პოლონეთში გამარტივებული დასაქმების წესი საქართველოს აღარ შეეხება - ახალი კანონპროექტი
დასაქმება პოლონეთში
ახალი კანონპროექტით, პოლონეთში გამარტივებული დასაქმების წესი საქართველოს აღარ შეეხება. პოლონეთის ოჯახის, შრომისა და სოციალური პოლიტიკის სამინისტროს მიერ გამოქვეყნებულ ახალ დოკუმენტში საქართველო, მათ შორის, “პოლიტიკური ვითარების” გამო ამოღებულია იმ ქვეყნების სიიდან, რომელთა მოქალაქეებსაც პოლონეთში მუშაობის დაწყება გამარტივებული წესით შეუძლიათ.
კანონპროექტის მიღების შემთხვევაში, ის მიმდინარე წლის სექტემბერ-ოქტომბერში ამოქმედდება.
სამინისტროს განცხადების მიხედვით, პრაქტიკაში ეს ნიშნავს, რომ საქართველოს მოქალაქეების დასასაქმებლად, მათ შორის, მოკლე ვადაშიც, საჭირო იქნება მუშაობის ნებართვის აღების სრული პროცედურის გავლა
სამინისტროს განცხადებაში განმარტებულია, რომ კანონპროექტით გათვალისწინებული ცვლილებები სხვა მიზეზებთან ერთად, საქართველოში პოლიტიკური სიტუაციის, უვიზო მიმოსვლის შესაძლო შეზღუდვაზე მიმდინარე სამუშაოებისა და 2024 წელთან შედარებით გაცემული დეკლარაციებისა და სეზონური მუშაობის ნებართვების რაოდენობის კლების გამო არის მიღებული.
ამჟამად პოლონელ დამსაქმებლებს საქართველოს, სომხეთის, უკრაინის, მოლდოვისა და ბელარუსის მოქალაქეების დასაქმება გამარტივებული პროცედურით შეუძლიათ, რომლითაც მუშაობის ჩვეული ნებართვის აღება საჭირო არ არის. ამისთვის დამსაქმებელმა შესაბამის უწყებებს უნდა წარუდგინოს დეკლარაცია, რომ ამ ქვეყნების მოქალაქეს 24 თვემდე პერიოდის განმავლობაში კონკრეტული სამუშაოს შესრულებას ანდობს.
ამასთან, ჩამოთვლილი ქვეყნების მოქალაქეებს ასევე შეუძლიათ, რომ 9 თვემდე პერიოდის განმავლობაში სეზონური სამუშაო შეასრულონ.
