"მირჩევნია რუსეთში გამაგზავნოთ, ვიდრე ეს ხალხი გავწირო“ — რუსი აქტივისტი ამტკიცებს, რომ სუს-ი მის გადაბირებას ცდილობდა

რუსი აქტივისტის გადაბირება

რუსეთის მოქალაქე და პოლიტიკური აქტივისტი ვლადიმირ დუბოვსკი აცხადებს, რომ 2025 წელს, გლდანის საპატიმროში ყოფნისას, საქართველოს სახელმწიფო უსაფრთხოების სამსახურის წარმომადგენლები მის გადაბირებას ცდილობდნენ. დუბოვსკის თქმით, მას შესთავაზეს საქართველოში დარჩენაში დახმარება იმ პირობით, თუ ქართველი პროტესტის მონაწილე აქტივისტების შესახებ ინფორმაციას მიაწვდიდა.

საქართველოს იუსტიციის სამინისტროს პენიტენციურმა სამსახურმა აქტივისტის ბრალდებები “კატეგორიულად უარყო“.

დუბოვსკისთან ინტერვიუ “რადიო თავისუფლებამ” გამოაქვეყნა.

თბილისში დუბოვსკის სტრასბურგის სასამართლოს გადაწყვეტილებამ მოუსწრო, რომელიც რუსეთში მის დეპორტაციას კრძალავდა.

ფარული მოსმენები და შეთქმულების სცენარი

დუბოვსკის თქმით, სახელმწიფო უსაფრთხოების სამსახურის წარმომადგენლები მასთან გლდანის ციხეში პატიმრობიდან რამდენიმე დღის შემდეგ მივიდნენ. მისი განცხადებით, ის ფსიქოლოგთან შეხვედრის მოტივით კაბინეტში შეიყვანეს, სადაც ორი ადამიანი დახვდა, რომლებმაც თავი სუს-ის თანამშრომლებად წარუდგინეს.

აქტივისტის თქმით, შეხვედრისას მას შესთავაზეს საქართველოში დარჩენაში დახმარება იმ პირობით, თუ ქართველი პროტესტის მონაწილე აქტივისტების შესახებ ინფორმაციას მიაწვდიდა. დუბოვსკი ამბობს, რომ მას სხვადასხვა პირის სახელები და გვარები დაუსახელეს, შემდეგ კი აქციებზე გადაღებული ფოტოებიც აჩვენეს.

მისი მონათხრობის თანახმად, სთხოვდნენ აღნიშნულ პირებთან დაახლოებას, მათთან პოლიტიკური თემების განხილვას და ინფორმაციის გადაცემას. დუბოვსკი ვარაუდობს, რომ მსგავსი კონტაქტების მიზანი შესაძლოა შემდგომი ფარული თვალთვალი ან მოსმენა ყოფილიყო.

“თუ რუსეთში დაბრუნება არ გინდა, ჩვენ დაგეხმარებით, დარჩი საქართველოში და შენ ჩვენ დაგვეხმარეო“, – იხსენებს დუბოვსკი.

მისი თქმით, შეთავაზება მოიცავდა თავშესაფრის ხელახლა მოთხოვნასა და დაკმაყოფილებას, საცხოვრებელი ბინის უზრუნველყოფას, საქართველოში ცხოვრების გაგრძელების შესაძლებლობას, მუდმივი ბინადრობის უფლების მიღებასა და მომავალში მოქალაქეობის პერსპექტივას.

დუბოვსკი აცხადებს, რომ თანამშრომლობაზე უარი თქვა, რის შემდეგაც რუსეთში დეპორტაციით დაემუქრნენ. იმ პერიოდში რუსეთის ხელისუფლებას როგორც მასზე, ისე მის ამჟამინდელ მეუღლეზე, ალინა საველიევაზე ძებნა ჰქონდა გამოცხადებული.

“რა თქმა უნდა, მეშინოდა რუსეთში დეპორტაციის, მაგრამ ვუთხარი: მირჩევნია რუსეთში გამაგზავნოთ, ვიდრე ეს ხალხი გავწირო-მეთქი”, – ამბობს აქტივისტი.

რუსეთის მოქალაქე, რომელსაც აშშ სანქციების გვერდის ავლას ედავება, საქართველოში დააკავეს

საქალაქო სასამართლომ ტატიანა კურაშკევიჩს სამთვიანი წინასწარი პატიმრობა შეუფარდა

კრემლის მიერ დევნილი წყვილი

34 წლის დუბოვსკი ირკუტსკში, ეთნიკური უკრაინელების ოჯახში დაიბადა. 2024 წელს რუსეთის ხელისუფლებამ ის “ტერორისტებისა და ექსტრემისტების“ რეესტრში შეიყვანა. ოფიციალური მიზეზი, როგორც საჯარო ჩანაწერებშია მითითებული, უკრაინის შეიარაღებული ძალების მხარდაჭერას უკავშირდება.

სისხლის სამართლის საქმე აღძრულია მისი მეუღლის, ალინა საველიევას წინააღმდეგაც, რუსეთის შეიარაღებული ძალების შესახებ მცდარი ინფორმაციის გავრცელების ბრალდებით.

ვლადიმირ დუბოვსკი და ალინა საველიევა საქართველოში პირველად 2021 წელს ჩამოვიდნენ. 2022 წელს ისინი საქართველოს საზღვრის უკანონოდ გადაკვეთის ბრალდებით დააკავეს – ბრალს არ უარყოფდნენ, თუმცა აცხადებდნენ, რომ ამის მიზეზი გამოუვალი მდგომარეობა იყო.

სამი წლის შემდეგ, 2025 წელს, მას შემდეგ რაც საქართველოში თავშესაფრის მოთხოვნაზე საბოლოო უარი მიიღეს, წყვილი კვლავ დააკავეს, როდესაც ქვეყნის დატოვებას აპირებდნენ.

წინასწარი პატიმრობის ორთვიანი ვადა დუბოვსკიმ გლდანის, ხოლო საველიევამ რუსთავის ციხეში გაატარა.