არჩევნები 2024. ონლაინ ტრანსლაცია

ოპოზიციური გაერთიანებები, „ერთიანობა – ნაციონალური მოძრაობა“ და „კოალიცია ცვლილებებისთვის“ აცხადებენ, რომ არ აღიარებენ 2024 წლის 26 ოქტომბრის საქართველოს საპარლამენტო არჩევნების შედეგებს. მესამე კოალიციას “ძლიერი საქართველო” არჩევნების არ აღიარებაზე მკაფიოდ არ განუცხადებია, თუმცა, ლიდერებმა თქვეს, რომ “არ აპირებენ ეს არჩევნები ვინმეს გაატანონ”.

ასევე ცნობილია ყოფილი პრემიერის, გიორგი გახარიას პარტია „საქართველოსთვის“ პოზიცია. პარტიაში ისაუბრეს არჩევნების გაყალბების მეთოდებზე და თქვეს, რომ ჯერ დაელოდებიან საბოლოო შედეგებს.

განცხადებები ოპოზიციური პარტიების ლიდერებმა არჩევნების დასრულებიდან და წინასწარი შედეგების გამოცხადებიდან რამდენიმე საათის შემდეგ, გვიან ღამით გააკეთეს [დაახლოებით 01:00 – 01:30 საათის შუალედში].

ამ განცხადებებს წინ უსწრებდა სამი ოპოზიციური კოალიციის “ერთიანობა – ნაციოანლური მოძრაობის”, “კოალიცია ცვლილებებისთვის” და “ძლიერი საქართველოს” ლიდერების შეხვედრა დახურულ კარს მიღმა.

ნიუ იორკში ამომრჩევლის რიგები არ იძვრის. მიუხედავად იმისა, რომ არჩევნებში მონაწილეობის მისაღებად მოქალაქეებმა უამრავი კილომეტრი გაიარეს და საათებია რიგში დგანან, ხმის მიცემას ვერ ახერხებენ. ადგილზე მყოფი პირების თქმით, უკვე უბანზე შესულ ამომრჩევლებს სთხოვენ ამომრჩევლის ნომრის/კოდის წარდგენას, მაგრამ სისტემა, სადაც რიგის ნომრის გადამოწმება შეიძლება, გათიშულია.

“ვერ შეხვალ ხმის მისაცემად, თუ არ იცი შენი ნომერი და ნომერს ვერ გაიგებ, რადგან სისტემა არ მუშაობს”, – ამბობს ფეისბუქზე გავრცელებულ ვიდეოში ლილი მარელა.

“წინასაარჩევნო პერიოდში არსებული გარემოსა და არჩევნების დღეს გამოყენებული გაყალბების სქემების, ასევე ამომრჩევლის ნებაზე უპრეცედენტო ზემოქმედებისა და ძალადობის ფაქტების ანალიზის შედეგად მივიჩნევთ, რომ ცენტრალური საარჩევნო კომისიის მიერ გამოქვეყნებული წინასწარი შედეგები არ ასახავს საქართველოს მოქალაქეების ნებას. ჩვენ გავაგრძელებთ შედეგების ბათილობის მოთხოვნას”, – აცხადებენ ქართული სამოქალაქო ორგანიზაციების კოალიციურ სადამკვირვებლო მისიაში – “ჩემი ხმა”. განცხადება წაიკითხეთ ვრცლად.

თეა თუთბერიძე ლონდონიდან ავრცელებს ვიდეოს, სადაც ყვება, თუ როგორ მიმდინარეობს საარჩევნო პროეცსი. მისი თქმით, უბანზე, სადაც 3000-მდე ამომრჩეველია რეგისტრირებული, ხმის მიცემის პროცედურა ჭიანურდება.

“აქ დადიან საელჩოს ე.წ. თანამშრომლები. რატომღაც, რომ ავიკლო მთელი საელჩო, 6 საათის მერე არავინ არ გიპასუხებს, მაგრამ სამაგიეროდ ეხლა დადიან უბნის ტერიტორიაზე და ტექნიკურ სამუშაოებს ატარებენ, როგორც გამომიცხადეს”, – ამბობს თუთბერიძე.

მისი თქმით, ცესკო-ს თავმჯდომარემ განუცხადა, რომ ვერაფერს იზამს, რადგან ცესკო-მ გამოგზავნა 1000 კაცზე ერთი რეგისტრატორი. იმისთვის, რომ პროცესი დაეჩქარებინათ, ამომრჩევლებმა თავად დააორგანიზეს რიგები და არ აპირებენ დაშლას, სანამ ყველანი ხმას არ მისცემენ.  თუთბერიძის თქმით, წინ გაატარეს მოხუცები, ბავშვიანი მოქალაქეები, ორსულები, ისინი, ვინც სხვა ქალაქიდან ჩამოვიდა და უკან დასაბრუნებელი ბილეთები ჰქონდათ და უნდა მოესწროთ ხმის მიცემა.

“ეს ადამიანები გგონიათ, რომ სადმე წამსვლელები არიან? ეს ხალხი არსად არ წავა. ის, რასაც აცხადებენ “ქართული ოცნების” წარმომადგენლები, ეს არის ტყუილი. იმიტომ, რომ ემიგრანტების უმეტესობა კიდევ აქ დგანან, რომელსაც არ მიუცია ხმა. აქვთ იმედი ალბათ, რომ დავიშლებით და წავალთ სახლში, მაგრამ არავინ არ აპირებს წასვლას”, – ამბობს თუთბერიძე.

ცენტრალური საარჩევნო კომისია საქართველოს საპარლამენტო არჩევნების წინასწარ შედეგებს აქვეყნებს. ჯამში 3,111 უბნიდან დათვლილია 2,239 უბნის მონაცემები. ამ შედეგების მიხედვით კი მთავრობის დაკომპლექტებას “ქართული ოცნება” ახერხებს. ოპოზიციიდან კი საპარლამენტო ბარიერის დაძლევას მხოლოდ 4 პარტია ახერხებს.

ცესკო-ს მონაცემების მიხედვით უბნების 71.97 %-ზე ბარიერგადალახული პარტიების შედეგები ასე გამოიყურება:

4. კოალიცია ცვლილებისთვის გვარამია მელია გირჩი დროა – 11.185 %

5. „ერთიანობა-ნაციონალური მოძრაობა“ – 9.852 %

9. „ძლიერი საქართველო-ლელო, ხალხისთვის, თავისუფლებისთვის!“ – 9.011 %

25. „გახარია საქართველოსთვის“ – 8.224 %

41. “ქართული ოცნება” – 53.028 %

ცენტრალური საარჩევნო კომისიის მონაცემები ონლაინ რეჟიმში ვებ-გვერდზე https://results.cec.gov.ge/ ქვეყნდება.

მას შემდეგ, რაც საარჩევნო უბნები დაიხურა და სამმა ტელევიზიამ ეგზიტპოლის შედეგები გამოაქვეყნა, “ქართულმა ოცნების” ლიდერებმა, მათ შორის, საპატიო თავმჯდონმარემ, ბიძინა ივანიშვილმა, პარტიის ოფისთან მოწყობილი სცენიდან ამომრჩევლებს მიმართეს და გამარჯვება მიულოცეს.

ივანიშვილმა თქვა: “მადლობა მინდა გადაგიხადოთ მთელს საქართველოს, რომელიც ასეთი ერთგულებით მოგვყვება უკვე მეოთხე არჩევნებია – იშვიათია ასეთი შემთხვევა მსოფლიოში, რომ ერთი და იგივე პარტია ასეთ რთულ სიტუაციაში აღწევდეს ასეთ წარმატებებს…. გარწმუნებთ და ვარწმუნებთ ჩვენს საზოგადოებას, ჩვენს ამომრჩეველს… გასაგებია, რომ ჩვენზე მდიდარი ქვეყნები არსებობენ, ჩვენზე დიდი ხნის დემოკრატია აქვთ, მაგრამ ჩვენი საზოგადოება არ არის არცერთ მდიდარ ქვეყანაზე ნაკლები. აი, სწორედ ამ შეგნებით, იმ გაგებით, ვის უნდა მისცენ ხმა და საით უნდა წაიყვანონ ქვეყანა. გარწმუნებთ, რომ უახლოეს 4 წელიწადში ჩვენ გავაკეთებთ ძალიან ბევრს და კიდევ შემდეგ 4 წელწადში საქართველო იქნება ყველაზე წარმატებული ქვეყნების რიგში…” – თქვა მან.

პროსახელისუფლებო ტელეკომპანია „იმედის“ დაკვეთით ჩატარებული ეგზიტპოლის მიხედვით მმართველ პარტიას 56 პროცეტზე მეტი აქვს,  თუმცა საპირისპირო შედეგებს აჩვენებს „მთავარი არხისა“ და „ფორმულისთვის“ ჩატარებული კვლევები.

“ქართული ოცნების” პარტიის ოფისის ეზოში ზეიმი უჩვეულოდ ხანმოკლე დროში დასრულდა და ერთ საათზე მოკლე დროში დაიშალა. ტრადიციულად, “ქართული ოცნება” არჩევნებში გამარჯვების შემდეგ ფოიერვერკს უშვებს, თუმცა ამჯერად ეს ასე არ ყოფილა.

ჟურნალისტმა მარიამ ნიკურაძემ, რომელმაც არჩევნებს თბილისში, პირველი სკოლის შენობაში, მთაწმინდის ოლქის მე-7 უბანში აკვირდებოდა, თავისი უბნის შედეგები გამოაქვეყნა:

●  საბურთალო, 22 უბანი

●

საქართველოში საპარლამენტო არჩევნები 2024 დასრულდა – ქვეყნის მასშტაბით ყველა საარჩევნო უბანზე ხმის მიცემა შეწყდა. საარჩევნო პროცესი გრძელდება საზღვარგარეთ გახსნილ უბნებზე.

კენჭისყრის დასრულებისთანავე სამმა ტელეკომპანიამ – ოპოზიციურმა “მთავარმა არხმა”, ოპოზიციურმა “ფორმულამ” და სამთავრობო “იმედმა” მათი დაკვეთით შესრულებული ეგზიტპოლის პირველადი შედეგები გამოაქვეყნეს. “მთავარი არხისა” და “ფორმულას” შედეგების მიხედვით 5%-იანი ზღვარი გადალახეს შემდეგმა საარჩევნო სუბიექტებმა: “კოალიცია ცვლილებებისთვის”, “ერთიანობა – ერთიანი ნაციონალური მოძრაობა”, “ძლიერი საქართველო”, “გახარია – საქართველოსთვის” და “ქართული ოცნება”. “იმედის” მონაცემებით კი ბარიერს ვერ გადალახავს “გახარია – საქართველოსთვის”.

Harris X:

Harris X-ის მიერ, ტელეკომპანია „მთავარის“ დაკვეთით ჩატარებული ეგზიტპოლის შედეგების მიხედვით, საარჩევნო სუბიექტებს შორის ხმები ასე ნაწილდება:

4. “კოალიცია ცვლილებებისთვის” – 18%

5. “ერთიანობა – ერთიანი ნაციონალური მოძრაობა” – 13%

9. “ძლიერი საქართველო” – 9%

25. “საქართველოსთვის” – 8%

41. “ქართული ოცნება” – 42%

შედეგები 18:00 საათის მონაცემებს ასახავს.

GORBI

სახელისუფლებო ტელეკომპანია „იმედის“ დაკვეთით, „გორბის“ მიერ ჩატარებული ეგზიტპოლის მიხედვით საპარლამენტო არჩევნების შედეგები ასე გამოიყურება.

18:30 საათის მონაცემები:

4. “კოალიცია ცვლილებებისთვის” – 12.6%

5. “ერთიანობა – ერთიანი ნაციონალური მოძრაობა” – 11.6%

9. “ძლიერი საქართველო” – 7.0%

25. “გახარია – საქართველოსთვის” – 4.8%

41. “ქართული ოცნება” – 56.1%

ტელეკომპანია “იმედის” ინფორმაციით, ცდომილების ზღვარი +- 2.5 პროცენტია.

EDISON RESEARCH

Edison Research-ის ეგზიტპოლის შედეგებით, რომელიც ტელეკომპანია „ფორმულას“ დაკვეთით ჩატარდა, ხმები ასე ნაწილდება:

“კოალიცია ცვლილებებისთვის” – 16.7%

“ერთიანობა – ერთიანი ნაციონალური მოძრაობა” – 16.7%

“ძლიერი საქართველო” – 10.3%

“გახარია – საქართველოსთვის” – 8.2%

“ქართული ოცნება” – 40.9%

კვლევა Edison Research-მა ტელეკომპანია “ფორმულას” დაკვეთით ჩაატარა და ის 18:00 საათის მდგომარეობით არსებულ მონაცემებს ასახავს.

პრემიერ-მინისტრი ირაკლი კობახიძე მოუწოდებს მხარდამჭერებს არჩევნებში მონაწილეობისკენ, რადგან წინასწარი პროგნოზის მიუხედავად, მისი თქმით, “ქართული ოცნება” ამ ეტაპზე ვერ იღებს კონსტიტუციურ უმრავლესობას.

“რაც შეეხება ჩვენს მოლოდინებს, ჩვენ უკვე გვაქვს გარანტირებული, დიდი უპირატესობით დამაჯერებელი გამარჯვება, ამას მოწმობს ის მონაცემები, რომლებიც არის წარმოდგენილი, თუმცა ჩვენ გვაქვს უფრო მაღალი ამბიცია, – განაცხადა კობახიძემ პარტიის ოფისში გამართულ ბრიფინგზე. მისი თქმით, „ჩვენ გვინდა მივიღოთ საკონსტიტუციო უმრავლესობა, რაც ამ ეტაპზე ჯერჯერობით არ არის გარანტირებული. ეს არის ჩვენი პოლიტიკური ამოცანა”, – თქვა ირაკლი კობახიძემ.

არსებული ინფორმაციით, მთავრობის ადმინისტრაციის შენობაში სამართალდამცავების მობილიზებაა. შესაბამის ვიდეოს მოქალაქე სოციალურ ქსელში ავრცელებს.

ვიდეოში ჩანს როგორ შედის მთავრობის ადმინისტრაციის ეზოში პოლიციის რამდენიმე ავტობუსი და სამარშრუტო ტაქსი, სადაც, სავარაუდოდ, სამართალდამცავები სხედან. „ინტერპრესნიუსმა“ საკითხის დაზუსტება შინაგან საქმეთა სამინისტროში სცადა, თუმცა უწყებაში ამ ეტაპზე კომენტარს არ აკეთებენ.

მატილდა გვარლიანი ნიუ იორკში, საარჩევნო უბანთან რიგში ფოტო: Hieromonk Irineos

ცესკოს მონაცემებით, 17:00 საათისთვის მთელი საქართველოს მასშტაბით ამომრჩეველთა აქტივობა 50.6%-ია. ხმა სულ 1 768 816 მოქალაქემ მისცა.

2020 წლის საპარლამენტო არჩევნებში 17:00 საათისთვის ამომრჩეველთა აქტივობა იყო – 45.77%

2016 წელს – 42%

2012 წელს – 53%

მედიასაშუალება TOK TV-ის ინფორმაციით, გარდაბნის მე-4 საარჩევნო უბანზე ნაციონალური მოძრაობის წარმომადგენელი და ქართული ოცნების დამკვირვებელი ერთმანეთს დაუპირისპირდნენ. მედიის წყაროს ცნობით, “ქართული ოცნების” წარმომადგენელმა “ნაციონალური მოძრაობის” წარმომადგენელს საარჩევნო უბნის გარეთ ჩხუბისას აგური ჩაარტყა.

დაპირისპირების შესახებ ინფორმაცია დაადასტურეს “ნაციონალური მოძრაობის” ადგილობრივ ოფისში. მათი ცნობით – მათი პარტიის წევრი ძლიერ არ დაშავებულა.  TOK TV-მ ფაქტის შესახებ დამატებითი ინფორმაციის მიღება შინაგან საქმეთა სამინისტროდან სცადა, თუმცა უწყება დაახლოებით ორი საათია ფაქტს არც ადასტურებს და არც უარყოფს.

ჩინეთში დასრულდა საარჩევნო პროცესი. უბანზე მისული 57 ამომრჩევლიდან 47-მა ოპოზიციას დაუჭირა მხარი, 10-მა კი “ქართულ ოცნებას”.

საარჩევნო სუბიექტებს შორის პროცენტულად ხმები ასე გადანაწილდა:

კოალიცია ცვლილებებისთვის – 18 ხმა (31,6%)

ერთიანობა – ნაციონალური მოძრაობა – 4 ხმა (7,01%)

ძლიერი საქართველო – 10 ხმა (17.5%)

საქართველოსთვის – 8 ხმა (14.03)

ქართული ოცნება – 10 ხმა (17.5%)

ადიგენში, N7 ზანავის საარჩევნო უბანზე დამკვირვებელი „მედია თავისუფლებისთვის”, გოჩა ბერიძე, ამომრჩეველს კაბინაში შეჰყვა და ხმის მიცემის პროცესში დაეხმარა.

“სამხრეთის კარიბჭის” ინფორმაციით, ახალქალაქში პირველ უბანზე კენჭისყრის პროცესი დარღვევებით მიმდინარეობს.  გამოცემა ავრცელებს ფოტოს, სადაც აღწერილია, თუ როგორ უყურებს დამკვირვებელი ამომრჩეველს ბიულეტინის შემოხაზვის დროს. მედიასაშუალება აღნიშნავს იმასაც, რომ უბანთან შეინიშნება უცხო პირების მობილიზებაც.

ზუგდიდში, თაბუკაშვილის ქუჩაზე მდებარე მე-9 საარჩევნო უბანზე სიტყვიერი და ფიზიკური დაპირისპირება მოხდა.

კოალიცია „ცვლილებისთვის” წევრმა, სალომე მელიამ “ინტერპრესნიუსს” განუცხადა, რომ მე-9 უბანთან მის მეუღლესა და ბიძაშვილის ფიზიკურად და სიტყვიერად “ქართული ოცნების” მხარდამჭერები გაუსწორდნენ.

„ჩემი მეუღლე და ბიძაშვილი უბნის გარეთ იდგნენ, მე კი უშუალოდ უბანზე შემოვლას ვაწარმოებდი, პროცესი რომ მენახა. მე-9 უბანი რადგანაც დატვირთულია, ჩემმა დამკვირვებელმა მოსვლა მთხოვა, მოვედი და გარეთ უცებ ჩოჩქოლი ატყდა. ჩემი მეუღლე და ბიძაშვილი დაახლოებით, 25-მა ზონდერმა მოსაკლავად გაიმეტა, ეს იყო საშინელება. ვიხვეწებოდით, რომ პატრული გამოეძახათ და არ გამოიძახეს. მოგვიანებით მოვიდა პოლიცია. დაპირისპირების რეალური მიზეზი არ ვიცი”, – განაცხადა სალომე მელიამ.

ავსტრალიაში საარჩევნო პროცესი დასრულდა, მსოფლიოს სხვა ქალაქებში კი ხმის მიცემის პროცედურა გრძელდება. ამომრჩევლებს საკმაოდ დიდ რიგებში უწევთ დგომა ხმის მისაცემად:

ცესკოს ოფიციალური მონაცემებით 15 საათისთვის ამომრჩეველთა აქტივობა 41.62 პროცენტია. წინა წლების შედეგი კი ასეთია:

2012 წელი 15 საათი – 44.99%
2020 წელი 15 საათი – 36.45%

გლდანში, მე-60 საარჩევნო უბანზე სიტყვიერი და ფიზიკური დაპირისპირება მოხდა. „ერთიანი ნაციონალური მოძრაობის“ თბილისის საკრებულოს წევრის, ირაკლი ეძგვერაძის თქმით, ვითარება მას შემდეგ დაიძაბა, რაც ადგილზე მივიდა „ქართული ოცნების“ აქტივისტი, შაკო კუჭაშვილი და პროვოკაციების მოწყობას შეეცადა.

„მინდა საზოგადოებას ვუთხრა, რომ ეს კონკრეტული პიროვნება, სუს-ის აგენტი მომაგრებულია ამ უბანზე. იციან, რომ გლდანელები და ოპოზიცია ყოველთვის იგებენ არჩევნებს ამ უბანზე. ის ადამიანებთან მიდის და შეურაცხყოფას აყენებს“, – განაცხადა ეძგვერაძემ.

საარჩევნო პროცესი მიმდინარეობს გერმანიაში, ქალაქ ფრანკფურტშიც. ფეისბუქზე საარჩევნო უბანთან ამომრჩეველთა რიგის ვიდეოს ავრცელებს ერთერთი მომხმარებელი თამარ აბაშმაძე:

მარნეულის 69-ე უბნის მონაცემები ბათილად ცნეს საქმეზე დაიწყო გამოძება არჩევნების გაყალბების მუხლით – სამართლის კოდექსის 164-ე მე-3 პრიმა მუხლით.

საქმე ეხება სოციალურ ქსელში გავრცელებულ ვიდეოს, სადაც ჩანს, როგორ ყრის პირი რამდენიმე ბიულეტენს საარჩევნო ყუთში. ამ უბანზე კენჭისყრის პროცესი ძველი წესით მიმდინარეობდა და არა ელექტრონულად.

ფოთის მე-15 საარჩევნო უბანზე, რეგისტრატორი, 47 წლის ნიკოლოზ ლომინაძე შეუძლოდ გახდა, იგი სასწრაფო დახმარების ჯგუფმა გადაიყვანა საავადმყოფოში, თუმცა ახალგაზრდა კაცის გადარჩენა ვერ მოხერხდა, იგი გულის შეტევით გარდაიცვალა.

ფოთის 70-ე საარჩევნო კომისიის თავმჯდომარის, სალომე როდონაიას განცხადებით, მომხდარის გამო 15-ე საარჩევნო უბანზე დროებით შეჩერებული იყო კენჭისყრა, თუმცა მალევე განახლდა.

სალომე კენჭიაშვილს, “წყლის ჭავლთან მოცეკვავე” გოგოს საარჩევნო უბანზე თავს დაესხნენ

სალომე კენჭიაშვილს, “წყლის ჭავლთან მოცეკვავე გოგოს”, რომელიც დამკვირვებლად მუშაობს, ერთ-ერთ უბანზე ახალგაზრდა კაცი დაესხა თავს.

როგორც სალომე ყვება, ის კაცს მისი სტატუსის შესახებ ეკითხებოდა, რა დროსაც კაცმა ხელი ჰკრა:

“მითხრა, წადი შენს საქმეს მიხედეო. ვუთხარი, რომ ჩემს საქმეს ვაკეთებდი და იმიტომ ვუსვამდი კითხვებს და დავიწყე ვიდეოს გადაღება. ხელი მკრა, მეც ფეხი ჩავარტყი, ისევ მკრა ხელი, გამოვიძახე პოლიცია და იმან აქეთ დამიძახა მოძალადე”.

გაყალბების ერთერთი მთავარი სქემა არის ეს –  წერტილი აქვს ოცნების ნომერს დასმული და თუ ოცნებას გააფერადებთ ითვლება ხმა, მაგრამ თუ სხვას გააფერადებთ, ამ წერტილის გამო გაბათილდება ბიულეტენი. ამიტომ კარგად დააკვირდით ბილეტენს, სანამ გააფერადებთ და თუ წერტილს დაინახავთ, მოითხოვეთ ახალი.

ერთი ახმეტაში (მე-17), მეორე ჩუღურეთში (მე-3 უბანი), მესამე კი ტყიბულში (1-ლი უბანი) დაფიქსირდა.

ორგანიზაციის ხელმძღვანელი ნინო დოლიძე ამბობს, რომ ერთ შემთხვევაში დააფიქსირეს თანხის ოდენობაც და ეს შეადგენდა 100 ლარს.

ISFED-ის მიერ დაფიქსირებული სხვა დარღვევები 12 საათისთვის:

* უბნების მხოლოდ 75% გაიხსნა დროულად

* “სამართლიანი არჩევნების” დამკვირვებლები არ შეუშვეს 2 სხვადასხვა პენიტენციურ დაწესებულებაში

* უბნების გარეთ შეინიშნება კოორდინატორების მობილიზება

* ზოგიერთ უბანზე რეგისტრატორის მაგიდები კედლებთან ისეა ახლოს დგას, რომ დამკვირვებელს უჭირს დააკვირდეს და აღკვეთოს კარუსელის პოტენციური მცდელობები

* ზოგიერთ ამომრჩეველს ერთდროულად გადასცეს 2 ბიულეტენი

ცესკო-ს თავმჯდომარე გიორგი კალანდარიშვილი მარნეულის საოლქო საარჩევნო კომისიას მიმართავს, გაერკვეს მარნეულის 69-ე უბანზე მომხდარში და სათანადო გადაწყვეტილება მიიღოს.

საქმე ეხება სოციალურ ქსელში გავრცელებულ ვიდეოს, სადაც ჩანს, როგორ ყრის პირი რამდენიმე ბიულეტენს საარჩევნო ყუთში. ამ უბანზე კენჭისყრის პროცესი ძველი წესით მიმდინარეობდა და არა ელექტრონულად.

კალანდარიშვილი შემაშფოთებელს უწოდებს ამ უბანზე მომხდარ ფაქტს. მან ასევე შინაგან საქმეთა სამინისტროს მოუწოდა საქმეზე წარმოება რაც შეიძლება სწრაფად დაიწყოს.

„საარჩევნო ადმინისტრაცია არ დაუშვებს ამ ინფორმაციის დადასტურების შემთხვევაში იმის შესაძლებლობას, რომ ასეთმა იზოლირებულმა, მართულმა, თუ მანიპულაციურმა შემთხვევებმა დააზიანოს ის მრავალთვიანი ძალისხმევა, რომელიც კენჭისყრის დღესთან მიმართებით ჩავდეთ. ყველა ასეთი შემთხვევა, შეესაბამება თუ არა ის სინამდვილეს, აზიანებს საარჩევნო გარემოს, კენჭისყრის დღის მთლიანობას, აზიანებს ინსტიტუციის რეპუტაციას და იწვევს კითხვის ნიშნებს შედეგებთან მიმართებით“,- განაცხადა გიორგი კალანდარიშვილმა.

ჟურნალისტები ადგილიდან გადმოსცემენ, რომ აღნიშნული უბანი მარნეულში დაიხურა.

აქტივობა 12 საათისთვის 22. 22 პროცენტია. 776 726 ხმა.

შედარება წინა არჩევნებთან:

19.41 –  2020 წლის საპარლამენტო არჩევნებზე 12 საათისთვის.

25.88 –  2012 წელს 12 საათისთვის.

მარნეულის 69-ე უბანი :

ზუგდიდი:

რუსთავი:

1990 წლიდან 2024 წლის 26 ოქტომბრის ჩათვლით არჩევნები საქართველოში 35-ჯერ გაიმართა:

__ საკანონმდებლო ორგანოს არჩევნები – 11,
__ საპრეზიდენტო არჩევნები – 7,
__ ადგილობრივი თვითმმართველობის არჩევნები – 8,
__ აფხაზეთის ავტონომიური რესპუბლიკის წარმომადგენლობითი ორგანოს არჩევნები – 1,
__ აჭარის ავტონომიური რესპუბლიკის წარმომადგენლობითი ორგანოს არჩევნები – 7,
__ რეფერენდუმი – 2 (2003 წელს პარლამენტის წევრთა რაოდენობის შემცირების შესახებ,
__ პლებისციტი – 1 (2008 წლის პლებისციტი ჩრდილოატლანტიკურ ალიანსში გაწევრიანების შესახებ. ამომრჩეველთა 77 პროცენტმას უპასუხა დიახ საქართველოს ნატოში გაწევრიანების პერსპექტივას)).

ეუთოს სადამკვირვებლო მისიის ხელმძღვანელმა პია კაუმამ და ეუთოს სპეციალურმა კოორდინატორმა პასკალ ალიზარდმა თბილისის სახელმწიფო უნივერსიტეტში გახსნილი მეორე საარჩევნო უბანი მოინახულეს, დააკვირდნენ ელექტრონული წესით ხმის მიცემის პროცესს.

სადამკვირვებლო მისია 2024 წლის საპარლამენტო არჩევნების დღის შეფასებას ჟურნალისტებს ხვალ გააცნობს.

„ჩვენი მთავარი მისიაა, რომ დავრწმუნდეთ, რომ ხალხის რეალური ნება აისახება შედეგებში არჩევნების დღეს და ისინი მისცემენ ხმას ზეწოლის გარეშე“, – ამბობს კაუმა.

შეგახსენებთ, რომ საარჩევნო პროცესს აკვირდება 76 საერთაშორისო ორგანიზაციის 1700-ზე მეტი და 111 ადგილობრივი ორგანიზაციის 23 000-ზე მეტი დამკვირვებელი. აკრედიტებულია 199 მედიასაშუალების 2800-ზე მეტი წარმომადგენელი.

პირველი საარჩევნო უბანთან პრეზიდენტი სალომე ზურაბიშვილი მივიდა: “მე ხმა მივეცი არა ვის, არამედ რას, ამჯერად. ხმა მივეცი ახალ საქართველოს, იმ საქართველოს, რომლის გულისთვისაც ამ ქვეყანაში 22 წლის წინ ჩამოვედი, რომელზეც ჩემი წინაპრები ლოცულობდნენ. მე მივეცი ხმა იმ საქართველოს, რომელზეც, დარწმუნებული ვარ, ლოცულობს მთელი საქართველო. საღამოს ჩვენ ვიქნებით ყველანი გამარჯვებულები. დამარცხებული არავინ იქნება, იმიტომ, რომ გაიმარჯვებს საქართველო!“

ბიძინა ივანიშვილი, “ქართული ოცნების” საპატიო თავმჯდომარე საარჩევნო უბანთან კვლავ ომით დაემუქრა ამომრჩეველს: “არჩევანი გვაქვს ძალიან მარტივი გასაკეთებელი. ან ვირჩევთ მთავრობას, რომელიც მოგემსახურებათ თქვენ, ქართველ ხალხს, სამშობლოს, იზრუნებს ქვეყანაზე, ან ვირჩევთ უცხო ქვეყნის აგენტურას, რომელიც მხოლოდ უცხო ქვეყნის დავალებებს შეასრულებს. თანაც, დღევანდელი არჩევნები იმითაა გამორჩეული, რომ უცხო ქვეყანას გამოკვეთილი ინტერესები აქვს, რომელიც შეუძლია მყისიერად დაავალოს აგენტურას, თუ მოვახერხებთ და მათ ავირჩევთ. მოგეხსენებათ, სამეზობლოში ომია. იმ ქვეყანას, რომელიც აგენტურას მართავს და რომელიც დღეს, სამწუხაროდ, პოლიტიკაშია, სასწრაფო დავალება აქვს, რომ როგორმე საქართველო საომარ მოქმედებებში ჩაერთოს. გარწმუნებთ, ამას დიდი დრო არ დასჭირდება. ეს მოხდება მყისიერად”.

ასევე ივანიშვილმა ოპოზიციას კრიმინალები და “აგენტურა” უწოდა და თქვა, რომ “უნდა მოვახერხოთ ამ არჩევნებით რომ პოლიტიკა გავასუფთაოთ კრიმინალისგან”.

ნიკა გვარამია, კოალიცია ცვლილებებისთვის, ამბობს, რომ მნიშვნელოვანია, “ქართულმა ოცნებამ” მშვიდობიანად გადააბაროს ხელისუფლება ოპოზიციას:  „იმედი მაქვს, რომ ხელისუფლება აცნობიერებს, რომ ხელისუფლების მშვიდობიანი ცვლა არის მისი ისტორიული შანსი რამე პოზიტიური მაინც შეიტანოს ამ ქვეყნის ისტორიაში. ეს უკანასკნელი შანსია მათთვის. პირველი მშვიდობიანი გადაცემა იყო 2012 წელს, პირველად ამ ქვეყნის ისტორიაში და მეორე გადაცემა არ იქნება გამონაკლისი, იქნება ტრადიცია. მოვუწოდებ ბიძინა ივანიშვილს, გამოიყენოს უკანასკნელი შანსი საქართველოს ისტორიაში რაღაც პოზიტიური მაინც ჩაწეროს და ხელისუფლების მშვიდობიანი გადაბარების ტრადიციას ჩაუყაროს საფუძველი”.

პრემიერი  ირაკლი კობახიძე: “ეს არის 2012 წლის არჩევნების ტოლფასი არჩევნები, სადაც კიდევ ერთხელ, საბოლოოდ, უნდა გადაწყდეს ქვეყნის განვითარების მიმართულება”. კობახიძე ასევე ამბობს, რომ  “როგორც კი დასრულდება არჩევნები, როგორც კი დასრულდება ომი უკრაინაში, სრულად გადაიტვირთება ურთიერთობები როგორც აშშ-სთან, ისე ევროკავშირთან. გვაქვს ძალიან კარგი სიგნალები ჩვენი სტრატეგიული პარტნიორებისგან”.

მამუკა ხაზარაძე, კოალიცია ძლიერი საქართველო: “საარჩევნო უბნებთან რიგები მანიშნებელია, რომ ოლიგარქის 12-წლიანი მმართველობა ყველას კისერში ამოუვიდა, ამ ქვეყანაში ეს ტყუილების კასკადი უნდა დამთავრდეს – ჩვენ დღეს ვიმარჯვებთ. ჩემი მოლოდინი არის ძალიან ოპტიმისტური. მინდა მადლობა გადავუხადო ყველას. ემიგრანტებიდან დაწყებული დამთავრებული ჟურნალისტებით, ნებისმიერი ადამიანით, ვისაც წელს პირველად მოუწევს ხმის მიცემა.”

გიორგი გახარია, “გახარია საქართველოსთვის”: „დღეს არის მნიშვნელოვანი დღე. პირველ რიგში, მინდა საქართველოს თითოეულ მოქალაქეს ვთხოვო, რომ აუცილებლად მივიდნენ საარჩევნო უბნებზე. თქვენ უნდა იცოდეთ, რომ ვერავინ ვერასოდეს ვერ გაიგებს, თუ ვის მიეცით ხმა. რაც მთავარია ყველამ ხმა უნდა მივცეთ ქვეყნის დაბრუნებას ნორმალურ მდგომარეობაში. ჩვენ უნდა გავაკეთოთ ყველაფერი იმისთვის, რომ ქვეყანა დაუბრუნდეს ნორმალური, დემოკრატიული, თავისუფალი, სამართლიანი, ევროპული განვითარების გზას, იმიტომ, რომ ეს არ არის მხოლოდ ჩვენი არჩევანი, ეს არის ჩვენი წინაპრების და შვილების არჩევანი”, – განაცხადა გახარიამ.

თინა ბოკუჩავა, “ერთიანობა – ნაციონალური მოძრაობა”: “დარწმუნებული ვარ, რომ საქართველოს მოქალაქეთა აბსოლუტური უმრავლესობა სწორედ ევროპულ მომავალს აირჩევს მათი შვილებისთვის, ჩვენი ქვეყნისთვის და ჩვენი ქვეყანა დაუბრუნდება ევროინტეგრაციის გზას. მე დარწმუნებულ ვარ, რომ ეს იქნება დიდი ეროვნული გამარჯვების დღე, რომელიც გამოიწვევს ხელისუფლების ცვლილებას, ხელისუფლებაში მოსვლას კოალიციური ძალების, რომელიც ჩვენ ქვეყანას აუცილებლად უმოკლეს ვადებში შეიყვანენ ევროკავშირში” – აღნიშნა ბოკუჩავამ.

დარღვევები უბნებზე:

__რამდენიმე უბანი დაგვიანებით გაიხსნა

__ რუსთავი – 27-ე უბანზე კომისიის წევრი ამეცადინებდა მოქლაქეს წრის გაფერადებაში – აჩვენებდა რომ ნომერი 41 უნდა შემოხაზოს.

__ ელექტრონული მოწყობილობები შეფერხებით მუშაობდა რამდენიმე უბანში.

ცესკო: 324 ათას  197 ამომრჩეველი მივიდა საარჩევნო უბნებზე დილის 10 საათისთვის.

უკვე გავიდა საარჩევნო უბნებიდან გადასატანი ყუთები – მათთვის, ვინც არჩევნებზე ვერ მიდის ფიზიკურად.

2024 წელს საქართველო ოთხი წლით ირჩევს მე-11 მოწვევის პარლამენტს.

საქართველო საპარლამენტო ქვეყანაა, ამიტომ ვინც საპარლამენტო არჩევნებში გაიმარჯვებს, ის იქნება ქვეყნის მმართველი მომდევნო ოთხი წელი.

ეს პირველი პარლამენტი იქნება, სადაც არ იქნებიან მაჟორიტარი დეპუტატები.

არსებობს დიდი ალბათობა, რომ პირველად ისტორიაში საქართველოს არა ერთპარტიული ხელისუფლება, არამედ კოალიციური მთავრობა ჰყავდეს.

იმისთვის, რომ პარლამენტში მოხვდეს, პარტიამ 5 პროცენტიანი ბარიერი უნდა გადალახოს.