აფხაზეთის ვიცე-პრეზიდენტი ადგილობრივ ბიზნესმენთან კონფლიქტის შემდეგ გადადგა

ოთხშაბათს, 22 აგვისტოს აფხაზი ჟურნალისტები ვიცე-პრეზიდენტის, ვიტალი გაბნიას პრეს-კონფერენციაზე მივიდნენ. ყველა ელოდა, რომ ის ისაუბრებდა მოქალაქეობის საკითხების სახელმწიფო კომისიის საქმიანობაზე, რომელსაც ხელმძღვანელობს. თუმცა, ამის ნაცვლად, გაბნიამ დაკავებული თანამდებობიდან ნებაყოფლობით გადადგომის შესახებ განაცხადა.

გაბნიამ გადადგომის მიზეზად გასულ შაბათს სოხუმის ერთ-ერთ რესტორანში მისი მონაწილეობით მომხდარი ინციდენტი დაასახელა. ვიტალი გაბნია მოჰყვა, რომ ის იქ ადგილობრივი ბიზნესმენების ჯგუფთან მოლაპარაკებას მართავდა და შეხვედრის ერთ-ერთმა მონაწილემ მას თავში ჩაარტყა.

„იძულებული ვარ წავიდე, რათა საკუთარი ღირსება დავიცვა, – თქვა გაბნიამ, – ეს პოლიტიკურ რეალიებს არანაირად არ უკავშირდება“.

ის პირველ რიგში იმის გამოა აღშფოთებული, რომ თავდამსხმელი არ დასჯილა

.„გამოდის, რომ მე, კანონმორჩილი ადამიანი, აპრიორი სუსტი აღმოვჩნდი ამ განუკითხაობის სისტემაში, სადაც ხელისუფლების სათავეში ქუჩაა. ჩვენთან მთელი სამართალდამცავი სისტემა სრულიად მოშლილია. როდესაც დამნაშავეებს არ სჯიან და უდანაშაულოებს სჯიან – ამით სახელმწიფოს კლავენ. მე იძულებული ვარ, რომ უფლებამოსილებები მოვიხსნა, რადგან  ჩემი უფლების და ღირსების დაცვა ამ მაღალ თანამდებობაზე ყოფნის დროსაც  არ შემიძლია. გამოდის, რომ  მხოლოდ ტრადიციულად, „აფხაზურად“ უნდა ვიმოქმედო, რისთვისაც უფლებამოსილებები უნდა მოვიხსნა“.

გაბნიამ დასძინა, რომ გადადგომის მიუხედავად, ის საკუთარ პოლიტიკურ კურსს არ შეიცვლის, მაგრამ პრეს-კონფერენციის მსვლელობისას მან მაინც მიმართა პრეზიდენტ რაულ ხაჯიმბას, რომ კენჭი არ იყაროს მომავალ საპრეზიდენტო არჩევნებში, რომელიც ზუსტად ერთ წელიწადში, 2019 წლის აგვისტოში ჩატარდება.

• აფხაზეთის პოლიტიკური ისტორიაში ეს უკვე მეორე შემთხვევაა, როდესაც ქვეყნის ვიცე-პრეზიდენტი თანამდებობას ტოვებს. 2013 წლის დეკემბერში თანამდებობიდან ნებაყოფლობით გადადგა ვიცე-პრეზიდენტი მიხაილ ლოგუა, რომელიც ამ თანამდებობაზე 2011 წელს ალექსანდრ ანქვაბთან ერთად იყრიდა კენჭს.

ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო.