გიგი უგულავამ პრეზიდენტს შეწყალების თხოვნით მიმართა
ინფორმაციას ამის შესახებ უგულავას ადვოკატი ბექა ბასილაია ადასტურებს.
ოპოზიცია ხელისუფლებასთან გაფორმებული მემორანდუმის ფარგლებში, საარჩევნო სისტემის შეცვლასთან ერთად, პოლიტიკური ნიშნით დაკავებული ადამიანების გათავისუფლების საკითხსაც აყენებს.
კერძოდ, საუბარია ირაკლი ოქრუაშვილისთვის, ბესიკ თამლიანისა და გიორგი რურუასთვის აღკვეთის ღონისძიების შეცვლაზე.
რაც შეეხება გიგი უგულავას, მას უზენაესმა სასამართლომ უკვე შეუფარდა პატიმრობა და ამჟამად მისი გათავისუფლების ერთადერთი სამართლებრივი მექანიზმი პრეზიდენტის შეწყალებაა.
„მთელი პოლიტიკური სპექტრი, ვინც ამ საქმეში ჩართული იყო, გამოთქვამს იმედს, რომ ეს შეთანხმება შესრულდება და ეს ვითარება განიმუხტება. მათ ინტერესშია, რომ საქართველოში ვითარება დამშვიდდეს და ამ ატმოსფეროს დამშვიდებისთვის საკვანძო საკითხია – პოლიტიკური პატიმრებისა და პოლიტიკური რეპრესიების საკითხი.
ამიტომ მიმართა მთელმა სპექტრმა პრეზიდენტს და შეთანხმებაშიც წერია, რომ ამ ინსტიტუტის გამოყენებააა სასურველი და უგულავას შემთხვევაში საჭირო, “ – აცხადებს ევროპული საქართველოს ერთ-ერთი ლიდერი გიგა ბოკერია.
• “ერთად ერთის წინააღმდეგ”. ნოემბრის პროტესტის ისტორია სამ წუთში [ვიდეო]
• 120/30: ყველა მთავარი კითხვა ოპოზიციასა და ხელისუფლებას შორის მიღწეულ შეთანხმებაზე
• ოპოზიცია სასამართლოს რეფორმაზე შეთანხმდა. რა და როგორ შეიცვლება მათი გამარჯვების შემთხვევაში
ხელისუფლების წარმომადგენლები ოპოზიციას სიცრუეში ადანაშაულებენ და ამბობენ, რომ ქვეყანაში პოლიტპატიმრები არ არსებობენ და ამ საკითხზე შეთანხმება მიღწეული არ არის.
პრეზიდენტის გიგი უგულავას შეწყალების საკითხზე ევროპარლამენტარებმაც მიმართეს.
წერილში, რომელსაც ევროპარლამენტის 11 წევრი აწერს ხელს, აღნიშნულია: “ჩვენ გვჯერა რომ გათავისუფლების აქტი მნიშვნელოვანი ნაბიჯი იქნება მხარეებს შორის ურთიერთობების სრულად ნორმალიზებისთვის, რასაც ჩვენ როგორც საქართველოს მეგობრები მოუთმენლად ველით.”
გიგი უგულავა სასამართლომ 2020 წლის 10 თებერვალს, „თბილისის განვითარების ფონდიდან” 48 მილიონ ლარზე მეტი თანხის გაფლანგვაში დამნაშავედ სცნო და 3 წლით და 2 თვით თავისუფლების აღკვეთა მიუსაჯა.
