ბაქოში, ფემინისტური მარშის ერთ-ერთმა მონაწილემ თვითმკვლელობა სცადა

ბაქოში, ცოტა ხნის წინ გამართული ფემინისტური მარშის ერთ-ერთმა მონაწილემ თვითმკვლელობა სცადა. აზერბაიჯანული მედიის ცნობით, აისელ ალეკპერზადე მესამე სართულიდან გადმოხტა და ახლა მძიმე მდგომარეობაში, რეანიმაციაშია მოთავსებული. მანამდე, ორი დღე გაგრძელდა სოციალურ ქსელებში სკანდალი, რომელიც იმ პლაკატმა გამოიწვია, რომელიც 8 მარტის მსვლელობაზე მას ეჭირა.

• ფემინისტების მარშის დეტალები

„სკანდალურ“ პლაკატზე ასეთი ფრაზა ეწერა – „გოგონა მიმზიდველია და მე ის მინდა“, მის ქვეშ კი ეწერა – „ჩემი ვაგინა, ვისთანაც მინდა, იმასთან დავწვები“. 

სოციალური ქსელების „რიგითმა“ მომხმარებლებმა ეს გარყვნილებისაკენ მოწოდებად და მათი მორალური ღირებულებებისათვის საფრთხედ მიიღეს. ფემინისტების მარშის ფოტოს კომენტარებში ადამიანები ამას აგრესიულ ფორმებში აპროტესტებდნენ და აღშფოთებას გამოხატავდნენ. ზოგიერთი კომენტარის ავტორი კი აღფრთოვანებული იყო აისელის გამბედაობით.

ბევრი მათგანი, ვინც ფემინისტების იდეებს იზიარებს, შეშფოთებულები იყვნენ იმით, რომ ასეთი ლოზუნგები აშინებს ხალხს, განსაკუთრებით ქალებს, რომელთა საკუთარ მხარეს გადაყვანასაც ფემინისტები უნდა ცდილობდნენ.

მოგვიანებით პოლიტიკური აქტივისტებისა და ყოფილი პოლიტპატიმრების წრეში, ზოგიერთებმა დაიწყეს მტკიცება, რომ სინამდვილეში აისელ ალეკპერზადე დაკავებულია თაღლითობითა და შანტაჟით და სარგებლობს იმით, რომ მისი ნათესავებიდან ვიღაც პოლიციაში მუშაობს. სწორედ ეს ადამიანები დაადანაშაულა აისელმა საკუთარ სიკვდილში „უკანასკნელ“ პოსტში, რომელიც სოციალურ ქსელში, 10 მარტის ღამეს გამოაქვეყნა.

დაიწყო საუბარი იმის შესახებ, უღირთ თუ არა ახალგაზრდულ მოძრაობებს საკუთარ რიგებში მიიღონ ყველა, იმის გათვალისწინების გარეშე, რომ ზოგიერთი მათგანი შეიძლება იყოს პროვოკატორი, მათ შორის, ხელისუფლების მიერ სპეციალურად მომზადებული.