ცხინვალის ე.წ. ხელისუფლებამ ვერ შეასრულა ექთნების ხელფასების გაზრდის დაპირება
სამხრეთ ოსეთში ექთნების გაფიცვა დაიწყო
ცხინვალის თვითგამოცხადებულმა ე.წ. ხელისუფლებამ ვერ შეასრულა დაპირება მედდების ხელფასის გაზრდის შესახებ — მოთხოვნა, რომლის საფუძველზეც მათ ივლისის ბოლოს გაფიცვა დაიწყეს.
პროტესტში მონაწილეობდა დაახლოებით 100 მედდა, ხოლო მოთხოვნა უშუალოდ ე.წ. პრეზიდენტ ალან გაგლოევისკენ იყო მიმართული.
რეგიონის მედდების ხელფასი დაახლოებით ორჯერ ნაკლებია სანიტრების ხელფასთან შედარებით. ასეთი განსხვავება მას შემდეგ გაჩნდა, რაც სანიტრების ხელფასი 60%-ით გაიზარდა, მედდებისა კი მხოლოდ 25%-ით. სწორედ ეს გახდა გაფიცვისა და საპროტესტო აქციის მიზეზი, მით უმეტეს, რომ თავდაპირველად მათ 40%-იან მატებას ჰპირდებოდნენ.
მედდების უკმაყოფილების კიდევ ერთი მიზეზი გახდა მედიკამენტების, სახვევი მასალებისა და პაციენტების მკურნალობისთვის აუცილებელი ელემენტარული პირობების მწვავე დეფიციტი.
პროტესტის დღეებში ალან გაგლოევი მედდებთან მივიდა, თუმცა მონაწილეთა თქმით, დიალოგი კონსტრუქციულად არ წარიმართა. მათი მონათხრობის მიხედვით, პრეზიდენტი აგრესიულად იყო განწყობილი და მათ შეურაცხმყოფელი სიტყვებით მიმართა. მოგვიანებით კი რამდენიმე მედდასთან ცალკე ისაუბრა და დაჰპირდა, რომ ხელფასების საკითხს ერთ კვირაში მოაგვარებდა.
გადაწყვეტილი ვადა დიდი ხანია გასულია, მაგრამ პრობლემა კვლავ მოუგვარებელია. ამის ნაცვლად, შრომისა და სოციალური დაცვის მინისტრმა ოლეგ გაგლოევმა პასუხისმგებლობა რუსეთზე გადაამისამართა. მისი თქმით, არსებობს შესაბამისი შეთანხმება, რომლის მიხედვითაც სამხრეთ ოსეთმა ეტაპობრივად უნდა გაზარდოს ბიუჯეტური სექტორის, მათ შორის — სამედიცინო პერსონალის ხელფასები ჩრდილოეთ ოსეთის დონემდე. თუმცა, როგორც ჩანს, ადგილობრივი ხელისუფლება ამას ვერ აკეთებს.
როგორ ხსნის ეს გარემოება მათ პასუხისმგებლობას და როგორ ეხმარება სიტუაციის მოგვარებაში — უცნობია.
JAMnews-ის ანონიმური წყაროების ცნობით, ცხინვალში გაგლოევმა სამართალდამცავი სტრუქტურები მედდებზე ზეწოლისთვის გამოიყენა — პროკურატურის თანამშრომლები მუქარითა და შანტაჟით ცდილობდნენ მათგან მოეპოვებინათ “გარანტიები, რომ არ შეარყევდნენ ვითარებას“.
პროტესტის მონაწილეების მოსმენისთვის მზადყოფნა გამოთქვეს ოპოზიციური ფრაქციის, “ერთიანი ოსეთის“ დეპუტატებმა, თუმცა მათი მცდელობა ე.წ. ხელისუფლების წარმომადგენლებმა შეაფერხეს. შედეგად, დაპირისპირება გამწვავდა არა მხოლოდ მედპერსონალსა და მთავრობას შორის, არამედ პარლამენტის შიგნითაც.
გაგლოევის მხარდამჭერი პარტიების საჩივრის შემდეგ, თითქოს “ერთიანი ოსეთი“ ბიუჯეტიდან “ზედმეტ“ დაფინანსებას იღებდა, სასამართლომ ოპოზიციის ანგარიშები დაბლოკა, რითაც მათი პოლიტიკური საქმიანობა შეიზღუდა.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
