14 აგვისტოდან საქართველოში ახალი შეზღუდვები დაწესდება

საკოორდინაციო საბჭოს გადაწყვეტილებით, 14 აგვისტოდან ქვეყნის მასშტაბით გარკვეული შეზღუდვები ამოქმედდება.

კერძოდ:

● 14 აგვისტოდან 4 სექტემბრის ჩათვლით, შეიზღუდება მუნიციპალური ტრანსპორტის მოძრაობა, თუმცა საქალაქთაშორისო ტრანსპორტი ჩვეულებრივ გააგრძელებს მუშაობას. შეზღუდვა იმოქმედებს ყველა იმ ქალაქში, სადაც მუნიციპალური ტრანსპორტი მოძრაობს.

დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, მუნიციპალური ტრანსპორტის გაჩერების პირობებში დიდი ამცრელი ცენტრების მიმართულებით ავტობუსები დაინიშნება.

● სრულად იზღუდება ფესტივალები, გასართობი ღონისძიებები, კონცერტები და სპორტული შეჯიბრებები, ასევე იზღუდება ბავშვთა გასართობი ცენტრების მუშაობა. 

● კვების ობიექტების მუშაობა, ნაცვლად ღამის 00:00 საათისა, დასაშვები იქნება 23:00 საათამდე. 

● მაქსიმალურად გამკაცრდება კონტროლი მოქმედი რეგულაციების აღსრულებაზე, მათ შორის ისეთი სოციალური ღონისძიებების გამართვაზე, როგორიცაა ქორწილი და ქელეხი. ასევე, პირბადის ტარების რეგულაციაზე.

● საჯარო უწყებებს ეძლევათ დავალება, მაქსიმალურად გადაიყვანონ თანამშრომლები მუშაობის დისტანციურ რეჟიმზე და ანალოგიური რეკომენდაციით მთავრობა კერძო სექტორსაც მიმართავს. 

ასევე, მთავრობა განიხილავს ზოგიერთ დაწესებულებაში მოქალაქეების შესვლის რეგულაციასაც. შესაძლოა, სპა სალონებში, ფიტნეს ცენტრებსა და მსგავსი ტიპის დაწესებულებებში, მოქალაქეების დაშვება გარკვეული რეგულაციების მიხედვით განხორციელდეს. 

კერძოდ, ამ დაწესებულებებში ადამიანების დაშვება უნდა მოხდეს ვაქცინით ერთი აცრის ან სრული კურსის, ბოლო 72 საათში ჩატარებული პისიარ ან ბოლო 24 საათში ჩატარებული სწრაფი ანტიგენის ტესტის უარყოფითი პასუხის საფუძველზე.

_____________________________________________

● საქართველოს პრეზიდენტი: დღეს პატრიოტიზმი და ვაჟკაცობა გადის ვაქცინაციაზე
● საქართველოში კათოლიკე სასულიერო პირების 83 პროცენტი აცრილია
● ეკლესია და Pfizer-ი: რატომ ჩააგდო საქართველომ ვაქცინაციის კამპანია

_____________________________________________

უწყებათშორისი საკოორდინაციო საბჭოს დასრულების შემდეგ ცნობილი გახდა, რომ ვაქცინაციის პროცესში სამხედრო ექიმებიც ჩაერთვებიან.

“ისინი სხვადასხვა მუნიციპალიტეტში, სხვადასხვა ლოკაციებში განახორციელებენ ვაქცინაციას”, – თქვა ოპერაციული შტაბის უფროსმა გიორგი ღიბრაძემ. 

სხდომის დასრულების შემდეგ კომენტარი გააკეთა დაავადებათა კონტროლის ცენტრის დირექტორმა ამირან გამყრელიძემაც. მისი თქმით, დიდი უნივერსიტეტების სივრცეებში ამცრელი ცენტრები გაიხსნება.

გამყრელიძის განმარტებით, რეკომენდაციაა, რომ იქ, სადაც კლასტერული ეპიდაფეთქებაა, მოსახლეობის აცრა მოხდეს მაქსიმალურად სწრაფად:

“ხვალ იწყებს სერიოზული ამცრელი ცენტრი მუშაობას, ტექნიკური უნივერსიტეტის მეშვიდე კორპუსში, რომელიც ათი ამცრელი ბრიგადით არის დაკომპლექტებული. არის აფილირებული რესპუბლიკურ საავადმყოფოსთან და მენეჯმენტს რესპუბლიკური საავადმყოფო აწარმოებს. ასეთივე ამცრელი ცენტრები მომავალი კვირის განმავლობაში გაჩნდება რამდენიმე დიდ უნივერსიტეტთან, საუნივერსიტეტო სივრცეებში.”

ამირან გამყრელიძემ აღნიშნა ისიც, რომ ლუგარში დადასტურებული ინფიცირების შემთხვევების 90% დელტა შტამზე მოდის.

“მოგეხსენებათ, ვირუსი იბრძვის და არ არის გამორიცხული, სხვა სიურპრიზებიც დაუყენოს კაცობრიობას. ჩვენ ყოველდღიურად ვაკვირდებით ცირკულაციას სხვადასხვა შტამებისა ქვეყანაში. ლუგარის ლაბორატორიაში დადასტურებული თითქმის ყველა დადებითი შემთხვევის 90% მოდის დელტა შტამზე [ე.წ. ინდური შტამი]. დელტა შტამი მოგეხსენებათ ხასიათდება მეტი აგრესიულობით, მეტი განვრცობადობით, განსაკუთრებით ახალგაზრდა ასაკში. სწორედ ამიტომ გვაქვს ინფექციის სერიოზული გავრცელება სხვა მიზეზებთან ერთად”, – თქვა მან.

მან ასევე მოუწოდა ორსულ ქალებს ან ყველა იმ ქალს, ვისაც სურს დაფეხმძიმდეს, რომ აუცილებლად აიცრას:

“უკვე გვაქვს ორსული ქალის კოვიდით გარდაცვალების 4 შემთხვევა. გთხოვთ ყველას, ასევე, ჩემს კოლეგებს, მეან-გინეკოლოგებს, რომელთა სიტყვას აქვს დიდი მნიშვნელობა, როდესაც მიდიან კონსულტაციაზე მათ ურჩიონ, რომ აიცრან.”