ტაილანდის მღვიმეში ჩარჩენილი თორმეტივე ბავშვი და მათი მწვრთნელი მღვიმედან გამოყვანილია
მაშველებმა ტაილანდის მღვიმეში ჩარჩენილი თორმეტივე ბავშვი გაათავისუფლეს. სამაშველო ოპერაცია თითქმის 24 საათი გრძელდებოდა.
ყველა ბავშვი ჰოსპიტალშია გადაყვანილი.
ორ კვირაზე მეტი ხნის წინ ბავშვთა საფეხბურთო გუნდი – 11 წლიდან 16 წლამდე ბიჭებისა და მათი მწვრთნელის შემადგენლობით, ტაილანდის ჩრდილოეთით მდებარე მღვიმეში მოხვდა. გუნდის მწვრთნელს აღსაზრდელები პერიოდულად ლაშქრობებში დაჰყავდა ხოლმე, და ეს ერთ-ერთი ასეთი ლაშქრობა იყო.
წვიმების სეზონზე ტაილანდში მღვიმეები წყლით ივსება, რის გამოც, გუნდმა გარეთ ვეღარ გამოაღწია, თუმცა მაშველებმა მათ ადგილ-სამყოფელს მიაგნეს.
სამაშველო ოპერაციაში 40 ტაილანდელი და 50 უცხოელი სპეციალისტი მონაწილეობს. ოპერაციის მაშინვე დაწყება ვერ მოხერხდა, რადგან წყლის მაღალი დონის გამო, ბავშვებისა და მათი მწვრთნელის გამოყვენა შეუძლებელი იყო. თუმცა რადგან ტაილანდში მოსალოდნელი იყო ახალი წყალდიდობები, რაც მღვიმეში მყოფებს სრულიად ჩაკეტავდა, ოპერაციის დაწყება გადაწყდა.
6 ივლისს მღვიმეში დაიღუპა ერთ-ერთი მაშველი, რომელიც იქ მყოფთ ჟანგბადის ბალონებს აწვდიდა. ტაილანდელ სამან გუნანს ჟანგბადი თავადაც არ ჰყოფნიდა, როდესაც მან უკან დაბრუნება დაიწყო.
ტაილანდში მიმდინარე მოვლენებს მთელი მსოფლიო ყურადღებით აკვირდებოდა.
მსოფლიოს ერთ-ერთმა უმდიდრესმა ადამიანმა, ილონ მასკმა ბავშვების გადასარჩენად საკუთარი დახმარება შესთავაზა. მისი წინადადებით, მათ მიერ წარმოებული ერთ-ერთი რაკეტის კორპუსისგან (მისი კომპანია SpaceX რაკეტმშენებლობას ეწევა) მინი-წყალქვეშა ნავი უნდა დამზადებულიყო, რომელიც მღვიმეში ჩარჩენილ ბავშვებამდე მიაღწევდა. მაშველებს მასკის დახმარება არ დასჭირდათ.
