ზაზა სარალიძე ოპოზიციას ქუჩაში გამოსვლისკენ მოუწოდებს. პროტესტმა ახალი სახე მიიღო
თბილისში სამი დღის წინ დაწყებული სამოქალაქო პროტესტი ახალ – მიმართულებას იძენს, და 3 ივნისი, შესაძლოა, გარდამტეხ დღედ იქცეს. წინა საღამოს ოპოზიციამ პარლამენტთან გამართულ მიტინგზე ახალი, ფართომასშტაბიანი საპროტესტო აქცია დააანონსა, ამჯერად პოლიტიკოსების მონაწილეობით.
თუკი აქამდე მიტინგის ორგანიზატორები პოლიტიკოსებისგან დისტანცირებას ცდილობდნენ, რათა პროცესის პოლიტიზირება არ დაეშვათ, 2 ივნისს გვიან საღამოს ყველაფერი შეიცვალა – მათ ყველა პოლიტიკურ პარტიას მიმართეს და „ქართული ოცნების“ ხელისუფლების წინააღმდეგ გაერთანებისკენ მოუწოდეს.
მიტინგები თბილისში 31 მაისს დაიწყო , იმის შემდეგ, რაც სასამართლომ ორი 16 წლის მოზარდის – ლევან დადუნაშვილისა და დავით სარალიძის სასტიკი მკვლელობის საქმეზე განაჩენი გამოაცხადა.
გასული წლის 1 დეკემბერს სკოლის ორი მოსწავლე თავიანთ თანატოლებთან მომხდარი ჩხუბის დროს დანებით მიყენებული მრავლობით ჭრილობებით გარდაიცვალა. მკვლელობა დღისით, ხალხმრავალ ქუჩაზე, რამდენიმე მოწმის თვალწინ მოხდა. სასამართლომ დაადგინა, რომ დაკავებულთაგან არც ერთს დავით სარალიძე არ მოუკლავს. ამ გადაწყვეტილებამ გაამართლა მოკლულის მამის – ზაზა სარალიძის ეჭვები, რომელიც რამდენიმე თვის განმავლობაში ირწმუნებოდა, რომ მისი ვაჟის ნამდვილი მკვლელები თავისუფლები არიან და პროკურატურა მათ ხელს აფარებს.
3-დღიანი პროტესტების შედეგად, მომიტინგეებმა საქართველოს მთავარი პროკურორის გადადგომას მიაღწიეს და მომიტინგეებთან მოსალაპარაკებლად მისულ ქვეყნის პრემიერ-მინისტრს სტვენით შეხვდნენ.
სამი დღის განმავლობაში საპროტესტო აქციებში, ძირითადად, მონაწილეობდნენ ახალგაზრდები, რომლებიც მოზარდების სიკვდილის პატიოსნად გამოძიებას მოითხოვდნენ.
მომიტინგეების წინაშე სიტყვით გამოდიოდნენ საზოგადოების წარმომადგენლები, ასევე სხვადასხვა გარემოებებში მოკლული ადამიანების ნათესავები, რომლებიც გამოძიების დასკვნებით უკმაყოფილოები არიან.
მიტინგები დღისით იწყებოდა და გვიან ღამემდე გრძელდებოდა. პარლამენტის შენობასთან გაშლილ კარავში ღამეს მხოლოდ ზაზა სარალიძე და მისი რამდენიმე მხარდამჭერი ათევდა.
მომიტინგეები და ორგანიზატორები მთელი ამ ხნის განმავლობაში მმართველი პარტიის მთავარი ბრალდების უარყოფას ცდილობდნენ – თითქოს მიტინგს ხელმძღვანელობდა ექსპრეზიდენტ მიხეილ სააკაშვილის მიერ მართული პარტია „ნაციონალური მოძრაობა“, რომელიც სარალიძის ტრაგედიით სარგებლობას და ხელისუფლებაში მოსვლას ცდილობდა. მიტინგზე ოპოზიციონერებს სიტყვას არ აძლევდნენ, და იმეორებდნენ, რომ ეს საზოგადოებრივი პროტესტია, და არა – პოლიტიკური.
თუმცა, 2 ივნისს ღამით ყველაფერი შეიცვალა. თავდაპირველად, გავრცელდა ცნობა, რომ მიტინგის ორგანიზატორებს – ზაზა სარალიძეს და მის მეგობარს ზვიად კუპრავას შორის უთანხმოება მოხდა, თუმცა შემდეგ ჟურნალისტების წინაშე ორივე ერთად წარსდგა და მათ ოპოზიციას ქუჩაში გამოსვლისკენ მოუწოდეს.
„ვთხოვ ყველა პოლიტიკურ პარტიას, ელიტის ყველა წარმომადგენელს, ყველა მოქალაქეს, ყველა სრულუფლებიან მოქალაქეს, ყველა გლეხს, ყველა პატარა ადამიანს, როგორიც მე ვარ, მხარი დამიჭირონ. მაგრამ არამხოლოდ მე, არამედ ყველა იმ მშობელს, ვისაც შვილები მოუკლეს – თითოეულ დედას და მამას. გავაერთიანოთ ჩვენი ძალები, რადგან დღეს ხელისუფლებამ კიდევ ერთხელ სცადა მიცვალებულებისთვის სულში ჩაფურთხება. ჩვენ ეს სისტემა უნდა დავანგრიოთ“, – განაცხადა სარალიძემ.
ზვიად კუპრავამ ოპოზიციურ პარტიებს კონსულტაციების გასამართად ეროვნულ-დემოკრატიული პარტიის ოფისში შეკრებისკენ მოუწოდა. სარალიძესთან და კუპრავასთან ერთად აქციებში პირველი დღიდან მონაწილეობს მალხაზ მაჩალიკაშვილი, ანიტერორისტული სპეცოპერაციის დროს მოკლული ტამერლან მაჩალიკაშვილის მამა. ამ სპეცოპერაციის თაობაზე საქართველოში ბევრი კითხვა არსებობს.
ამ მოწოდების შემდეგ ძალიან მალე ედპ-ს ოფისში მივიდნენ ყოფილი მმართველი პარტიის „ერთიანი ნაციონალური მოძრაობის“ ლიდერი ნიკა მელია, პარტია „ახალი საქართველო“ ლიდერი გიორგი ვაშაძე, მოძრაობა „სახელმწიფო ხალხისთვის“ ლიდერი ნიკოლოზ მაჭუტაძე, ეროვნულ-დემოკრატიული პარტიის ლიდერი ბაჩუკი ქარდავა და თავად ზვიად კუპრავა.
ოფისში ხანმოკლე კონსულტაციის შემდეგ პოლიტიკოსები ერთად გაემართნენ საპროტესტო აქციაზე და შაბათს 3 ივნისს 18:00 პოლიტიკური ძალების მონაწილეობით დიდი მიტინგი დააანონსეს. თუ რა კონკრეტული გეგმები აქვს ოპოზიციას, მიტინგზე გამოცხადდება.
თუმცა, მოწოდებას ყველა ოპოზიციური პარტია არ გამოეხმაურა. „ევროპული საქართველო“ პროცესებს მეტი სიფრთხილით მიუდგა. ამ პარტიის ლიდერები ეროვნულ-დემოკრატიული პარტიის ოფისში გამართულ კონსულტაციებში არ მონაწილეობდნენ, თუმცა გვიან ღამით პარლამენტთან მივიდნენ, რათა მოკლული მოზარდის მამას – ზაზა სარალიძეს დალაპარაკებოდნენ.
ამ პარტიაში მიაჩნიათ, რომ მიტინგები უნდა გაგრძელდეს, „რათა ხელისუფლებას არ ეგონოს, რომ პროტესტი დასრულდა“ . თუმცა, რადიკალურად განწყობილი ოპოზიციური პარტიებისგან განსხვავებით, რომლებიც ხელისუფლებასთან ნებისმიერ მოლაპარაკებას გამორიცხავენ და მთავრობის გადადგომასა და რიგგარეშე საპარლამენტო არჩევნების დანიშვნას ითხოვენ, „ევროპულ საქართველოს“ განსხვავებული მოსაზრება აქვს. მათ მიაჩნიათ, რომ მიტინგების პარალელურად, ოპოზიცია მთავარი პროკურორის არჩევისა და დანიშვნის საქმეშიც უნდა ჩაერთოს, ასევე შექმნას დამოუკიდებელი საპარლამენტო კომისია, რომელიც მოკლული მოზარდების საქმით დაკავდება და ყველა იმ დარღვევას გამოავლენს, რაც გამოძიებამ დაუშვა.
რას წერენ სოციალურ ქსელებში – მთავარი მიმართულებები
მას შემდეგ, რაც მიტინგებს პოლიტიკოსები შეუერთდნენ, იმ ადამიანთა აზრი, რომლებიც მანამდე პროტესტს მხარს უჭერდა, გაიყო.
ზოგი დარწმუნებულია, რომ მართვის სადავეები „ნაციონალური მოძრაობისა“ და მისი ლიდერის სააკაშვილის ხელში გადავა.
სხვები უარს აცხადებენ მონაწილეობა მიიღონ იმ მიტინგებში, სადაც არცთუ პოპულარული და დისკრედიტირებული პოლიტიკური პარტიების წარმომადგენლები დგანან.
მესამე ნაწილს კი მიაჩნია, რომ პროტესტს ნებისმიერ შემთხვევაში მხარი უნდა დაუჭირონ, რადგან „ქართული ოცნების“ ხელისუფლების შეცვლა, რომელსაც სათავეში არაფორმალური ლიდერი მილიარდერი ბიძინა ივანიშვილი უდგას, მხოლოდ გაერთიანებული ძალებით არის შესაძლებელი, და ახლა „კონკრეტული პოლიტიკოსების შეფასების დრო არ არის“.
ახალი პოლიტიკური ლიდერი?
პარლამენტთან შექმნილმა სიტუაციამ, სადაც გუშინ, გვიან ღამით საკმაოდ მივიწყებული პოლიტიკური პარტიების წარმომადგენლები შეიკრიბნენ, ბევრს 90-იანი წლები გაახსენა. დეჟა ვუ იმანაც გაამძაფრა, რომ ბევრი მიტინგზე სკანდირებდა „ზვიადი! ზვიადი!“ მომიტინგეები ზვიად კუპრავას გულისხმობდნენ, ადამიანს, რომელსაც ამ აქციებამდე ფართო საზოგადოება არც კი იცნობდა.
ყოფილი პოლიციელი კუპრავა ზაზა სარალიძის ნათესავია. მთელი ამ დროის განმავლობაში, ის არის მთავარი ადამიანი, რომელიც აქციას უძღვება. მისი გამოსვლები იმდენად ემოციურია, რომ აქციების მეორე დღეს მან ხმა დაკარგა.
„ახალი პოლიტიკური ლიდერი“ – ასე უწოდეს გუშინ ჟურნალისტებმა კუპრავას.
მის მიმართ არაერთგვაროვანი დამოკიდებულება არსებობს. ხელისუფლება მის დისკრედიტირებას ცდილობს და აცხადებს, რომ კუპრავა მიხეილ სააკაშვილის და „ნაციონალური მოძრაობის“ მხარდამჭერია. ექს-პრეზიდენტ სააკაშვილთან ერთად გადაღებულმა მისმა ფოტომ ინტერნეტი მოიარა. თუმცა, კუპრავა „ნაციონალურ მოძრაობასთან“ ნებისმიერ კავშირს უარყოფს.
თავად სააკაშვილმა, რომელიც უკრაინიდან განდევნის შემდეგ ნიდერლანდებში იმყოფება, საპროტესტო აქციის მხარდაჭერა „რუსთავი-2-ის“ ეთერით უკვე რამდენჯერმე გამოხატა.
ამ სამი დღის განმავლობაში თავის ფეისბუკის გვერდზე მან უკვე რამდენჯერმე შეცვალა ბანერზე ფოტო თბილისის მიტინგების ამსახველი კადრებით. თავიდან ბანერზე იყო წარწერა „კავკასიური გაზაფხული“ და “საქართველოს გაზაფხული”, მოგვიანებით კი, გაჩნდა წარწერა – „საქართველოს სჭირდება ახალი დასაწყისი“.
