"Говорит Москва!" - როგორ ეხმაურებიან საერთაშორისო პარტნიორები ღარიბაშვილის გამოსვლას
გამოხმაურება ირაკლი ღარიბაშვილის გამოსვლაზე
საქართველოს საერთაშორისო პარტნიორები პრემიერმინისტრ ირაკლი ღარიბაშვილის განცხადებას ეხმაურებიან, რომელმაც ბრატისლავაში, გლობალური უსაფრთხოების ფორუმზე გამოსვლისას განაცხადა, რომ უკრაინაში ომის მიზეზი იყო უკრაინის ნება, გამხდარიყო NATO-ს წევრი და ყველა “ვხედავთ შედეგებს”.
რეაქციები
“Говорит Москва!”- ასე ეხმაურება ტვიტერზე ევროპარლამენტარი რასა იუკნევიჩიენე ირაკლი ღარიბაშვილის ბრატისლავაში გამოსვლას.
ლიეტუვის პარლამენტის საგარეო ურთიერთობათა კომიტეტის თავმჯდომარე, ჟიგიმანტას პავილიონისი: “შესწორება – NATO-ს არგაფართოებამ მოახდინა ომის პროვოცირება.”
აშშ-ის სახმელეთო ჯარების ყოფილი მეთაური, გენერალი ბენ ჰოჯესი: “წარმოუდგენელია… საქართველოს პრემიერმინისტრი უკრაინაში რუსეთის შეჭრას NATO-ს გაფართოებას აბრალებს. რა დაემართა საქართველოს?”
ლიეტუველი ევროპარლამენტარი პეტრას აუსტრიავიჩუსი: “ღარიბაშვილი საუკეთესოდ ირჯება რუსეთის სასარგებლოდ. საქართველოს ხელისუფლება რუსეთის რუპორად გადაიქცა.”
Georgian PM Irakli #Garibashvili does a job for putin at his best! The present Goverment of Georgia became a mouthpiece of aggressor #russia. The West must re access its policy towards #Georgia https://t.co/Yv7k2aM7oi
— Petras Austrevicius (@petras_petras) May 30, 2023
ჩეხეთის დეპუტატთა პალატის კომიტეტის თავმჯდომარე მარეკ ზენიშეკი: “ზუსტად პირიქითაა. საქართველოს პრემიერმა ეს იცის, უბრალოდ მან რუსეთის პროპაგანდის მხარდაჭერა აირჩია.”
● პაატა ზაქარეიშვილი: ირაკლი ღარიბაშვილმა მიანიშნა, რომ ჩვენ გვინდა მშვიდობა რუსეთთან
● ნიკა გვარამია: ღარიბაშვილის ტექსტები იყო კატასტროფა, საქართველო დღეს გრუზიაც კი აღარაა – ბელოგრუზიაა
● ირაკლი ღარიბაშვილი: ჩვენი ომი ომი არაა და უკრაინის არის? კიდევ რა თქვა პრემიერმა კატარში
გარდა უკრაინის თემისა, გლობალური უსაფრთხოების ფორუმზე გამოსვლისას საქართველოს პრემიერმინისტრმა ასევე განაცხადა, რომ მთავრობის საბოლოო მიზანი არის იმის მიღწევა, რასაც ჰქვია დეოკუპაცია მშვიდობიანი გზით. 2012 წელს:
“როცა მოვედით ხელისუფლებაში, ჩვენ დავნერგეთ ახალი მიდგომა – ჩვენ მას სტრატეგიულ მოთმინებას ვუძახით.”
მისივე თქმით, საქართველო ასრულებს ევროკავშირის მიერ მიცემულ 12 რეკომენდაციას და ყველაფერი იქნება შესრულებული გარდა ერთისა – დეპოლარიცაზიის.
“თუ გვინდა, თავიდან ავიცილოთ შემდეგ სამიტზე მსგავსი კითხვები და მსგავსი პოლარიზაცია, მაშინ სტატუსი მოგვანიჭეთ. სტატუსი დაასრულებს პოლარიზაციას საქართველოში” – მიმართა დარბაზს პრემიერმა.
აღსანიშნავია, რომ 24 მაისს, საქართველოს პრემიერმინისტრმა ირაკლი ღარიბაშვილმა კატარის ეკონომიკური ფორუმის პანელურ დისკუსიაზე გამოსვლისას კიდევ ერთხელ გაიმეორა, რომ 20% უკრაინის ტერიტორიისა უკვე არის რუსეთის მიერ ოკუპირებული და “არავინ იცის როდის” დამთავრდება ეს ომი. მისივე თქმით, ყველას უკვირს, რომ უკრაინამ “ამდენი ხანი” გაძლო.
პრემიერი ასევე შეეხო რუსეთთან ფრენების აღდგენას და განაცხადა, რომ ეს “ჩვეულებრივი” ამბავია. ღარიბაშვილმა კიდევ ერთხელ გაიმეორა პროპაგანდისტული გზავნილები და თქვა, რომ ამ კრიზისის განმავლობაში ჩინეთს ძალიან ჭკვიანური მიდგომა აქვს – მედიაციას ცდილობს უკრაინასა და რუსეთს შორის.
