"ეს ჩეხეთის სირცხვილია", - აცხადებს ჩეხი დეპუტატი" />

ჩეხეთში გამართულ ტურისტულ გამოფენაზე აფხაზეთი დამოუკიდებელ ქვეყნად იყო წარმოდგენილი

"ეს ჩეხეთის სირცხვილია", - აცხადებს ჩეხი დეპუტატი

15-18 თებერვალს პრაღაში გამართულ საერთაშორისო ტურისტულ გამოფენაში Holiday World-2018 აფხაზეთის წარმომადგენლებმა, როგორც დამოუკიდებელი ქვეყნის წარმომადგენლებმა, ისე მიიღეს მონაწილეობა.  დელეგაციამ, რომელიც გამოფენაზე წარმოდეგენლი იყო როგორც „აფხაზეთის სავაჭრო-სამრეწველო პალატა“, აფხაზეთის ტურისტული პოტენციალის შესახებ სარეკლამო მასალები, ადგილობრივი ალკოჰოლური სასმელები და პროდუქტები ჩაიტანა.

„გვსურს, რომ რაც შეიძლება მეტმა ჩეხმა შეიტყოს აფხაზეთის შესახებ, – თქვა დელეგაციის წარმომადგენელმა, რომელმაც თავი ირადად გაგვაცნო, – ჩვენი პავილიონისადმი დიდი ინტერესი არსებობს“, – დასძინა მან.

ჩეხეთის რესპუბლიკაში საქართველოს საელჩოს უფროსი მრჩევლის, მიხეილ ჩხიკვაძის განცხადებით, ქართულმა მხარემ ყველანაირი ზომა მიიღო იმისთვის, რომ აფხაზეთი ამ გამოფენაზე დამოუკიდებელ ქვეყნად არ დაეშვათ, თუმცა, მისი თქმით, ამ მცდელობამ შედეგი არ გამოიღო.

“Holiday World -ის ორგანიზატორი იყო კერძო კომპანია, რომლის გადაწყვეტილებაზე ზემოქმედება არც ქართულ მხარეს შეეძლო და არც ჩეხეთის მხარეს. ე.წ. „აფხაზეთის სავაჭრო-სამრეწველო პალატა“ გამოფენაზე ასევე კერძო კომპანიად დარეგისტრირიდა“, – განაცხადა საელჩოს პირველმა მრჩეველმა.

აფხაზეთის, როგორც დამოუკიდებელი ქვეყნის გამოფენაში მონაწილეობამ ზოგიერთი ჩეხი პოლიტიკოსის უკმაყოფილებაც გამოიწვია.

„ეს ჩეხეთისთვის სამარცხვინოა, – განუცხადა JAMnews-ს ჩეხმა პარლამენტარმა იარომირ შტეტინამ, – მრცხვენია ჩეხეთის რეგიონული განვითარების სამინისტროს მაგივრად, რადგან მათ ეს დაუშვეს. მიმაჩნია, რომ ბოდიში უნდა მოიხადონ (ქართული მხარის წინაშე)“.

„ეს არის კლასიკური პროვოკაცია, – ასეთი კომენტარი გააკეთა ჩეხური გაზეთის „გოსპადარსკიე ნოვინის“ საერთაშორისო მიმომხილველმა ონდრა სოუკუპმა, – აფხაზური დელეგაციის მონაწილეობის ინიციატორი ალბათ ექსტრემისტების და კონსპიროლოგების ჯგუფია, რომელსაც პრომოსკოვური ძალა კვებავს. ეს იგივე ძალაა, რომელმაც ჩეხეთში დონბასელ ხალხთან მეგობრობის არასამთავრობო ორგანიზაცია დააფუძნა. ეს გამოცდილი ტექნოლოგიაა და მასთან ბრძოლა უაღრესად რთულია“, – თქვა სოუკუპმა.

ტექსტში გამოყენებული ტერმინები და ტოპონიმები, ასევე მოსაზრებები და იდეები, ყოველთვის არ ემთხვევა JAMnews-ის და მისი ცალკეული თანამშრომლების პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო.


ასევე წაიკითხეთ