Պատերազմի ժամանակ խաղաղություն նկարողը՝ տեսանյութ լուսանկարչի մասին
Լուսանկարիչ Արեգ Բալայանը ապրում է Արցախում: 2016 թվականի Ապրիլյան պատերազմի ժամանակ նա մոբիլիզացվեց: Առաջին գիծ` կռվելու, իհարկե, գնաց առանց ֆոտոխցիկի: Սակայն հետո, ապրիլի կեսերին, հնարավորություն եղավ մեկ օրով գալ տուն, և նա արդեն իր հետ վերցրեց ֆոտոխցիկը:
Ազատ ժամանակ, այսինքն այն ժամերին, երբ քիչ թե շատ հանգիստ էր և կարելի էր շունչ քաշել, քնել, Արեգը լուսանկարում էր… Այսպես ստեղծվեց նրա՝ “MOB (Military mobilization)” ֆոտոշարքը, որը նրան դարձրել է Lens Culture Exposure Awards միջազգային մրցույթի երեք հաղթողներից մեկը:
- 2016թ. ապրիլի 2-ի գիշերը 1994թ.-ին կնքված զինադադարից հետո առաջին անգամ ղարաբաղյան հակամարտության գոտու շփման գծում ռազմական բախում տեղի ունեցավ: Ապրիլի 6-ին Ադրբեջանի և ԼՂ պաշտպանության նախարարությունները հայտնեցին, որ համաձայնություն է ձեռք բերվել հաշտության ռեժիմի վերականգնման վերաբերյալ:
- Պաշտոնական տվյալների համաձայն, հակամարտության սրման ընթացքում ադրբեջանական կողմից զոհվել է 31 զինծառայող: Սակայն “Խազար ռազմական հետազոտությունների կենտրոնի տվայլներով, այդ թիվը հասնում է 93-ի:
- Պաշտոնական տվյալներով, հայկական կողմից զոհվել է 92 զինծառայող:
- Հայաստանի և Ադրբեջանի միջև զինված հակամարտությունը Լեռնային Ղարաբաղի շուրջ տեղի է ունեցել 1991–1994 թթ.: Զինադադարի ստորագրումից հետո Լեռնային Ղարաբաղի Հանրապետությունը դե ֆակտո անկախ պետություն է, սակայն չի ճանաչվել աշխարհի ոչ մի պետության կողմից, այդ թվում նաև՝ Հայաստանի: Ադրբեջանը Ղարաբաղն ու պատերազմի ընթացքում գրավված հարակից տարածքները համարում է “օկուպացված և պահանջում է վերադարձնել դրանք: