კორონავირუსი: 12 მარტს მსოფლიოსა და კავკასიაში არსებული ძირითადი ფაქტები და რიცხვები

ძირითადი წყაროები – CNN-ის სპეციალური ანგარიში და BBC.

• 11 მარტის საღამოს, ჯანდაცვის მსოფლიო ორგანიზაციამ კორონავირუსი COVID-19-ის გლობალური პანდემია გამოაცხადა.

• 12 მარტის დილის მონაცემებით, მსოფლიოში კორონავირუსით ინფიცირების 126 392 შემთხვევა დაფიქსირდა მას შემდეგ, რაც 2019 წლის დეკემბერში, ჩინეთში, დაავადების პირველი შემთხვევები აღმოაჩინეს.

• კორონავირუსით 4 639 ადამიანი გარდაიცვალა.

• 68 288 ადამიანი გამოჯანმრთელდა.

• მსოფლიოში კორონავირუსის გავრცელების სტატისტიკა შეგიძლიათ აქ ნახოთ.

ამ ეტაპისთვის ყველაზე მეტად ეს ხუთი ქვეყანა დაზარალდა:

• მატერიკული ჩინეთი: 80 932 შემთხვევა; 3 056 გარდაცვლილი.

• იტალია: 12 462 შემთხვევა; 827 გარდაცვლილი პაციენტი.

• ირანი: 9 000 შემთხვევა, 354 გარდაცვლილი.

• სამხრეთ კორეა: 7 869 შემთხვევა; 66 გარდაცვლილი.

• საფრანგეთი: 2 284 შემთხვევა; 48 გარდაცვლილი.

სიტუაცია კავკასიაში

• აზერბაიჯანში 14 ინფიცირებულია, სამი მათგანი გამოჯანმრთელდა და საავადმყოფოდან გაეწერა. ყველა ინფიცირებული ქვეყანაში ირანიდან ჩავიდა. აზერბაიჯანმა ირანთან საზღვარი ჩაკეტა, ქვეყანაში დახურულია ყველა სკოლა და საბავშვო ბაღი.

• ინფიცირების ოთხი შემთხვევაა სომხეთში. პირველი მათგანი სამშობლოში ირანიდან ჩავიდა, დანარჩენი სამი კი იტალიიდან სპეციალურად სომხეთის მოქალაქეებისთვის ორგანიზებული რეისით ჩაფრინდა. ქვეყანამ სავიზო რეჟიმი დაუწესა ირანს, დახურულია სკოლები და საბავშვო ბაღები.

• საქართველოში 24 ინფიცირებულია. ორი მათგანი ირანიდან ჩამოვიდა, დანარჩენებს კი იტალიასთან აქვთ კავშირი. საქართველომ ირანის მოქალაქეებისთვის საზღვარი ჩაკეტა, დახურულია სკოლები და საბავშვო ბაღები.

იტალიაში კრიზისი ღრმავდება – ქვეყანა ინფიცირებულთა რაოდენობით ჩინეთის შემდეგ მეორე ადგილზეა

• იტალიაში, მხოლოდ ერთი დღე-ღამის, 11 მარტის განმავლობაში, ინფიცირების ოთხი ათასი ახალი შემთხვევაა. ახლა ინფიცირებულთა რაოდენობამ 12 462-ს მიაღწია, მათგან 827 ადამიანი გარდაიცვალა. იმათ შორის, ვისაც კორონავირუსი დაუდასტურდა, საფეხბურთო კლუბ „იუვენტუსის“ მოთამაშე, დანიელ რუგანიცაა.

• 10 მარტს იტალიაში, მთელ ქვეყანაში კარანტინი გამოცხადდა. 12 მარტს ახალი აკრძალვა დაემატა – დახურულია არა მხოლოდ სასწავლო დაწესებულებები, ოფისები და მუზეუმები, არამედ კაფეები, რესტორნები და ასევე ყველა მაღაზია – პროდუქტებისა და აფთიაქების გარდა.

ირანი – სიტუაცია კრიტიკულია, საშინელი ვიდეო ქალაქ ყუმის მორგიდან 

• ირანში კორონავირუსით ინფიცირებულთა და გარდაცვლილთა რიცხვის მკვეთრი ზრდაა. ვირუსი მთელ ქვეყანაში გავრცელდა. ოფიციალურად გაცხადებულია 9 ათასი ინფიცირებულის და 354 გარდაცვლილის შესახებ. მაგრამ საერთაშორისო და ადგილობრივი სპეციალისტები ამბობენ, რომ, სავარაუდოდ, რიცხვები გაცილებით უარესია, ვიდრე ოფიციალურად აცხადებენ.

სოციალურ ქსელებში, აი ეს ვიდეორგოლი გავრცელდა, რომელიც ქალაქ ყუმის გარდაცვლილთა ცხედრებით სავსე მორგს აჩვენებს, რომლებიც კორონავირუსზე უნდა შეამოწმონ.

ევროპაში შოკირებულები არიან აშშ-ის გადაწყვეტილებით, რომელმაც 26 ევროპულ ქვეყანას შესვლაზე აკრძალვა დაუწესა

• აშშ-ში ინფიცირებულთა რიცხვის სწრაფი ზრდაა – 600-ზე მეტი ადამიანი ერთი დღის, 11 მარტის განმავლობაში, მათ შორის, ნიუ იორკში. საერთო ჯამში, 12 მარტის დილას, 1 312 შემთხვევაა დაფიქსირებული. 70 მათგანი – ამერიკის მოქალაქეები არიან, რომელთა ევაკუაციაც ჩინეთიდან და იაპონიიდან, საკრუიზო ლაინერ Diamond Princess-იდან მოხდა. დანარჩენი შემთხვევები აღმოჩენილია და დადასტურებულია აშშ-ის ტერიტორიაზე, 43 შტატში. კორონავირუსით ამერიკაში 38 ადამიანი გარდაიცვალა.

• პრეზიდენტმა ტრამპმა 11 მარტის საღამოს, ერს სიტყვით მიმართა, ქვეყანაში საგანგებო მდგომარეობა გამოაცხადა და ჩინეთი იმაში დაადანაშაულა, რომ ვირუსი სწორედ იქ წარმოიშვა. ამავე დღეს, უფრო ადრე სიტყვით გამოსვლისას, ტრამპის მრჩეველმა ეროვნული უსაფრთხოების საკითხებში, რობერტ ობრაიენმა ასევე საჭიროდ ჩათვალა ხაზი გაესვა, რომ „ეს ვირუსი წარმოიშვა არა აშშ-ში, არამედ ჩინეთში, უბეის პროვინციის ქალაქ უჰანში წარმოიშვა“.

• ტრამპმა განაცხადა, რომ ქვეყანაში შესვლას აკრძალავს შენგენის ზონის 26 ევროპული სახელმწიფოდან. ვაშინგტონში, რამდენიმე ევროპელმა ელჩმა განაცხადა, რომ შოკირებულები არიან, რადგან ისინი არ გაუფრთხილებიათ იმის მიუხედავად, რომ უკანასკნელი დღეების განმავლობაში, მუდმივ კონტაქტში იყვნენ პრეზიდენტის ადმინისტრაციასთან.

• კორონავირუსით ინფიცირების კიდევ ორი შემთხვევა დაფიქსირდა სტენფორდის უნივერსიტეტის თანამშრომლებში, ახლა მათი რიცხვი უკვე სამს შეადგენს. მეცადინეობები სრულად ონლაინ-რეჟიმზე გადავიდა. ადმინისტრაციამ კამპუსის ტერიტორიაზე მცხოვრებ სტუდენტებს მიმართა თხოვნით, რომ შეძლებისდაგვარად, დატოვონ იქაურობა. ჰარვარდი და ქვეყნის სხვა უნივერსიტეტებიც ასევე სწავლების ონლაინ-რეჟიმზე გადავიდნენ და თხოვენ სტუდენტებს, წავიდნენ კამპუსის ტერიტორიიდან.

• აშშ-ში, ეროვნული საკალათბურთო ასოციაციის სეზონი მას შემდეგ შეჩერდა, რაც ერთ-ერთ კალათბურთელს კორონავირუსი გამოუვლინდა.

ტომ ჰენკსი კორონავირუსით ავსტრალიაში დაინფიცირდა

•კორონავირუსით დაინფიცირდნენ მსახიობი ტომ ჰენქსი და მისი მეუღლე, მსახიობი რიტა უილსონი. ისინი მკურნალობას ავსტრალიაში გადიან, სადაც ახალი ფილმის გადაღებაზე იმყოფებიან. საერთო ჯამში ქვეყანაში კორონავირუსის 126 შემთხვევაა დადასტურებული. 4 პაციენტი გარდაიცვალა.

12 მარტს, ავსტრალიის ხელისუფლებამ განაცხადა, რომ კორონავირუსთან საბრძოლველად 17,63 მილიონ ავსტრალიურ დოლარს გამოყოფს. პაკეტში შედის სახელფასო სუბსიდიები და ფულადი გადასახადები მცირე ბიზნესისთვის.