევრის იმუნიტეტით სარგებლობს. პროკურატურა მისი იმუნიტეტის მოხსნას ითხოვდა, თუმცა პარლამენტმა ეს მოთხოვნა არ დააკმაყოფილა.
კვარჩიასა და მის მხარდამჭერებს მიაჩნიათ, რომ საქმე პოლიტიკურ ხასიათს ატარებს. მათი განცხადებით, რუსეთის სასამართლოს მიერ გამოტანილი განაჩენი აფხაზეთში მიმდინარე პოლიტიკურ პროცესებსა და მოახლოებულ საპარლამენტო არჩევნებს უკავშირდება.
აფხაზეთის ოპოზიციური ორგანიზაციების ერთობლივ განცხადებაში ნათქვამია, რომ სოჭის სასამართლოს გადაწყვეტილება “პოლიტიკურად მოტივირებული და უსამართლოა“ და მისი მიზანი “არასასურველი პოლიტიკოსების დისკრედიტაცია და საზოგადოების დაშინებაა“.
