საქართველოში 624 მილიონი დოლარის გათეთრების ბრალდებით ერთი ადამიანი დააკავეს. რა ვიცით ამ დროისთვის

624 მილიონი დოლარის გათეთრება

საქართველოში ერთ პირს ბრალი წაუყენეს დიდი ოდენობით ფულის გათეთრებაში. როგორც პროკურატურაში გამართულ ბრიფინგზე განაცხადეს, 2022-2024 წლებში მას უკავშირდება 624 მილიონი დოლარისა და 35 მილიონი ევროს უკანონო შემოსავლის ლეგალიზაცია.

პროკურატურაში დაკავებულის ვინაობას არ ამჟღავნებენ, თუმცა, ტვ პირველის ცნობით, ეს კომპანია “ფინის” დირექტორი კახა კოტორაშვილია. ეს ინფორმაცია, ამ ეტაპზე დადასტურებული არ არის.

გამოძიების ვერსიით, დანაშაულებრივ ჯგუფთან შეთანხმებით, დაკავებულს ქვეყანაში საბაჟოს გვერდის ავლით, შემოჰქონდა დიდი რაოდენობით დაუსაბუთებელი უცხოური ვალუტა. ფულის გადმოტანა ხდებოდა ავტომანქანებში მოწყობილი სამალავებით.

შემდეგომ, ეს ფული დაკავებულის კუთვნილ ვალუტის გადამცვლელ პუნქტში იყრიდა თავს და ამგვარად გადიოდა ოფიციალურ მიმოქცევაში.

პროკურატურის განცხადებით, ამ გზით მიღებული ფული დაკავებულს სხვადასხვა ბანკში შეჰქონდა ისე, თითქოს ის იყო კანონიერი სავალუტო საქმიანობიდან მიღებული შემოსავალი. ამ მიზნით, დაკავებული პირი კომერციულ ბანკებს წარმოუდგენდა ყალბ დოკუმენტებს ვალუტის წარმომავლობაზე.

ბანკებში კონვერტაციის შემდეგ, ეს თანხები გადაიცემოდა სხვადასხვა პირებზე, ხდებოდა ქონების შესაძენა და სხვა ფინანსური ოპერაციები, რის შედეგადაც უკანონო ფული ჩართული იყო ლეგალურ ეკონომიკურ ბრუნვაში.

საქმე აღძრულია ფულის გათეთრების მუხლით, ხოლო დაკავებულს 12 წლამდე თავისუფლების აღკვეთა ემუქრება. პროკურატურა დამატებით კითხვებს ამ ეტაპზე არ პასუხობს. მათ შორის არც იმას აკონკრეტებს, დაკავებული საქართველოს მოქალაქეა თუ არა.

თუმცა, დაკავებულის ვინაობაზე საუბრობს “TV პირველი” – ტელეკომპანიის ინფორმაციით, ფულის გათეთრების ფაქტზე დაკავებული პირი კომპანია “ფინის” დირექტორი კახა კოტორაშვილია. მედიის ცნობით, ამ მომენტისთვის, გამოძიება მისგან იმ ადამიანების გვარების დასახელებას ელოდება, ვისაც მისთვის აღნიშნული თანხა ჩამოჰქონდა.

მედია ასევე წერს, რომ კოტორაშვილი და მისი კომპანია ამ სქემისთვის უბრალოდ გამოიყენეს, ხოლო მილიარდ ლარზე მეტი თანხა სხვას ეკუთვნოდა.

გამოხმაურებები

ხელისუფლების ოპონენტები აცხადებენ, რომ ქვეყანა, საიდანაც ფული შემოჰქონდათ, დიდი ალბათობით რუსეთია და საქმე გვაქვს “საქართველოში რუსული შავი, კრიმინალური ფულის გათეთრებასთან”.

ამ ვერსიას გამოთქვამს პოლიტოლოგი გია ხუხაშვილიც. მისი აზრით, ხელისუფლება საქმის კურსში იყო, “მათ შორის, ისინი, ვინც დღესაც ხელისუფლებაში არიან”.

“ეს იყო რუსეთის მხრიდან შავი ფულით ეკონომიკური ექსპანსია, რომელიც „ფე-ეს-ბეს“ წარმატებული სპეცოპერაცია გამოდგა”, – ამის შესახებ პოლიტოლოგმა, გია ხუხაშვილმა „პალიტრანიუსს“ განუცხადა.

მისი თქმით, საქართველოში უპრეცედენტო რაოდენობის რუსული ფულის გათეთრებაზე პასუხისმგებელი არის ხელისუფლება, თავისი ყველა შესაბამისი უწყებით.

ხუხაშვილის ფიქრობს, რომ ამ ყველაფერში ეროვნული ბანკი და კომერციული ბაკებიც მონაწილეობდნენ.

პარტია “ლელოს” ერთ-ერთი ლიდერი სალომე სამადაშვილიც აღნიშნავს, რომ “ბიძინა ივანიშვილმა საქართველო გადააქცია ბინძური რუსული ფულის სამრეცხაოდ” “.

სამადაშვილი დარწმუნებულია, რომ აღნიშნული დანაშაულის მფარველობა უმაღლეს პოლიტიკურ დონეზე ხდებოდა.