14 წელია ჩვენი ქვეყნის გული რუსეთის მიერაა ოკუპირებული - პრემიერის განცხადება ომზე, რომელსაც კრიტიკა მოჰყვა
პრემიერის განცხადება ომზე
“14 წელი გავიდა 2008 წლის აგვისტოს ომის დაწყებიდან, რომელმაც ბევრი ჩვენი თანამოქალაქის სიცოცხლე შეიწირა. 14 წელია ჩვენი ქვეყნის გული – სამაჩაბლო, ცხინვალის რეგიონი და აფხაზეთი რუსეთის მიერ არის ოკუპირებული”, – ასე გამოეხმაურა საქართველოს პრემიერ-მინისტრი, ირაკლი ღარიბაშვილი 2008 წლის აგვისტოს ომიდან 14 წლისთავს.
ქვეყნის პრემიერმა ეს განცხადება 8 აგვისტოს, ზუსტად 00:01 საათზე გამოაქვეყნა ფეისბუქის ოფიციალურ გვერდზე.
ირაკლი ღარიბაშვილი წერს, რომ ქედს იხრის ომში დაღუპული გმირი სამხედროებისა და მშვიდობიანი მოსახლეობის ხსოვნის წინაშე.
იქვე, იგი ამბობს, რომ “საქართველო აუცილებლად გაერთიანდება” :
“ჩვენ ტერიტორიული მთლიანობის აღდგენისა და ქვეყნის გამთლიანების გზად მშვიდობიანი, გონივრული პოლიტიკა ავირჩიეთ და გვჯერა, აუცილებლად მივაღწევთ მიზანს – საქართველო გაერთიანდება!‘ – წერს ქვეყნის პრემიერი.
- ომი მწარეა. ბავშვობაც ომით ვნახე და სიბერეც – 89 წლის ვენერა ედიშერაშვილი გორიდან. ვიდეო
- “ომზე მახსენდება მონო-ბარათი”. ვის როგორ ახსოვს აგვისტოს ომი
პრემიერის განცხადებას ომზე სოციალურ ქსელებში კრიტიკა მოჰყვა. ირაკლი ღარიბაშვილი რამდენიმე მიზეზის გამო გააკრიტიკეს. მათ შორის, განცხადების იმ ნაწილის გამო, სადაც წერს, რომ “სამაჩაბლო, ცხინვალის რეგიონი და აფხაზეთი 14 წელია ოკუპირებულია”.
აფხაზეთის ომი 1992-1993 წლებში მიმდინარეობდა. სოხუმი 29 წლის წინ, 1993 წლის 27 სექტემბერს დაეცა. 90-იან წლებში დაიწყო კონფლიქტი ცხინვალშიც.
“უვიცობასთან არ გვაქვს საქმე, ნუ სავარაუდოდ, არამედ ისტორიის მიზანმიმართულ გაყალბებასთან“…
“14 წლის წინო! ისტორიას გვიცვლის?! ხმა ამაზე მაინც ამოიღეთ! იმ 300,000 კაცის მაინც შეგრცხვეთ, ვინც სახლი დაკარგა 29 წლის წინ და იმ უამრავი დაღუპული და ნაწამები გმირების!” – ეს არის ნაწილი იმ კომენტარებისა, რაც ირაკლი ღარიბაშვილის პოსტის ქვეშ იწერება.
კრიტიკა გამოიწვია განცხადების გავრცელების დრომაც – 8 აგვისტომ. 2008 წლის აგვისტოს ხუთდღიანი ომის საწყის თარიღად 7 აგვისტოა მიჩნეული. ომის 8 აგვისტოს დაწყება პრორუსული ნარატივია. საქართველოს მოქმედი ხელისუფლება ომის დაწყებაში მის წინამორბედს, პატიმარ პრეზიდენტ მიხეილ სააკაშვილსა და მის პარტიას “ერთიან ნაციონალურ მოძრაობას” ადანაშაულებს და ამით, აგვისტოს ომის რუსულ ვერსიას ამყარებს.
საქართველოში ევროკავშირის წარმომადგენლობამაც კი, განცხადება აგვისტოს ომის 14 წლისთავთან დაკავშირებით, 7 აგვისტოს გაავრცელა.
2008 წლის 7 აგვისტოს, რუსეთ-საქართველოს მრავალწლიანი კონფლიქტი რუსეთის ღია სამხედრო აგრესიაში გადაიზარდა, რასაც ასეულობით ადამიანის მსხვერპლი, ეთნიკური წმენდა და რუსეთის მიერ საქართველოს ორი რეგიონის ოკუპაცია მოჰყვა.
● 2008 წლის ომში ქართული მხრიდან 412 სამხედრო და სამოქალაქო პირი დაიღუპა. ოსური მხრიდან – 365. ასევე დაიღუპა 67 რუსი სამხედრო.
● 20 ათასი ეთნიკური ქართველი დევნილად იქცა.
● საქართველომ დაკარგა კონტროლი ე.წ. სამხრეთ ოსეთის რეგიონის დამატებით 125 სოფელზე.
● სამხრეთ ოსეთი და აფხაზეთი რუსეთმა დამოუკიდებელ სახელმწიფოებად აღიარა.
პრემიერის განცხადება ომზე
