Ինչի՞ են ընդունակ կախարդական բլիթները
Նատելլա Օսմանլին գրում է մայրաքաղաքի տարբեր շրջանների նորաձևության թրենդերի մասին և արձակ՝ ճակատագրական կանանց մասին:
Վյաչեսլավ Սապունովը գրում է ճամփորդությունների և ուտելիքի մասին, դիմավորում և ճանապարհում է կարևոր արտասահմանյան հյուրերի՝ բլոգերների ու գրողների:
Համիդ Համիդովը հոդվածներ է գրում, որոնց գլխավոր հերոսը հենց ինքն է:
Այս մարդիկ, ինչպես նաև նույն մեծության ևս մի քանի աստղեր մայրաքաղաքի բլոգերներ են՝ համացանցի ռուսախոս բաքվեցիների տիրույթում ամենաճանաչվածները:
Սակայն վերջերս նրանք ստիպված են պաշտպանվել վրդովված քաղաքացիներից ու լսել նրանց մեղադրանքները երկերեսանիության ու դավաճանության համար: «Վաճառվել են մի բլիթի դիմաց» — միաձայն վանկարկում են disput.az ֆորումի մշտական այցելուները:
Բայց ի սկզբանե այդ ալիքն ուղղված էր բոլորովին այլ կողմ՝ AZAL ավիաընկերության: Ադրբեջան Հավա Յոլարի պետական կոնցեռնի մաս կազմող ազգային ավիափոխադրողը ներքին ավիաշուկայում մենաշնորհային դիրքեր է զբաղեցնում: Նույն կոնցեռնի մյուս մասի՝ «Հեյդար Ալիև» օդանավակայանի հետ միասին AZAL-ը ավիատոմսերի գները պահում է այնպիսի մակարդակում, որ հաշվել կարողացողները նախընտրում են գնացքով հասնել Թբիլիսի, հետո այնտեղից ավիատոմս գնել ու մեկնել այլ երկրներ:
Բաքվեցի բլոգերները AZAL-ին հատուկ գեղագիտությամբ էին ծաղրում: Հնարավոր է՝ հենց այդ ժամանակ, երբ ավիաընկերության ղեկավարությունը (իշխանությունների դժգոհությունից դրդված) որոշեց փրկել իր հեղինակությունը, բլոգերներին հրավիրեցին էքսկուրսիայի դեպի օդանավակայան:
Այնտեղ AZAL- փոխնախագահ Էլդար Հաջիևը նրանց բացատրեց, որ ընկերության կողմից սահմանած նման վերերկրային գները ագահությունից չէ, այլ ուղևորների մասին հոգածությունից:
Բացի այս, բլոգերներին ծանոթացրին օդանավակայանի «աշխատանքային խոհանոցին»՝ ներառյալ ժամանակակից ինքնաթիռները, դիսպետչերական աշտարակը, տեխնիկայի վերջին խոսքով վերազինված օբյեկտները:
Այդ հետաքրքրաշարժ զբոսանքի մասին պատմությունները խեղդվեցին ժողովրդի զայրույթի ալիքում, երբ պարզ դարձավ, որ 11 բլոգերների հրավիրել են «փորձարկել» դեպի Նյու Յորք ուղիղ չվերթը: AZAL-ը տրամադրեց անվճար տոմսեր ու վճարեց այնտեղ մնալու ծախսերը:
«Ի՞նչ էի ես անում Նյու Յորքում: Նման հարցով հաղորդագրությունները իմ անձնական էջին եկող հաղորդագրությունների հիթն են վերջին օրերին: Պատասխանում եմ. ծախվել եմ AZAL-ին վարսակի շիլայի ու մի քանի բլիթների դիմաց: Եթե հավատացիք այս պատասխանին, ուրեմն էլ մի կարդացեք: Եթե ոչ, այժմ լուրջ եմ խոսելու: Բանն այն է, որ նոյեմբերի 7-ից Բաքու-Նյու Յորք-Բաքու ավիաչվերթն իրականացվում է ‘Boeing 787-8’ Dreamliner ինքնաթիռներով: Ինքնաթիռի մասին շատ է խոսվել. Այն Boeing դասի ամենանոր ինքնաթիռն է: Բաքու-Նյու Յորք-Բաքու չվերթի համար այն առաջին անգամ է գործարկվել, և որպես սովորական ուղևոր փորձարկել այն ինձ և 10 այլ լրագրողների հրավիրել է AZAL-ը», — իր բլոգում նոյեմբերի 11-ին գրել է Համիդ Համիդովը:
Իհարկե, այս նորությունը զայրույթի ալիք բարձրացրեց: Մարդկանց կարծիքով, նման նվերները հենց այնպես չեն արվում, բացի այդ, գլամուրային սրճարանում վեհաշունչ թեմաներ քննարկող արտասովոր հագնված մարդկանց լուսանկարն արդեն շատերին նյարդայնացնում էր: Այս անգամ զայրացան նաև գրչակիցներն, ում ինչ-ինչ պատճառներով չէին հրավիրել: Ծախվածության ու երկերեսանիության համար մեղադրանքների տարափ սկսվեց: Ինչ-որ մեկը հայտարարեց, որ ամերիկյան վիզայի ֆոտոներ տեղադրելն ու այդ առթիվ շնորհավորանքներ ստանալը բարեկիրթ չէ:
«Սա պաշտոնական անձի էջ չէ: Ես պարզապես Նատան եմ: Ես հայտնիներից չեմ: Ես ուղղակի Նատան եմ, ով այսօր գրում է քաղաքականության, վաղը շպրոտի մասին, իսկ մյուս օրը նոր զգեստի լուսանկար է գցում և գրում ճամփորդությունների մասին: Սա կենդանի մարդու կենդանի էջ է, ինչպես բոլորինն է: Եթե դուք սպասում եք աստղային հավասարակշռվածություն, գոյություն չունեցող կարգավիճակի համար արվող զտումներ, հուսով եմ, ընդհանուր առմամբ, երբեք նման բան չեք տեսնի»:
AZAL-ի մամուլի քարտուղար Պաշա Քեսամանսկին նման կերպ է մեկնաբանում հարցը. «Ադրբեջանական ավիաուղիները» ներկա պահին բաց են հասարակության համար: Այդ կապակցությամբ վերջերս մենք բաց դռների օր անկացրինք, որի շրջանակում ավիաընկերություն էին հրավիրվել լրագրողներ ու բլոգերներ: Ավիաընկերության ղեկավարության հետ հանդիպում էր կազմակերպվել, որից հետո ճանաչողական էքսկուրսիա է անցկացվել Ադրբեջանի քաղավիացիայի որոշ օբյեկտներ:
Բացի այդ կազմակերպվել է պրես-տուր դեպի Նյու Յորք, որի առիթը Բաքու-Նյու Յորք-Բաքու չվերթերի իրականացման մեկնարկն է եղել ժամանակակից Boieng 787 Dreamliner ինքնաթիռներով: Նմանատիպ պրես-տուրերի կազմակերպումը նորմալ պրակտիկա է ոչ միայն մեր երկրում, այլ նաև ամբողջ աշխարհում:
Իրականում ուղևորությանը մեծ քանակով մարդին են մասնակցել: Ընտրությունը կատարվել է պարզ սկզբունքով՝ ԶԼՄ հիշատակումների քանակն ու տարածվածությունը սոցկայքերում: Ցավոք, մի շարք օբյեկտիվ պատճառներով պրես-տուրին չեն կարողացել մասնակցել որոշ հայտնի բլոգերներ’:
