Ermənistanda seçicilərin satın alınmasına qarşı mübarizədə yeni mexanizmlərin tətbiqi müzakirə olunur
Ermənistanda seçici satınalınmasına qarşı mübarizə
Ermənistanda seçkilərdən sonrakı dövrdə siyasi proseslər aktiv şəkildə davam edir. Dörd müxalif qüvvə — “Güclü Ermənistan” və “Ermənistan” blokları, “Çiçəklənən Ermənistan” və “Birlik Qanadları” partiyaları yaxın günlərdə parlament seçkilərinin nəticələrindən Konstitusiya Məhkəməsinə şikayət etməyə hazırlaşır.
Hakim “Vətəndaş müqaviləsi” partiyası parlamentdə çoxluq əldə edib. “Güclü Ermənistan” və “Ermənistan” blokları da parlamentə keçib. Lakin müxalifət “Vətəndaş müqaviləsi”ni kütləvi qanun pozuntularında, o cümlədən inzibati resurslardan istifadə etməkdə ittiham edir. Hakim partiya isə bu iddiaları rədd edərək, əvəzində müxalifəti seçiciləri ələ almaqda günahlandırır. Hətta “Vətəndaş müqaviləsi”nin nümayəndələri müxalifətin topladığı səslərin yalnız rüşvət hesabına əldə edildiyini bildirirlər.
Seçkilər zamanı aşkar edilmiş seçici rüşvəti halları əsasında Korrupsiyaya Qarşı Mübarizə Komitəsi qanunvericiliyin sərtləşdirilməsi ilə bağlı təkliflə çıxış edib.
Xüsusilə, söhbət “cinayət sxemlərində iştirak etmiş siyasi qüvvələrin seçki proseslərində iştirakının qadağan olunmasından” gedir.
“Biz seçici rüşvəti paylayan qüvvələrin Ermənistanda siyasi təsir imkanına malik olmaması üçün təminatlar yaratmalıyıq”, — deyə baş nazir Nikol Paşinyan bu gün parlamentdə bildirib. Onun sözlərinə görə, dövlətin “bu dairələri gələcək siyasi fəaliyyət imkanlarından məhrum etmək üçün legitim hüququ var”.
Eyni zamanda, Milli Məclisin sədri Alen Simonyan seçici rüşvətinin verilməsi və alınmasına görə cəzaların sərtləşdirilməsinin planlaşdırıldığını açıqlayıb. Həm rüşvət verənlər, həm də alanlar üçün həbs müddətləri artırılacaq.
Keçirilmiş seçkilərin nəticələrindən sonra hakim partiya yaxın günlərdə parlamentin gündəliyinə daha bir qanunvericilik təşəbbüsü çıxarmaq qərarına gəlib. Bu qanun layihəsinə əsasən, ümummilli seçkilərdə iştirak hüququ yalnız seçkilərdən əvvəlki bir il ərzində ən azı altı ay Ermənistanda yaşamış vətəndaşlara veriləcək.
“Vətəndaş müqaviləsi” fraksiyasının rəhbəri Ayk Koncoryan bildirib ki, bunu ölkədə daimi yaşayan Ermənistan vətəndaşları tələb edir. O vurğulayıb ki, belə bir norma artıq “Yerli özünüidarə haqqında” qanunda mövcuddur.
“Təəccüblüdür ki, yerli özünüidarə orqanlarına seçkilərlə bağlı belə bir tənzimləmə mövcuddur, lakin ümummilli qanunvericilikdə yoxdur. Düşünürəm ki, qanunvericiliyin uyğunlaşdırılması baş verəcək”, — deyə Konjoryan bildirib.
Hakim partiyanın seçkilərdən sonrakı qanunvericilik təşəbbüsləri barədə daha ətraflı.
- Ermənistanda seçkilərin nəticələri Cənubi Qafqaza necə təsir edəcək? Tbilisidən baxış
- “Rusiyanın B planı işə düşdü”: Ermənistanda seçkilərin ilkin nəticələrinin təhlili
- MSK Ermənistanın keçmiş prezidenti Robert Koçaryanı deputat toxunulmazlığından məhrum edib
“Təkcə vətəndaşlıq kifayət deyil”: ölkədə 6 aylıq yaşayış tələbi
Hakim fraksiyanın rəhbəri Ayk Koncoryanın sözlərinə görə, parlament növbədənkənar sessiya çağıracaq və burada seçkilərdə iştirak şərtləri müəyyənləşdiriləcək:
“Seçkilərdən əvvəlki bir il ərzində Ermənistanda ən azı 6 ay yaşamış vətəndaşlar seçkilərdə iştirak edə və dövlətimizin taleyini müəyyən edə biləcəklər”.
O bildirib ki, layihə artıq hazırdır. Belə bir qanunvericilik tənzimlənməsinə ehtiyac isə son müzakirələr nəticəsində yaranıb.
Hakim partiyanın deputatı hesab edir ki, təkcə vətəndaşlıq və pasportun mövcudluğu kifayət deyil. Onun fikrincə, ölkənin gələcəyi barədə qərar vermək hüququ dövlətlə “üzvi əlaqəsi” olan şəxslərə verilməlidir. Əgər konkret şəxsin maraqları Ermənistanla bağlı deyilsə, o, uzun müddətdir vətənində yaşamırsa, seçiminin nəticələrini də öz üzərində hiss etməyəcək.
“Yerli sakinlər isə deyirlər: ‘Bu, doğrudanmı ədalətlidir? Axı Ermənistan onların maraqlar mərkəzi deyil’. Ən parlaq nümunələr isə seçkilər zamanı müşahidə olunurdu. Xaricdən gələn bəzi şəxslər deyirdilər: “Biz səs veririk və gedirik, nəticələri isə bizi maraqlandırmır”, — deyə Koncoryan xatırladıb.
O vurğulayıb ki, əgər “Vətəndaş müqaviləsi” partiyasının “üçbaşlı müharibə partiyası” adlandırdığı əsas müxalif qüvvələr hakimiyyətə gəlsə və müharibə başlasa, həmin vətəndaşlar o vaxta qədər artıq xaricdə olacaqlar. Onlar müharibəyə getməyəcək, uşaqları döyüşlərdə iştirak etməyəcək, əmlaklarını itirməyəcəkdilər. Koncoryanın sözlərinə görə, bütün bu nəticələrlə yalnız ölkədə yaşayan insanlar üzləşəcəkdilər.
Paşinyan və komandası “üçbaşlı müharibə partiyası” ifadəsi ilə seçkilərdə iştirak edən və Azərbaycanla sülh sazişinə yenidən baxılmasını müdafiə edən üç Rusiyayönlü siyasi qüvvəni nəzərdə tutur. Söhbət rusiyalı iş adamı Samvel Karapetyanın “Güclü Ermənistan” partiyasından, sabiq prezident Robert Koçaryanın “Ermənistan” blokundan və iri sahibkar Qaqik Tsarukyanın “Çiçəklənən Ermənistan” partiyasından gedir. Hakim partiyanın nümayəndələri bildirirdilər ki, rəqiblərinin mövqeyi qaçılmaz olaraq yeni müharibəyə gətirib çıxaracaq.
7 il əvəzinə 9 il həbs: rüşvət almağa görə daha sərt cəza
Parlamentin sədri Alen Simonyan da hakim partiyanın çağırmaq niyyətində olduğu növbədənkənar sessiyanın gündəliyinə toxunub. O, gündəliyə daxil edilən daha bir qanunvericilik təşəbbüsünü açıqlayıb. Təşəbbüs seçici rüşvətinin verilməsi və alınmasına görə cəzaların sərtləşdirilməsini nəzərdə tutur.
Simonyan bildirib ki, seçici rüşvətinin alınmasına görə əvvəl nəzərdə tutulan 7 il həbs cəzası əvəzinə, artıq 9 il həbs cəzası tətbiq olunacaq. Seçici rüşvətinin verilməsinə görə cəza da sərtləşdiriləcək. Belə ki, seçkiqabağı ələalma ilə məşğul olan şəxsləri artıq 8 il deyil, 10 ilədək həbs cəzası gözləyəcək.
O, bunun qanunu pozanlara qarşı nəzərdə tutulan yeganə alət olmadığını da bildirib:
“Digər alətlər də olacaq. Bundan başqa, siyasi nəticələr də nəzərdə tutulur”.
Korrupsiyaya Qarşı Mübarizə Komitəsinin qanunvericiliyə dəyişiklik təklifi
Korrupsiyaya Qarşı Mübarizə Komitəsi ədliyyə nazirinə müraciət edərək, aşkar edilmiş cinayət sxemlərindən istifadə imkanlarını minimuma endirəcək qanunvericilik dəyişikliklərinin təşəbbüs edilməsini xahiş edib. Söhbət sərt tədbirlərdən, o cümlədən, bu sxemlərdə iştirakı olan siyasi qüvvələrin seçkilərdə iştirakının qadağan edilməsindən gedir.
Korrupsiyaya Qarşı Mübarizə Komitəsinin məlumatında bildirilir ki, təklif 7 iyun 2026-cı il seçkilərindən əvvəlki dövrdə aşkar edilmiş korrupsiya cinayətləri üzrə araşdırmalar zamanı əldə olunan məlumatlara əsaslanır. Bu korrupsiya işlərinin təhlili nəticəsində cinayət sxemlərindən istifadə mexanizmləri üzə çıxarılıb.
Görünür, yaxın vaxtlarda seçkilərdə rüşvət sxemlərində iştirakı olan partiyaların seçkilərə qatılmasını qadağan edən qanun layihəsi də hazırlanacaq.
Hüquq-mühafizə orqanlarına “seçici rüşvəti sxemini ifşa etmək” çağırışı
Parlament sədrinin müavini Ruben Rubinyanın sözlərinə görə, ona və hər bir sağlam düşüncəli insana aydındır ki, hansısa “vasitəçi bir gün səhər oyanıb” seçkiqabağı rüşvət paylamaq qərarına gələ bilməzdi:
“Aydındır ki, əvvəlcə onlar (siyasi qüvvələrin nümayəndələri) bu pulları həmin şəxslərə verib, sonra isə tapşırıblar: bu pulu götür, gedib ödə ki, bizi seçsinlər. Mənim üçün aydındır ki, məsuliyyət “Güclü Ermənistan”, “Ermənistan” bloku və “Çiçəklənən Ermənistan”ın üzərinə düşür. Bu partiyaların rəhbərliyi seçkiqabağı ələalma prosesini təşkil edib və ona rəhbərlik edib”.
Rubinyan hesab edir ki, seçkiqabağı rüşvət paylayanların hamısı həbs edilməlidir:
“Mən hüquq-mühafizə orqanlarını bu sxemi ifşa etməyə çağırıram”.
O əmindir ki, yalnız əmrləri icra edən bir neçə nəfəri həbs etmək kifayət deyil. Rubinyan “cinayət sxeminin” rəhbərlərini məsuliyyətə cəlb etməyə çağırır.
Ermənistanda seçici satınalınmasına qarşı mübarizə
