რუსეთის საგარეო დაზვერვა: EU საქართველოში დემონსტრანტებს დღიურად €120 ევროს გადაუხდის
რუსეთის საგარეო დაზვერვა
რუსეთის საგარეო დაზვერვის (СВР) სამსახური ირწმუნება, რომ ევროკავშირს საქართველოს “გათავისუფლება” არ სურს და ნებისმიერ ფასად აპირებს ქვეყნის “დემოკრატიული ევროინტეგრაციის გზაზე დაბრუნებას”. რუსეთის დაზვერვის თქმით, ევროკავშირი მზად არის დემონსტრაციების მონაწილეებს დღეში 120 ევრო გადაუხადოს.
რა წერია განცხადებაში
“ევროკავშირის პროგრამის Georgian Youth for Europe [ქართველი ახალგაზრდები ევროპისთვის] ფარგლებში ახალგაზრდა ქართველებს 50 000 ევრომდე ოდენობის გრანტებს შესთავაზებენ “პროგრესული” პროექტების რეალიზაციისთვის. სახსრების გამოყოფის მთავარი კრიტერიუმია – ავტორების დასავლეთისადმი ლოიალურობა.
თბილისში ევროკავშირის წარმომადგენლობას მნიშვნელოვანი სახსრები გადაეცა მანიფესტაციების შენარჩუნებისთვისა და კოორდინაციისთვის. დაგეგმილია ანტისამთავრობო გამოსვლების თითოეული მონაწილისთვის დღიური “სამუშაოსთვის” 120 ევროს გადახდა. საქართველოს ხელისუფლების მიერ ძირგამომთხრელი აქციების დაფინანსების ევროკავშირის არხების დაბლოკვის მცდელობების შემთხვევაში, მუშავდება სომხეთში ევროკავშირის ქვეყნების საელჩოებიდან თბილისში ნაღდი ფულის ჩატანის ვარიანტი.
ბრიუსელს დაქვემდებარებული ქართული და ევროპული მედიასაშუალებები და არასამთავრობო ორგანიზაციები ორიენტირებული არიან ბლოგერებისთვის, ჟურნალისტებისთვის, IT სპეციალისტებისთვის, საქართველოში გადასული რუსებისთვის “ტვინის გამორეცხვაზე” – ისტორიებით “ერთიან ევროპასთან თანამშრომლობის უპირატესობებზე” და “ქართული ოცნების” მიერ არჩეული “პოლიტიკის პრორუსული ვექტორის” ჩიხზე.”
გასული წლის სექტემბერში, რუსეთის საგარეო დაზვერვა ირწმუნებოდა, რომ აშშ ეუთო/ოდირთან (ODIHR/OSCE) ერთად აპირებს საქართველოს საპარლამენტო არჩევნებში ჩარევას, რათა არ დაუშვას არჩევნებში ქართული ოცნების გამარჯვება.
განცხადებაში ვკითხულობთ, რომ ეუთო/ოდირი არჩევნებამდე 20 დღით ადრე გამოაქვეყნებს შუალედურ ანგარიშს, რომლის დასკვნაშიც “ეწერება”, რომ ქვეყანაში არ არსებობს პირობები თავისუფალი და სამართლიანი არჩევნების ჩასატარებლად. რუსეთის დაზვერვის მტკიცებით, არჩევნების შედეგების პირველადი შედეგების გამოცხადების შემდეგ გავრცელდება განცხადება, რომ ელექტორალური პროცესი არ იყო დემოკრატიულ სტანდარტებთან შესაბამისობაში.
საქართველოს საპარლამენტო არჩევნებში აშშ-ს ჩარევასთან დაკავშირებით ეს რუსეთის საგარეო დაზვერვის სამსახურის პირველი განცხადება არ იყო. 26 აგვისტოს ისინი ამტკიცებდნენ, რომ აშშ საქართველოში “ფერად რევოლუციას” გეგმავს.
ასევე, ანგარიშში ნათქვამია, რომ ქართული არასამთავრობო ორგანიზაციები არჩევნებზე დაკვირვებისთვის მობილიზებას ახდენენ და მათ გაყალბების “ეჭვგარეშე ფაქტების” იდენტიფიცირება და დაფიქსირება ევალებათ.
მანამდე, 7 ივლისს, რუსეთის საგარეო დაზვერვის სამსახურმა (СВР) განაცხადა, რომ აშშ საქართველოში მთავრობის ცვლილებას გადატრიალების გზით გეგმავს. განცხადება СВР-მა საკუთარ გვერდზე გამოაქვეყნა და ის დიდწილად ოპოზიციისა და პრეზიდენტ სალომე ზურაბიშვილის დისკრედიტაციას ემსახურება.
აშშ-ის სახელმწიფო დეპარტამენტის პრესსპიკერმა, მეთიუ მილერმა განაცხადა, რომ რუსეთის ბრალდებები სრული სიცრუე და აბსურდია.
“და მე უბრალოდ აღვნიშნავ იმ ქვეყნის – რუსეთის – ირონიას, რომელიც უკანონოდ ახდენს საქართველოს 20%-ის ოკუპაციას და ამ აბსურდულ ბრალდებებს სხვა ქვეყნის მიმართ აყენებს.“ – თქვა მაშინ მეთიუ მილერმა.
