"მოვიდეს ივანიშვილი სასახლეში, რადგან ყველაფერს ის მართავს" - სალომე ზურაბიშვილის გამოსვლა აქციაზე
სალომე ზურაბიშვილის გამოსვლა აქციაზე
22 დეკემბერს პრეზიდენტმა სალომე ზურაბიშვილმა რუსთაველის გამზირზე აქციის მონაწილეებს სიტყვით მიმართა, თუმცა, გამოსვლის დაწყებიდან რამდენიმე წუთში მიკროფონს ხმა შეუფერხდა, რის გამოც, ზურაბიშვილს მიმართვის გაგრძელება მეგაფონის მეშვეობით მოუწია.
ზურაბიშვილმა განაცხადა, რომ იგი ერთგული რჩება იმ კონსტიტუციის, რომელიც “ფეხქვეშ გათელეს” და დაამატა, რომ იგი არის და იქნება ქვეყნის არმიის უმთავრესი მთავარსარდალი.
რა თქვა სალომე ზურაბიშვილმა
ეს არის ძალიან სიმბოლური ადგილი, სადაც ახლა ვდგავარ თქვენს წინაშე. აქ, ამ სკოლაში, სწავლობდა მამაჩემი. ჩემს ზურგს უკან ილია და აკაკი გვიყურებს და უყურებენ ამ ახალ საქართველოს, რომელიც უკვე დაიბადა, თქვენით, რომელიც ხვალ, ზეგ იქნება ძალიან ძლიერი, ძალიან ევროპული საქართველო, ამას ვერავინ ვერ გააჩერებს.
მართალია, თქვენ აქ რაღაცა 300 კაცი ხართ.
მართალია, დაგვიპატიმრეს სცენა თუ მიკროფონები, თუ ყველაფერი რაც შეიძლებოდა, და ორჯერ.
მართალია, რომ მე დამპირდნენ, რომ გისოსების უკან ვიქნებოდი მალე, მაგრამ ჩვენ ხომ არ გვეშინია. არ გვეშინია იმიტომ, რომ აქ მხოლოდ სიყვარული სუფევს. ვინც ამბობს, რომ აქ იბადება რაღაცა ვინმესთან დაპირისპირება, ეს არის ერთი ტყუილი, კიდევ ერთი ტყუილი ბევრ ტყუილთა შორის. აქ სუფევს მხოლოდ მშვიდობა, სიყვარული და თავისუფლება.
დღეს არსად… მრავალთა მარშის შუა მოდიოდა ერთი, ძალიან მნიშვნელოვანი, რომელიც იყო ანწუხელიძის მარში და სწორედ ანწუხელიძის წინაშე ვარ მე ვალდებული, ხართ თქვენ ვალდებულნი, რომ ვიყოთ ერთგული იმ საქართველოსთვის, რომლისთვისაც იმან თავისი სიცოცხლე დადო და ანწუხელიძესთან ერთად ის უამრავი გმირი, რომელსაც საქართველოს წარსული ითვლის და რომლის გამოც ჩვენ აქ ვდგავართ, თორემ არ ვიქნებოდით, თორემ საქართველო არ იქნებოდა, მაგრამ საქართველოს არასოდეს არ ეგუება, არასოდეს არ თმობს, როცა მართალია, და მართალია საქართველო, და მართალი ხართ თქვენ, და მე მინდა ახლა გითხრათ, რას გავაკეთებთ.
პირველ რიგში, მე რას გავაკეთებ. მე ვრჩები ერთგული იმ ქვეყნის, იმ კონსტიტუციის, რომლის წინაშე მე დავდე ფიცი 6 წლის წინ. ეს კონსტიტუცია, რომელიც გათელეს ფეხქვეშ, მაგრამ დგას, როგორც დგას საქართველო და მე შეიძლება მხოლოდ გავაგრძელო და ვიყო მისი ერთგული. მე ვიქნები ერთგული იმ ქართული ჯარის, მისი ვეტერანების, რომლებიც დღეს აქ მოდიოდნენ და ჯარის, რომელიც იცავს საქართველოს, რომელიც თვითონ არის ერთგული იმ პარტნიორების, რომლებმაც შექმნეს, აღჭურვეს და გააძლიერეს საქართველოს ჯარი. მე ვარ და ვიქნები მისი უმაღლესი მთავარსარდალი. მე ვარ და ვიქნები ერთგული ამ ხალხის, რომელიც აქ დგას, მაგრამ არამხოლოდ ამ ხალხის, რომელიც აქ დგას. არავინ არ ჩათვალოს, რომ მე არა ვარ ყველას პრეზიდენტი, ვარ და ვიქნები. ვინც, მაშინ ამირჩია […] […] აქ ყველაფერი მარტივად არის. არჩევნები არ შედგა და არამხოლოდ არ შედგა არჩევნები, არ არის არავისგან აღიარებული, არ არის აღიარებული თქვენგან, რაც მთავარი არის და არ არის აღიარებული ჩვენი უცხო პარტნიორებისგან. ეს არჩევნები, როცა არ არის აღიარებული და როცა არის არალეგიტიმური, არაკონსტიტუციური ხელისუფლება, მაშინ ვართ ღრმად კრიზისში და ამ კრიზისიდან გამოსვლის არის ერთადერთი ფორმულა მთელ მსოფლიოში, ყოველივე დემოკრატიულ ქვეყანაში, რომელსაც უნდა გამოსვლა პოლიტიკური გზით ღრმა კრიზისიდან და ეს არის ახალი არჩევნები, ამიტომ მე, რომელიც აქ ვარ და აქ, ვიქნები ვეპატიჟები, ვეპატიჟები მისი პარტიის კობახიძეს, პაპუაშვილს და კიდევ ვინც უნდა, ვეპატიჟები იმ პარტიებს, რომლებიც მონაწილეობდნენ არჩევნებში და ვეპატიჟები იმ ორგანიზაციებს, რომლებიც აკვირდებოდნენ არჩევნებს. მოდით ორბელიანების სასახლეში. მობრძანდით და მოვილაპარაკოთ. ოღონდ სალაპარაკო მხოლოდ ერთი არის – როდის და როგორ უნდა დავნიშნოთ არჩევნები. ამ მოლაპარაკებისთვის ცოტა დრო არის.
[…] მოვიდეს სასახლეში, მოვიდეს ივანიშვილი, რადგან ის მართავს ყველაფერს და მე მზად ვარ, რომ დავსხდეთ და მოვიფიქროთ, როგორ უნდა დაინიშნოს არჩევნები, ოღონდ რიცხვი არჩევნების დანიშვნის უნდა შეთანხმებული იყოს 29-მდე. ოცდაცხრამდე ჩვენ ყველას გვაქვს დიდი შანსი, რომ ეს ქვეყანა წინ წავწიოთ, რომ ამ ქვეყნიდან წავიდეს მთელ მსოფლიოში მაგალითი დემოკრატიის, მაგალითი შერიგების, მაგალითი წინსვლის. მე ველოდები პასუხს და რომ ეს ყველაფერი ნათელი იყოს ხვალ საღამოს სასახლიდან, იქ ჩავწერ სრულ სიტყვას, რადგანაც აქ არა მხოლოდ სცენა დაგვიპატიმრეს, როგორც ჩანს, ხმაც დამიპატიმრეს, მაგრამ არაფერი არ იქნება, არა უშავს, შევხვდებით და გელოდებით”.
