რუსეთში აგენტად გამოცხადებული ნიკიტა სმაგინი ამბობს, რომ ქართულმა სპეცსამსახურებმა წიგნის წარდგენა ჩაუშალეს
იკიტა სმაგინის კომენტარი
რუსი ჟურნალისტი, ავტორი და აღმოსავლეთმცოდნე ნიკიტა სმაგინი, რომელიც რუსეთის “უცხოელი აგენტების” სიაში რამდენიმე დღის წინ დაამატეს, ამტკიცებს, რომ თბილისში ქართულმა სპეცსამსახურებმა წიგნის პრეზენტაცია ჩაუშალეს. ამის შესახებ მან რუსულ დამოუკიდებელ მედიაპროექტ Слово защите-სთან ისაუბრა.
სმაგინის განმარტებით, 16 აპრილს თბილისის ერთ-ერთ წიგნის მაღაზიაში უნდა გამართულიყო მისი წიგნის პრეზენტაცია, რომელიც რუსეთისა და ირანის ურთიერთობებს შეეხებოდა. ავტორის თქმით, წიგნის მაღაზიაში, სადაც ღონისძიება იგეგმებოდა, ქართული სპეცსამსახურების წარმომადგენლები მივიდნენ და შესაძლო საფრთხის შესახებ გააფრთხილეს. ამას გარდა, სმაგინი ამბობს, რომ საზღვარზე დიდი ხნით გააჩერეს და 8 საათის განმავლობაში კითხვებს უსვამდნენ. ამ დროს რუსი ავტორი ჯერ კიდევ არ იყო “უცხოელი აგენტების” სიაში.
რას ამბობს ავტორი
“16 აპრილს ჩემი წიგნის პრეზენტაცია თბილისში უნდა ჩატარებულიყო, მაგრამ ის ჩაშალეს. თავდაპირველად საზღვარზე დიდი ხნით გამაჩერეს, დამკითხეს, რვა საათზე მეტ ხანს. შემდეგ კი ქართული სპეცსამსახურების თანამშრომლები მივიდნენ წიგნის მაღაზიაში, სადაც ღონისძიება იგეგმებოდა, გააფრთხილეს მისი [პრეზენტაციის] პოტენციური საფრთხის შესახებ. დაწესებულების ხელმძღვანელობამ გაუქმების გადაწყვეტილება მიიღო. აქედან ათ დღეში კი [რუსეთის] “უცხოეთის აგენტების” რეესტრში შემიყვანეს.
ჩემი ვარაუდით, რუსულმა მხარემ საქართველოს სტრუქტურები წინასწარ გააფრთხილა, რომ ჩემს “უცხოეთის აგენტად” გამოცხადებას აპირებდნენ. ეს მაფიქრებინებს, რომ რუსულმა მხარემ ქართული მხარე შესაძლოა ჩემ მიმართ არსებული გეგმების შესახებ წინასწარ გააფრთხილა. საქართველოში სწორედ “უცხოეთის აგენტების” არშეშვების შემთხვევები ბოლო სამ წელში ხომ არც თუ ისე ცოტა იყო.” – ამბობს სმაგინი.
სმაგინის აზრით, რუსეთში მისი აგენტების სიაში დამატება უკავშირდება ფაქტს, რომ საკუთარ წიგნში რუსეთ-ირანის ურთიერთობასთან დაკავშირებით წერს ფაქტებს, რომ რუს დიპლომატებს ირანელი კოლეგები და ამ ქვეყნის ხელისუფლება არ მოსწონთ. მისი აზრით, ერთ-ერთი მიზეზია ისიც, რომ წიგნში ნახსენები აქვს, როგორ მოხალისეობდა ციხეში გარდაცვლილი რუსი ოპოზიციონერის, ალექსეი ნავალნის 2013 წლის მოსკოვის მერის არჩევნების კამპანიისთვის.
