ევროპელ ლიდერებთან გაიგზავნა წერილი, ევროპული საბჭოს შეხვედრაზე საქართველოს საკითხიც განიხილონ: სალომე ზურაბიშვილი
ზურაბიშვილის ბრიფინგი
საქართველოს მეხუთე პრეზიდენტის, სალომე ზურაბიშვილის განმარტებით, ევროპელ ლიდერებთან გაიგზავნა წერილი, რათა ევროპული საბჭოს შეხვედრაზე საქართველოს საკითხიც დადგეს დღის წესრიგში.
სპეციალურ ბრიფინგზე სალომე ზურაბიშვილმა განაცხადა, რომ ევროპული საბჭოს შეხვედრაზე, რომელიც ზეგ, 21 მარტს უნდა გაიმართოს, დღის წესრიგშია უკრაინა და თავდაცვის ახალი პროექტები, მაგრამ, არსად წერია საქართველოს საკითხი, როგორც ერთ-ერთი თემა.
- საქართველოში დააყადაღეს ფონდები, რომლებიც აქციის დაჯარიმებულ მონაწილეებს და პოლიტპატიმრების ოჯახებს ეხმარებოდნენ
- საპროტესტო აქციის მონაწილეებისთვის გამოწერილი ჯარიმების ოდენობა ორ მილიონ ლარს აღწევს
მისი თქმით, სწორედ ამან განაპირობა წერილის გაგზავნა. ეს წერილი ერთობლივად, სალომე ზურაბიშვილისა და ოპოზიციური პარტიების კოორდინირებით მომზადდა.
“რაც არ უნდა სხვა პრიორიტეტები იყოს, გასაგებია ჩვენთვისაც, რომ ის სხვა პრიორიტეტები არ ითმენს, არ შეიძლება არ იყოს გარკვეული ყურადღება იმის მიმართ, რაც ხდება დღეს საქართველოში“, – განაცხადა სალომე ზურაბიშვილმა.
მან დააზუსტა, რომ გულისხმობს რეპრესიული რეჟიმის ყოველდღიური გაფართოებას. ასევე თქვა, რომ შეუძლებელია საქართველო განიხილებოდეს ცალკე, როგორც ჩაკეტილი კრიზისი:
“ეს არის ნაწილი იმ კრიზისის, რომელიც მოიცავს ევროპას, რომელმაც უკრაინაში მიიღო სამხედრო ფორმა, მაგრამ საქართველოში არის ჰიბრიდული ფორმით – იგივე აგრესიაა საქართველოს მიმართ. საქართველოს დამოუკიდებლობის, საქართველოს დემოკრატიის, საქართველოს ევროპულობის წინააღმდეგ მიდის ბრძოლა, რომელსაც არ აქვს სამხედრო ფორმა”.
მისი თქმით, არ შეიძლება საქართველოს საკითხი არ იყოს განხილული, როცა დისკუსია იქნება შავი ზღვის შესახებ.
ზურაბიშვილის ბრიფინგი
