Ապրիլի 27–ից Ադրբեջանում կբացվեն խանութները և փողոցում կարելի կլինի մեկ ժամով ավելին գտնվել․ սկսվում է կարանտինից դուրս գալու գործընթաց

Ապրիլի 27–ից Ադրբեջանում կբացվեն գրեթե բոլոր խանութները, որոնք այժմ փակ են կարանտինի ռեժիմի պատճառով՝ բացառությամբ մեծ առևտրի կենտրոններում տեղակայված խանութների։ Կթույալտրվի նաև կրկնուսույցների աշխատանքը։ Սա կարանտինային ռեժիմից դուրս գալու առաջին փուլն է։ Կարանտինային ռեժիմը կավարտվի մայիսի 4–ին։

Դեռևս ուժի մեջ է մնում քաղաքացիների տեղաշարժի սահմանափակումը, և փողոց դուրս գալու համար անհրաժեշտ է իշխանություններից թույլտվության հաղորդագրություն ստանալ։ Սակայն եթե այժմ այդ թույլտվությունը տրամադրվում է օրական երկու ժամով, ապա ապրիլի 27–ից դրսում կարելի կլինի գտնվել արդեն 3 ժամ։ 

• Նավթ և կորոնավիրուս․ ադրբեջանական տնտեսության երկու դժբախտությունները
• Ի՞նչն է ավելի դժվար, երբ երկու շաբաթ մեկուսացման մեջ ես։ Պատմություններ Վրաստանից՝ նկարահանված բջջայինով

Նախորդ օրն Ադրբեջանում կորոնավիրուսով վարակված ևս մեկ մարդ է մահացել․ նա 85 տարեկան էր, սրտի իշեմիկ հիվանդություն, անոթային հիպերտենզիա և ատերասկլերոտիկ կարդիոսկլերոզ ուներ։ 

Մեկ օրում գրանցվել է նաև վարակման 44 նոր դեպք, 65 մարդ է ապաքինվել։ 

Այսպիսով, ըստ պաշտոնական վիճակարության, այս պահին Ադրբեջանում կորոնավիրուսով վարակվել է, ընդհանուր առմամբ, 1592 մարդ, նրանցից 21–ը մահացել է, 1013–ն՝ ապաքինվել։ 

Ադրբեջանում Առողջապահության համաշխարհային կազմակերպության ներկայացուցիչ Հանդե Հարմանջիի կարծիքով՝ վարակման դեպքերի աճի, այնուհետև նվազման ցուցանիշները կարող են վկայել այն մասին, որ գագաթնակետը հաղթահարվել է։ Սակայն պնդել դա և զգոնությունը կորցնել դեռ վաղ է։