"მე ვარ მდგმური და ეს არის მთავარი მოქმედი პირი" - ლომის ბოკვერი შანი დირექტორის კაბინეტში ბოლო დღეებს ატარებს. ვიდეო

ლომის ბოკვერი შანი

ლომის ბოკვერი, რომელიც ძიუდოისტმა ლაშა ბექაურმა ზოოპარკში დატოვა, დირექტორის კაბინეტში ბოლო დღეებს ატარებს. შანი უკვე გაიზარდა და მისი დატოვება კაბინეტში მალე სახიფათო გახდება, ამიტომ, სპეციალური ვოლიერი ახალი ზოოპარკის ტერიტორიაზე, დაჩქარებულ ტემპში შენდება.

“მე ვარ მდგმური და ეს არის მთავარი მოქმედი პირი კაბინეტშიო” – ამბობს ზოოპარკის დირექტორი ზურაბ გურიელიძე. მის კაბინეტში შანის 7-თვიანი ცხოვრების კვალი ყველაფერს ეტყობა, ყველა რბილი ნივთი დაღრღნილია. ეს ბოლო შარვალიღა დამრჩა მთელიო – ამბობს ზურაბ გურიელიძე ამ ვიდეოში. შანის საყვარელი გასართობი ადამიანების ფეხებზე თამაშია.

ნახეთ ნინო მემანიშვილის მიერ მომზადებული ვიდეო პატარა შანის კაბინეტურ ცხოვრებაზე.

გასული წლის დეკემბერში, ოლიმპიურმა ჩემპიონმა, ლაშა ბექაურმა სოციალურ ქსელში გაავრცელა ვიდეო, რომელშიც ჩანდა, რომ ბექაურს ავტომობილში ლომის ბოკვერი ჰყავდა. ვიდეოს საზოგადოების ნაწილის აღშფოთება მოჰყვა. ადამიანები წერდნენ, რომ კანონით აკრძალულია გარეული ცხოველების ყოლა, ველური ეგზოტიკური ცხოველებით გართობა და მათი უმიზნოდ, არაშესაფერის პირობებში ყოლა.

ამ გამოხმაურებიდან მალევე, ოლიმპიურმა ჩემპიონმა ლომის ბოკვერი ზოოპარკში მიიყვანა. შანი მაშინ ძალიან პატარა იყო, ზოოპარკის დირექციას მისთვის შესაბამისი ვოლიერი არ ჰქონდა, მისი შეშვება დიდ ლომებთან სახიფათო იყო, ამიტომ, შანიმ დირექტორის კაბინეტში დაიდო ბინა.