2015 წლის საუკეთესო სომეხი სპორტსმენი

ზოგი სპორტსმენი ჩემპიონად იბადება. ასეთები ბუნებით გამარჯვებულები არიან და თავიანთი შეუპოვარი, სპორტული ხასიათით  სხვებსაც შთააგონებენ. ალბათ, სწორედ ასე უნდა დავახასიათოთ არტურ ალექსანიანი, რომელიც ბერძნულ-რომაული სტილით ჭიდაობს და უკვე ევროპის სამგზის და მსოფლიოს ორგზის ჩემპიონია. მასვე ეკუთვნის ოლიმპიური თამაშების ბრინჯაოს მედალიც.

უკვე მეორე წელია, რაც არტური თავის წონით კატეგორიაში საუკეთესო მოჭიდავედაა აღიარებული. წელს ის ერთადერთი სპორტსმენია, რომელმაც სომხეთს ოქროს მედალი მოუტანა; ამიტომაც,  ყოველგვარი კონკურსის გარეშე, უპირობოდ დასახელდა 2015 წლის საუკეთესო სომეხ სპორტსმენად.

არტური ყოველთვის თავშეკავებულია და ზედმეტს არასდროს ლაპარაკობს საკუთარ წარმატებებსა და მიღწევებზე: ‘ჩვენ ძალიან სპორტული ქვეყანა ვართ; ბევრი ნიჭიერი სპორტსმენი გვყავს, და ჩემთვის დიდი პატივია, რომ მათ შორის საუკეთესოდ მაღიარეს’.

იგი დარწმუნებულია, რომ მოპოვებული წარმატების შენარჩუნება მხოლოდ განუწყვეტელი ვარჯიშით არის შესაძლებელი. არტური მისთვის მეტად საპასუხისმგებლო 2016 წლისთვის ემზადება, როდესაც ის მეორედ მიიღებს მონაწილეობას ოლიმპიურ თამაშებში. ამჯერად თავისი სანუკვარი ოცნების ასრულებას _ოლიმპიურ ჩემპიონობას აპირებს. ალექსანიანი აღნიშნავს, რომ სულაც არ აკნინებს კონკურენტების შესაძლებლობებს, თუმცა თავის მთავარ მეტოქედ მაინც ირანელი ჰასემ რეზაი მიაჩნია.

‘მსოფლიო ჩემპიონატის დროს მივხვდი, რომ ფიზიკურადაც და ფუნქციურადაც უფრო ძლიერი გავხდი. ეს კი იმას ნიშნავს, რომ მე და ჩემი მწვრთნელთა შტაბი სწორ გზას ვადგავართ. ჩემი შემდეგი მიზანი ოლიმპიური ოქროს მედალია’, _ ამბობს ალექსანიანი.

არტური ბავშვობიდან თვალს ადევნებდა მამის და ბიძის ვარჯიშს, რომლებიც, მასავით, ბერძნულ-რომაული სტილით ჭიდაობდნენ. სწორედ მაშინ შეიყვარა სპორტის ეს სახეობა და საკუთარ წარმატებებზე დაიწყო ოცნება. რვა წლის ასაკში გიუმრიში, ბერძნულ-რომაული ჭიდაობის სკოლაში შევიდა და დღემდე იქ ვარჯიშობს.

‘ვფიქრობ შრომისმოყვარეობისა და ნებისყოფის წყალობით ვიმარჯვებ ხოლმე. ძალიან მეხმარება მამაჩემი, რომელიც ჩემი მწვრთვნელიცაა. ერთად ვასწორებთ ჩემს შეცდომებს. ყოველი ტურნირის შემდეგ გამარჯვებასაც და მარცხსაც ერთნაირად ვივიწყებ, სრულიად ახალ მიზნებს ვისახავ, და მომდევნო შეჯიბრისთვის ვიწყებ მზადებას ‘, _ აღიარებს ალექსანიანი.

არტური აღნიშნავს, რომ ბავშვობიდან შეეჩვია სპორტულ ცხოვრებას და მკაცრი დღის განრიგის გარეშე ცხოვრება ვერ წარმოუდგენია. „ჩემი გამარჯვებები ჩემს ქვეყანას ეკუთვნის და ძალიან ვამაყობ, რომ ჩემი წყალობით ადამიანები სომხეთის არსებობის შესახებ იგებენ. ეს ძალას მმატებს და წარმატებების მიღწევაში მეხმარება“, _ ამბობს ის.

‘ცოტა მორიდებული და მშვიდი’ _ ასე ახასიათებს არტურ ალექსანიანი თავის თავს. ამის გარდა, მასში უზარმაზარი ძალა და გამარჯვებისკენ სწრაფვაც იგრძნობა.

98 კილოგრამამდე კატეგორიაში ალექსანიანი უდავოდ საუკთესოა. ის, ორი წელია, არ დამარცხებულა და საერთაშორისო ფედერაციის სარეიტინგო ცხრილის ლიდერია.

სწორედ ამიტომ, ბევრი საერთაშორისო ანალიტიკოსი ვარაუდობს, რომ 2016 წლის ოლიმპიურ თამაშებზე ამ წონით კატეგორიაში მიზანთან ყველაზე ახლოს სწორედ ალექსანიანი იქნება. ერთ-ერთმა ბრიტანულმა საბუკმეკერო კომპანიამ კი უკვე აღნიშნა, რომ არტურ ალექსანიანი რიოში ოქროს მედალს მოიპოვებს.